Thaçi: Plani për veriun po implementohet me sukses

nga **Agim Gashi** Fri Sep 16, 2011 4:55 pm

Thaçi: Plani për veriun po implementohet me sukses

Kryeministri i Kosovës Hashim Thaçi ka njoftuar për fillimin e implementimit të planit operacional të Qeverisë së Kosovës për respektimin e marrëveshjes për vulat doganore në pikat kufitare 1 dhe 31. Ai ka thënë se ky ishte një fillim i suksesshëm për vendosjen e rendit dhe ligjit në këtë pjesë të vendit.

Këto komente, kryeministri Thaçi i bëri të premten para kabinetit qeveritar, në një mbledhje të jashtëzakonshme, në të cilën pikë e vetme e rendit të ditës ishte informimi për fillimin e zbatimit të planit operacional në veri.

“Ju njoftoj se sot në orët e mëngjesit ka filluar implementimi i planit operacional të Qeverisë së Kosovës për respektimin e marrëveshjes për vulat doganore në 1 dhe 31. Edhe pikat doganore 1 dhe 31 do të funksionojnë si të gjitha pikat tjera kufitare me rregullat e njëjta. Pra procesi i implementimit të planit ka filluar me sukses në mëngjes. Doganierët dhe Policia e Kosovës bashkë me atë të EULEX dhe KFOR tashmë janë në dy pikat kufitare. Unë edhe njëherë i ftoj gjithë qytetarët për qetësi dhe maturi dhe të kenë besim të plotë në institucionet e Republikës së Kosovës, të kenë besim të plotë në partneritetin e institucioneve të Kosovës me ato ndërkombëtare, EULEX-in, NATO-n, me mbështetjen e plotë të Quintit, të shteteve të BE-së dhe SHBA-së”, ka thënë Thaçi.

Ai ka shprehur gatishmërinë e Qeverisë së Kosovës për përmbushjen e detyrimeve për rend dhe ligj me veprime të cilat nuk kanë qenë dhe nuk janë të drejtuara ndaj asnjë grupi etnik, por përkundrazi kanë për qëllim ofrimin e sigurisë dhe lirisë së barabartë për të gjithë pa dallime etnike.

Kreu i ekzekutivit të vendit ka ftuar Beogradin që përfundimisht të heq dorë nga përpjekjet destabilizuese dhe të pranojë se Kosova është e pavarur, sovrane, një dhe e pandarë.

“Po ashtu mesazh për qytetarët në veri, me mesazhin e bashkëpunimit, ofrimit, mirëkuptimit, tolerancës ndëretnike, mesazhin e Qeverisë për bashkëpunim. Ne do të jemi në krye të përgjegjësive për rend dhe ligj, për particim në jetën politike që të ketë zgjedhje të lira, që të ketë edhe atje investime socio-ekonomike. Partneriteti është çelësi i suksesit e jo barrikadat”, është shprehur Thaçi.

Ai ka falënderuar më tej KFOR-in, EULEX-in dhe vendet e Quintit, për mbështetjen e tyre për planin operacional të Qeverisë së Kosovës për vënien e kontrollit në pikat kufitare 1 dhe 31.

“Vendosja e rendit dhe ligjit në veri është tashmë objektivë e jona e përbashkët, dhe unë jam i bindur se bashkërisht do t’ia dalim të ndërtojmë Kosovën e re, Kosovën demokratike, Kosovën e shoqërisë multietnike, të shoqërisë së zhvilluar, Kosovën e zhvillimit ekonomik, rritjes së mirëqenies për të gjithë qytetarët e Republikës së Kosovës”, ka theksuar Thaçi.

Po ashtu, ai ka falënderuar edhe Këshillin e Ministrave të Bosnjë Hercegovinës për vendimin për njohjen e vulave doganore të Republikës së Kosovës, duke shprehur gatishmërinë për krijimin e marrëdhënieve të mira ndërshtetërore dhe në një të ardhme të afërt edhe për njohjen e Republikës së Kosovës nga Bosnja.

>> Kosovë, nis operacioni në Veri >>Komente (132)

>> Thaçi: Ne nuk do të zbrapsemi >> Komente (34)

>> Rasmusen: KFOR-i do të reagojë >> Komente (34)

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30