Vetëvendosja garanton: Kjo është kontrata në vlerë prej 659 milionë euro

nga **Agim Gashi** Mon May 16, 2011 9:11 pm

Vetëvendosja garanton: Kjo është kontrata në vlerë prej 659 milionë euro

(I plotësuar)- Përderisa paradite në konferencë për media e ka bërë publike kontratën ndërmjet Qeverisë së Kosovës dhe konzorciumit “Bechtel&Enka” për autostradën Vërmicë-Merdare, në konferencën e pasdites, Lëvizja Vetëvendosje ka paraqitur detaje të kësaj kontrate dhe tashmë është e bindur qind për qind se kjo është kontrata origjinale, ani pse i mungojnë nënshkrimet.

Ekonomistët e kësaj lëvizje, Shpend Ahmeti e Besnik Bislimi edhe njëherë kanë paraqitur qëndrimin e Vetëvendosje për rrugën e kombit, duke thënë se Lëvizja Vetëvendosje e mbështetë ndërtimin e kësaj rruge, por kundërshton keqpërdorimit në emër të kombit.

Për kontratën të cilën paradite Albin Kurti e Visar Ymeri e kanë bërë publike, por nuk kanë folur me siguri të plotë nëse është origjinale, pasdite Shpend Ahmeti është shprehur i bindur se është ajo, edhe pse nuk ka nënshkrime, duke thënë se e kanë krahasuar me një tjetër kontratë me nënshkrime.

“Jemi të bindur se kjo është kontrata e fundit, sepse tanimë e kemi parë edhe një version me nënshkrime. Prandaj mendojmë se kjo kontrata 100 për qind ajo që është nënshkruar në fund me ‘Bechtel&Enka’”, ka thënë Ahmeti.

Sipas përfaqësuesve të Vetëvendosjes në kontratë është specifikuar në mënyrë fikse çmimi prej 659 milionë e 813 mijë e 400 euro e 39 centë, por ndërkohë në brendësi të kontratës nuk përfshihet asnjë çmim fiks.

Shpend Ahmeti ka thënë me këtë rast se edhe kursimet prej 350 milionëve që i përmend kryeministri nuk janë të qëndrueshme.

“Para disa javësh dëgjuam se do të ketë kursime 350 milionë euro. Nëse kontrata është 659 milionë, a do të thotë se kjo rrugë do të na kushtojë 300 milionë. Jo, sepse kryeministri vetë tha se do të na kushtojë diku rreth 700 milionë euro. Domethënë, sipas tij, 1 miliard paska kushtuar autostrada që pas këtyre kursime të kushtojë 700 milionë. Domethënë flasin me aq lehtësi për qindra miliona euro që janë aq të vlefshme për buxhetin e Kosovës, sa që kjo është marramendëse”, ka thënë Ahmeti.

Kurse, Besnik Bislimi është ndalur tek anët tjera të kontratës, duke paraqitur favorizime të ndryshme të kompanisë “Bechtel&Enka”.

“Në kuadër të çmimit parashihen edhe disa pagesa direkte në ‘Bechtel&Enka’. Për shembull ata marrin 40 milionë euro pagesë fillestare, vetëm për ta sjellur makinerinë e vetë në Kosovë. Pastaj për amortizimin e kësaj makinerie marrin për çdo muaj nga 1 milionë euro, pastaj marrin para për ta kthyer makinerinë në vendin e tyre, marrin para për t’i kthyer punëtorët që kanë punuar në Kosovë nëpër vendet e tyre. Do të thotë për çdo hap të punës ata marrin para prej Qeverisë së Kosovës”, ka thënë Bislimi.

Sipas tij, në bazë të tenderit parashihet që kompanitë ofertuese të ofrojnë edhe dizajnin e rrugës dhe kontos, por një gjë të tillë nuk e ka bërë ‘Bechtel&Enka’.

Ndërkaq një tjetër element që veçon Bislimi, është fakti se çmimet në kontratë vlejnë vetëm për tri vjet dhe nëse punimet vazhdojnë për më gjatë se tri vjet, në emër të inflacionit automatikisht të gjitha çmimet rriten për 12 për qind, pa bërë një analizë se sa mund të jetë inflacioni në këto tri vjet.

Po ashtu edhe proklamimin se kompania është e obliguar të punësojë staf lokal, Bislimi e quan farsë, ngase në kontratë sipas tij, kompania vetëm inkurajohet të pranojë staf lokal, por nuk obligohet dhe sipas tij, ky numër i punëtorëve lokalë do të jetë 1 mijë e 533, që do të arrihet në vitin 2012.

Me këtë rast, përfaqësuesit e Vetëvendosjes kanë krahasuar edhe çmimet për njësi, të cilat sipas kontratës, për “Bechtel&Enka” janë të panegociueshme.

“Betonin ne e paguajmë 180 euro për kub sipas kontratës, në treg mund të gjendet me 75 euro. Më shumë se dyfishi i tregut. Rëra paguhet me 26 euro sipas kontratës, në treg mund të gjendet 10 deri në 13 euro, pra dyfishi i asaj që është në treg. Nëse po duam ekonomi të tregut, së paku t’i marrim çmimet e tregut. Pse janë këto çmime të panegociueshme. Asfalti, shtresa e fundit paguhet me 117 euro për ton, ndërsa ne në treg mund ta gjejmë me çmimin nga 70 deri në 80 euro”, ka thënë Shpend Ahmeti.

Kontrata sipas Lëvizjes Vetëvendosje, është kopje e kontratës së Shqipërisë, ndërsa ata kanë paralajmëruar se do të analizojnë edhe më shumë bashkë edhe me ekspertë të tjerë për të nxjerrë detaje tjera të saj. Po ashtu ata kanë thënë se do të shohin mënyrën se si do ta ngrisin këtë çështje në Kuvendin e Kosovës.

Përfaqësuesit e Vetëvendosjes, kanë theksuar se publikimin e kësaj kontrate e bëjnë duke u bazuar në nenin 97 që paraqet përgjegjësinë e Qeverisë, në nenin 120 që thotë se shpenzimet publike dhe mbledhja e të hyrave, duhet të bazohet në parimet e llogaridhënies, efektshmërisë, efikasitetit dhe transparencës, në rregulloren e punës së Qeverisë dhe në vetë kontratën e nënshkruar.

* * * * * * *

Lëvizja Vetëvendosje ka njoftuar se ka zbuluar kontratën midis Qeverisë dhe kompanisë së angazhuar për ndërtimin e autostradës Vërmicë – Merdare, pjesë të së cilës deri më tash janë bërë publike në formë të pjesshme. Kjo Lëvizje pretendon se kontrata i është dërguar udhëheqësve të saj, Albin Kurtit dhe Visar Ymerit, nga persona të panjohur.

“Kontrata është e nënshkruar. Nënshkrimet nuk janë, por është kontratë që ka të bëjë me autostradën që e lidhë Merdarën me Morinën, me autostradën në Shqipëri dhe këtu janë logot edhe të korporatës “Bechtel&Enka” edhe të Qeverisë së Kosovës dhe në përmbajtjen e saj shihet se flitet për sektorët, ose segmentet që do të ndërtohen në Kosovë. Pra kjo kontratë është kontratë që e ka nënshkruar Qeveria e Kosovës me “Bechtel&Enka”. Mirëpo për ta verifikuar nëse saktësisht është kjo kontratë konsiderojmë se duhet ta pyesni Qeverinë që ta bëni një krahasim mes asaj që e ka Qeveria, të cilën nuk po e bën publike, me këtë kontratë”, ka thënë Visar Ymeri.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30