Baki Ymeri: Revistat rumune të vlerave shqiptare

nga **Agim Gashi** Tue May 24, 2011 12:46 am

Revistat rumune të vlerave shqiptare

Nga Baki Ymeri (Bukuresht)

Duke e analizuar vokacionin e miqësisë, konstatojmë se, pa marrë parasysh qëndrimet absurde të klasës politike rumune lidhur me pavarësinë e Kosovës (të Kosovës që ende nuk din të lobojë siç duhet në këtë vend), lexuesit, shkrimtarët dhe botuesit e revistave letrare bëjnë çmos për afirmimin e krijuesve tanë në shtypin letrar që del në mijëra ekzemplarë dhe lexohet nga dhjetramijë vetë në Internet. Kështu, “Oglinda literara” (Pasqyra letrare) e Fokshanit, në numrin e saj më të ri (maj 2011), në kuadrin e rubrikës “Poezie albaneza din Italia”, krahas fotografisë prezanton poemat e Adelina Dokjes Engjëj drite, Digjem nga malli, Diamanti i dhembjes, Pikojnë strehat e shtëpisë së vjetër. Adelina Dokja, përndryshe, defilon përmes reçensionit “Duke mbledhur fjalë me erëtimën e luleve”, të eseistit Marius Chelaru, edhe në faqet e revistës “Cronica” të Jashit (prill 2011), ndërsa një cikël poetik ia pat botuar kohë më parë edhe revista “Climate literare” e Tërgovishtes (mars 2011). Një revistë tjetër rumune që hap shtyllat për shpirtin shqiptar të krijuesve tanë, është “Revista noua”, botim i Klubit Letrar “Geo Bogza” në Këmpina. Në numrin e parë të saj (2011), botohet rumanisht fragmenti “Dita kur e sulmuan Likoshanin dhe Qirezin”, të shkëputur nga libri i Sanije Gashit “Historia e tmerrit, 1989-1999.

Dosja e krimeve të luftës, dëshmitë e grave”. Faktografia e krimeve serbe në Kosovë defilon edhe në revistën “Climate literare” (janar 2011), përmes rubrikës “Historia e tmerrit-një libër i gjallë”, ku jepen vlerësimet e Zonjës Madeline Albright me rastin e 10 vjetorit të bombardimeve të NATO-s, si dhe fjala e Bill Clintonit mbajtur më 23 nëntor 1999, lidhur me të njëjtin subjekt. Një revistë tjetër që vazhdimisht e prezanton kulturën shqiptare është e përmuajshmja

Ballina revistash rumune me vlera shqiptare

“Impact” e Tërgovishtes, e cila në numrin mars-prill 2011, ia kushton një faqe të tërë (format A3) Rizah Sheqirit nga Suedia, Adelina Dokjes nga Italia dhe Skënder Zogajt nga Kosova. Remzi Limani nga Kosova prezantohet kohëve të fundit në faqet e revistës “Dor de Dor” (Malli ndaj Mallit), Nexhat Rexhat, Kozeta Zylo, Merita Bajraktari McCocmack dhe Vilhelme Vranari Haxhiraj në “Revista noua”, ndërsa Sabile Keçmezi Basha, Sadik Krasniqi, Radije Hoxha, Liman Zogaj, Fatmir F. Salihu e disa tjerë në revistat “Impact”, “Climate literare”, “Cronica” dhe “Amurg sentimental”. Në këtë kontekst, pas disa ditësh i hap shtyllat për vlerat shqiptare edhe revista “Ardealul literar” (Transilvania letrare), pa e anashkaluar faktin se gjatë këtij viti lexuesit rumunë do kenë fatin t’i lexojnë edhe vlerat letrare të Hasan Qyqallës nga Gjermania, Lek Pervizit nga Belgjika etj.

Përveç revistave “Poezia” dhe “Carmina Balcanica”, kohëve të fundit i prezanton krijuesit rumunë dhe shqiptarë në gjuhën shqipe edhe revista “Provincia Corvina” që del në kryeqendrën e rrethit të Hunedoarës (Deva), e cila në numrin 4 të këtij viti jep një shkrim mbi lansimin e Dr. Xhelku Maksutit dhe Theodor Damianit në restorantin “Boema 33” të Bukureshtit, ndërsa revista “Impact” i ofron mikpritje në faqet e saj Fehmi Kelmendit nga Zvicra dhe librit të tij “Golgota kosovare”, si dhe poeteshës rumune Monica Mureshan me librin “Kosova letrare”, pa e harruar me këtë rast edhe librin më të ri të poetit dhe eseistit Mihai Antonescu, “Dardania e zemrës sime”. Një nga veprat e përkthyera të poetëve rumunë mban titullin “Shkallët” (Treptele), autor: Victor Sterom. Nuk e dimë në sintagma shqipe Trepça ndërlidhen me rumanishten (respektivisht trakishten Treapta (Shkallë), por e dimë mendimin e poetit Gheorghe Neagu, i cili në paskopertinën e revistës “Oglinda literara”, thekson: “Sa mirë dhe sa të rralla janë miqësitë letrare. E bëj këtë pohim duke patur parasysh faktin se ky vëllim, del në dritë fakë përkthimit në gjuhën shqipe të Baki Ymerit, i ndodhur në një grup penash bukureshtare që përkrahen reciprokisht për botimin e disa vëllimeve të cilësisë së mirë.” Përfundimisht vlen të përmendet edhe botimi bilingv i numrit të fundit të revistës “Shqiptari”, kushtuar poeteshës rumune Florica Bud dhe vëllimeve të saja: “Glina joshëse” dhe “Flamuri i dëshirave”.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30