Kosharja, simbol i bashkimit të shqiptarëve

nga **Agim Gashi** Mon Aug 15, 2011 8:53 pm

Kosharja, simbol i bashkimit të shqiptarëve

Muharrem Sfarqa

Veprimtarët e degës së LDK-së në Gjermani vazhdojnë vizitat dhe nderimet në Kosovë

Kosharja, simbol i bashkimit të shqiptarëve 10anash%20poshte

Veprimtarët e mërgatës të organizuar në strukturat e LDK-së në Gjermani, po vazhdojnë aktivitetin e tyre në Kosovë, me vizita dhe nderime nëpër vende që simbolizojnë krenarinë dhe dinjitetin e shqiptarëve.

Fillimisht ata vizituan degën e LDK-së në Deçan, ku u pritën nga Armend Zemaj, kryetar i saj dhe deputet në Kuvendin e Republikës së Kosovës. Delegacionin e degës së LDK-së të Gjermanisë i cili kryesohej nga Qazim Bajgoraliu kryetar, z. Zemaj e njoftoi për aktivitetin e degës së LDK të Deçanit, e cila po reformohet, strukturohet dhe po përgatitet për ta kthyer traditën e saj të udhëheqjes dhe zhvillimit të kësaj komune të Kosovës, sipas vizionit rugovian për një Kosovë euro – atlantike.

Kryetari Zemaj një vëmendje të veçantë i kushtoi edhe kthimit të veprimtarëve të LDK-së në shtëpinë e tyre të vjetër, si në rastin e tyre ku u inkorporuan në kryesinë e kësaj dege një numër veprimtarësh të dëshmuar, me të cilët do të vazhdojnë shembullin e unifikimit të kësaj force të qendrës së djathtë politike, për të mirën e LDK-së dhe të Kosovës.

Në cilësinë e të zgjedhurit të popullit, deputeti më aktiv i Kuvendit të Kosovës ( sipas sondazheve të fundit), z. Zemaj foli edhe për rolin konstruktiv të grupit parlamentar të LDK-së, të cilët në paraqitjet dhe sjelljet e tyre po dëshmojnë profesionalizëm dhe pjekuri politike duke dëshmuar se pavarësisht pozicionit momental, ata mbrojnë fuqishëm interesat e shtetit.

Të shoqëruar nga veprimtarë të LDK-së së kësaj komune, përfaqësuesit e mërgimtarëve tanë nga Gjermania, bënë homazhe dhe vendosën buqeta lulesh të freskëta, pranë varreve të dëshmorëve të kësaj ane, kolonel Tahir Zemajt, Rrustem Bruqit dhe Sali Çekajt.

Pranë përmendores së Sali Çekajt në Deçan, evokoi kujtime bashkëluftëtari i Sali Çekajt, kolonel Adem Dahri, nga Shqipëria.

Këta tre emra të nderuar të kombit, një kohë të gjatë ishin të organizuar në struktura institucionale të Qeverisë sonë në ekzil dhe ishin përkrahës, por edhe veprimtarë të LDK-së dhe vizionit rugovian për Kosovën.

Vizitës së veprimtarëve të LDK-së nga Gjermania në kompleksin e varrezave të të rënëve në Koshare, iu bashkuan edhe familjarë të shumtë të familjeve të dëshmorëve të kësaj ane.

Homazhet dhe vendosja e kurorave me lule, në shenjë nderimi dhe përkujtimi për aktin e tyre sublim ngjalli emocione po edhe krenari kombëtare. Në ballë të këtij kompleksi, qëndronin varret e të përndritshmëve tanë, Sali Çekaj e Agim Ramadani, të cilët braktisën mërgimin dhe bashkuan dijen e pushkën për lirinë e Kosovës.

Me fitoren historike në Betejën e Koshares, ata e kthyen këtë pjesë shqiptare në simbol bashkimi duke shkulur gurët dhe rrënuar kufirin që ndante shqiptarët.

Gjatë qëndrimit në Koshare veprimtarët tanë patën edhe një takim spontan e të shkurtër, por shumë të ngrohtë me pjesëtarë të FSK-së së Kosovës, të cilët merreshin me pastrimin e zonave të minuara nga lufta e fundit, disa nga të cilët ishin bashkëluftëtarë të këtyre heronjve të kombit.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30