Akademi përkujtimore për dëshmorin Agim Rashiti

Akademi përkujtimore për dëshmorin Agim Rashiti







Vepra e dëshmorit Agim Rashiti dhe e gjithë dëshmorëve e martirëve tjerë, të rënë në të gjitha kohërat, janë vepra për t’u respektuar dhe përkujtuar përherë me pietet dhe krenari, u tha në akademinë përkujtimore në 20 vjetorin e rënies së dëshmorit të kombit Agim Rashiti.
Qemajl Mustafa, kryetar i komunës së Gjilanit tha të premten se në kohën kur shteti serb ishte vërsulur me të gjitha mjetet mbi Kosovën, populli i Kosovës ishte ngritur në këmbë në mbrojtje.
“Agimi, atëbotë, tash e njëzet vjet më parë, me vrullin e tij rinor, guximin e trimërinë prej burri, po shquhej për shpërthim të mllefit kundër dhunës serbe në demonstratat e marsit të vitit 1989, në Gjilan por jo vetëm këtu”, ka thënë Mustafa.
Mustafa tha se vrasja e Agimit, nga policia serbe, në rrugën e Ferizajt, mu para spitalit, nuk ishte rastësi, sepse ai si sportist që ishte, dallohej nga demonstruesit tjerë dhe në të regjimi shihte njeriun e Kosovës që nuk do të përulej.
Ai tha se ishte lufta e lavdishme e Ushtrisë Çlirimtare të Kosovës, me aleatët e saj, që i dha vulën e fundit çlirimit dhe lirisë së Kosovës.
Ismet Sylejmani, njëri nga organizatorët e demonstratave të atëhershme, ka evokuar kujtime për dëshmorin Agim Rashiti, duke thënë se rënia e tij ka qenë goditje e rëndë, por në anën tjetër ishte mobilizim i madh për të vazhduar tutje rrugën e lavdishme të heronjve të mëdhenj.
Sylejmani nga institucionet relevante të komunës ka kërkuar që dëshmori Rashiti dhe disa të tjerë si Zija Shemsiu, Rexhep Elmazi dhe Reshat Ymeri të njihen zyrtarisht dëshmor të kombit.
Po ashtu nga kryetari i komunës dhe Shoqatat e dala nga lufta e UÇK-së, kanë kërkuar që eshtrat e këtyre dëshmorëve të prehen në varrezat e dëshmorëve të qytetit në Gjilan.
Edhe Ahmet Isufi, ish komandant i Zonës Operative të Karadakut, tha se është arrit dita që ideali i Agimit të jetësohet, sepse sot kemi shtetin që e deshi ai.
Ndërsa, vajza e Agim Rashitit, Majlinda tha se ndihet e emocionuar kur kujtohet rënia heroike e babait të saj të dashur.
“Ende nuk i kisha mbushur tri vjet kur e vranë, vetëm pse ishte shqiptar. Unë mbeta pa babin tim të dashur, mirëpo gjaku i martirëve dhe babait tim kanë mundësuar që ne sot të gëzojmë këtë liri”, ka thënë ajo.
Këtë përkujtim e kanë përshëndetur edhe Ahmet Daku, kryetar i Shoqatave të dala nga lufta e UÇK-së, Muhamet Halili përfaqësues nga klubi i boksit “Drita”, (Agimi ishte i njohur si sportistë përkatësisht si boksier i suksesshëm.) dhe të pranishëm të tjerë./KP/