Perëndimi kundër kamerave

Perëndimi kundër kamerave
“Instalimi i kamerave monitoruese në vendvotime nuk praktikohet as në Evrope dhe as në Shtetet e Bashkuara, dhe ne përkrahim vendimin e Komisionit Qendror Zgjedhor për të mos instaluar kamerat në vendvotime në zgjedhjet komunale të 15 nëntorit”, thuhet në Deklaratën që është lëshuar në mbrëmje nga ambasadorët e Francës, Gjermanisë, Italisë, Mbretërisë së Bashkuar, Shteteve të Bashkuara, dhe Përfaqësuesit Civil Ndërkombëtar

Nga Express

Partitë që kërkojnë instalimin e kamerave në vendvotime dhe qendra të numërimit të votave më 15 nëntor kanë marrë një goditje nga ambasadat perëndimore në Prishtinë të cilat kanë mbështetur fuqishëm vendimin e KQZ’së kundër instalimit të tyre.

“Instalimi i kamerave monitoruese në vendvotime nuk praktikohet as në Evrope dhe as në Shtetet e Bashkuara, dhe ne përkrahim vendimin e Komisionit Qendror Zgjedhor për të mos instaluar kamerat në vendvotime në zgjedhjet komunale të 15 nëntorit”, thuhet në Deklaratën që mbrëmë e kanë lëshuar ambasadorët e Francës, Gjermanisë, Italisë, Mbretërisë së Bashkuar, Shteteve të Bashkuara, dhe Përfaqësuesit Civil Ndërkombëtar në përkrahje të zgjedhjeve të lira dhe fer.

Në këtë deklaratë thuhet se përdorimi i kamerave monitoruese paraqet rrezik sa i përket respektimit të drejtës fundamentale të çdo qytetari për të gëzuar të drejtën për votim të fshehtë.

“Meqë Kosova është duke u përgatitur për zgjedhjet e 15 nëntorit, mbrojtja e kësaj të drejte fundamentale duhet të jetë piedestali më i rëndësishëm për të gjithë qytetarët”, thotë deklarata.

“Nuk duhet pasur kurrfarë iluzioni se zgjedhjet e lira dhe fer mund të garantohen përmes zgjidhjeve teknike. Në shoqëritë demokratike, zgjedhjet e lira dhe fer janë çështje e rëndësishme për çdo qytetarë, dhe varen pikësëpari nga angazhimi dhe vullneti politik. Komisioni Qendror Zgjedhor i Kosovës meriton përkrahjen e qytetarëve, përkrahjen nga institucionet e Qeveris të Kosovës, nga partitë politike të Kosovës, OJQ-të, dhe nga bashkësia ndërkombëtare, meqë është duke vazhduar angazhimin në organizimin e këtyre votimeve të rëndësishme.

Ne zotohemi se bashkësia ndërkombëtare do të kryen pjesën e punës së vet në përkrahje të Komisionit Qendror Zgjedhor për të organizuar zgjedhjet e lira dhe fer, duke përfshire edhe angazhimin e monitoruesve ndërkombëtar në votimet e 15 nëntorit”, thotë deklarata e përbashkët e ambasadorëve të shteteve që përbëjnë Quint’in dhe Përfaqëesuesit Civil Ndërkombëtar Pieter Feith.