Ambasadorët e SHBA-së, OSBE-së dhe BE-së bëjnë thirrje për qetësi

nga **Agim Gashi** Sun Jun 05, 2011 11:34 pm

Ambasadorët e SHBA-së, OSBE-së dhe BE-së bëjnë thirrje për qetësi

Kryetari i Prezencës së OSBE-së në Shqipëri, Ambasadori Eugen Wollfarth, Ambasadori i Shteteve të Bashkuara të Amerikës (SHBA), Alexander Arvizu dhe Kreu i Delegacionit të Bashkimit Evropian (BE), Ambasadori Ettore Sequi, dolën sot me një deklaratë të përbashkët për publikun shqiptar mbi procesin zgjedhor në Shqipëri.

Ata reagojnë mbi precipitimin e zhvillimeve elektorale pas shpalljes së vendimit të premten nga Kolegji Zgjedhor i cili rrëzoi kërkesën e PS. “U njohëm me vendimin e Kolegjit Zgjedhor shqiptar, si organi më i lartë ligjor që gjykon apelimet zgjedhore. Është thelbësore që të gjitha palët të veprojnë, pas këtij vendimi, në mënyrë të qetë, të pjekur e të përmbajtur, duke vënë interesin kombëtar përpara çdo lloj interesi partizan vetjak”, thuhet në deklaratën e përbashkët.

Po aq e rëndësishme është që të gjitha palët, partitë politike dhe qytetarët, të presin derisa rezultatet përfundimtare të këtyre zgjedhjeve të certifikohen nga Komisioni Qendror i Zgjedhjeve, siç kërkohet nga legjislacioni shqiptar, – vijon deklarata.

Kurse më tej jepet mesazhi: “Ne besojmë se më 8 maj, qytetarët e Shqipërisë votuan për kandidatët e zgjedhur prej tyre. Ky zë tashmë duhet të dëgjohet dhe të respektohet nga të gjitha partitë politike”.

Në fund, deklarata e përbashkët mbyllet me “paralajmërimin”: “Ne do të ndjekim nga afër përmbylljen e procesit zgjedhor dhe shpalljen e rezultateve përfundimtare, si dhe vlerësimin e procesit nga misioni i vëzhgimit të zgjedhjeve i OSBE/ODIHR-it, duke pasur parasysh shqetësimet e ngritura në deklaratat tona të mëparshme”.

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30