Prishtinë: Vetëvendosje protestoi kundër Qeverisë Thaçi

nga **Agim Gashi** Wed Jun 22, 2011 8:01 pm

Prishtinë: Vetëvendosje protestoi kundër Qeverisë Thaçi

(I plotësuar) - Protesta paqësore e Lëvizjes Vetëvendosje me moton “Kundër hajnisë”, mblodhi të mërkurën mijëra protestues në qendër të Prishtinës. Përfaqësues të Vetëvendosjes akuzuan serish krerët e Qeverisë së Kosovës se janë ata që kanë vjedhur votat për të vjedhur para. Protesta ka përfunduar e qetë dhe pa incidente.

Ashtu sikur ishte paralajmëruar, protestuesit kanë nisur në mesditë marshin nga Biblioteka Kombëtare dhe Universitare e Kosovës. Protestuesit mbanin në duar pankarta si “Kundër hajnisë”, “Kjo qeveri i ka hipur skijave”, “Qeveria ka tri: hajninë, tradhtinë, pasurinë”.

Ata kanë marshuar drejt bulevardit “Nënë Tereza”, duke u ndalur përpara Teatrit Kombëtar ku montuan binën të cilën ia kishin hequr Policia e Kosovës orë më parë.

Protestuesve me një fjalë rasti iu drejtuar aktivisti i “Vetëvendosjes”, Shpend Ahmeti, i cili deklaroi se Kosova sot është vendi më varfër në Evropë, ku më shumë se gjysma e qytetarëve u mungon buka e gojës, por po ashtu është vendi me korrupsionin dhe hajninë më të madhe në Evropë dhe për këtë kanë faj ata që po krenohen me këto hajni.

“Sot kemi ardhur këtu t’i tregojmë kësaj qeverie se kjo hajni nuk do të tolerohet, kemi ardhur t’i themi se interesin e qytetarëve nuk do të lejojmë që të shpërfillet dhe posaçërisht t’i themi që nuk është kjo Kosova për të cilën kanë sakrifikuar gjeneratat të tëra”, ka thënë Ahmeti.

Aktivistët e Vetëvendosjes në shenjë simbolike kanë paraqitur një balonë me emrin e foton e kryeministrit Hashim Thaçi i cili sipas tyre “fryhet nga hajnia dhe kursimet”.

Lideri i Vetëvendosjes, Albin Kurti ka deklaruar se ky pushtet e ka vjedhur shtetin dhe duhet që shtetin ta çlirojmë prej këtij pushteti.

“Këta pushtetarë i kanë vjedhur votat, për të vjedhur pare, për të vjedhur vota që të vjedhin edhe më shumë pare. Ashtu siç po shpërthejnë këta balona do të shpërthejmë edhe hajnin prej institucioneve dhe t’i eliminojmë hajnat prej politikës”, ka thënë Kurti.

* * * * * * *

Policia e Kosovës largoi podiumin e Vetëvendosjes para Qeverisë

Prishtinë: Vetëvendosje protestoi kundër Qeverisë Thaçi Policia-bina

Prishtinë: Vetëvendosje protestoi kundër Qeverisë Thaçi Policia-bina

Policia e Kosovës (PK) ka ndërhyrë për të larguar podiumin e vendosur pranë ndërtesës së Qeverisë, ku kishin paraparë të mbanin fjalimet drejtues të Lëvizjes Vetëvendosje me rastin e protestës me moton “Protesto kundër hajnisë”, që pritet të fillojë sot në orën 12:00.

Ndërhyrja e policisë ka shkaktuar konfrontim me aktivistë të Vetëvendosjes, i cili ishte më shumë verbal, ngase ata synonin të “mbronin” podiumin që kishin vendosur pranë ndërtesës së Qeverisë te shtatorja e Skënderbeut.

Njëri nga drejtuesit e Vetëvendosjes, Shpend Ahmeti, heqjen e foltores nga ana e policisë e ka cilësuar një provokim të lehtë nga të Qeverisë për të penguar protestën, duke shtuar se kjo nuk do ta ndalë protestën e Vetëvendosjes kundër hajnisë.

“Mendoj se është tentim i tyre që mos të na lënë të flasim, por kjo në asnjë mënyrë nuk e ndalon protestën. Natyrisht ne mund të improvizojmë, të gjejmë vende të tjera të flasim, t’i themi ato gjëra që kemi pasur ndërmend t’i themi. Protesta është paqësore dhe do të vazhdojë si paqësore”, tha ai.

Ahmeti ka bërë të ditur se protesta është paralajmëruar në polici, e cila është njoftuar edhe me itinerarin e saj, mirëpo nuk ka saktësuar nëse kanë marrë leje nga policia për vendin dhe kohën e mbajtjes të saj.

Ndryshe, protesta e Vetëvendosjes “Protesto kundër hajnisë” do të fillojë në ora 12:00 nga Biblioteka Kombëtare për të vazhduar nëpër sheshin Nëna Terezë për të përfunduar te ndërtesa e Qeverisë. Për këtë protestë, Vetëvendosje ka organizuar transport falas për të interesuarit nga qytetet e tjera.

* * * * * * *

Vetëvendosje proteston sot me moton “Kundër Hajnisë”

Lëvizja Vetëvendosje organizon sot protestë me fillim nga ora 12 duke u nisur nga Biblioteka Kombëtare drejt ndërtesës së qeverisë së Kosovës, me moton “kundër hajnisë”.

Vetëvendosje thotë se protesta organizohet për “manipulimin me tenderë, shitjen e ndërmarrjeve publike dhe marrëveshjet e paralajmëruara me Serbinë, për vjedhjen e territorit të Kosovës”.

Lëvizja Vetëvendosje beson se mijëra njerëz priten të mblidhen, të cilët do të nxjerrin jashtë xhepat e tyre si simbol i varfërisë së qytetarëve kosovarë, për shkak të hajnisë së pushtetit.

>> Kurti: Protesta do të jetë e qetë >> Komente (35)

>> Vetëvendosje vazhdon thirrjet për protestën e 22 qershorit >> Komente (79)

>> Vetëvendosja e quan Qeverinë, kabinet qeveritar me yje të turpit >> Komente (113)

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30