Shqiptarët e veriut të Mitrovicës kërkojnë masa shtesë të sigurisë

nga **Agim Gashi** Wed Sep 21, 2011 6:50 pm

Shqiptarët e veriut të Mitrovicës kërkojnë masa shtesë të sigurisë

Për shkak të gjendjes së krijuar në veri pas bllokadave nga ana e serbëve të rebeluar, shqiptarët e veriut të Mitrovicës kanë kërkuar shtimin e masave të sigurisë në lagjet veriore të qytetit.

Kryetari i Komunës, Avni Kastrati, ka biseduar të mërkurën në ambientet e Kuvendit të Komunës për problemet aktuale të shqiptarëve që jetojnë në lagjet veriore të qytetit, më drejtuesit e OJQ “Bregu i Veriut”.
Kryetari i OJQ-së “Bregu i Veriut”, Musa Miftari, tha se pas letrës së hapur që drejtuesit e OJQ-së ua kanë dërguar institucioneve lokale, atyre më të larta të vendit dhe EULEX-it, e kanë parë si shumë të nevojshëm takimin edhe me kryetarin Kastrati, për të biseduar për zgjidhjen e problemeve.
Miftari potencoi se kërkesë e shqiptarëve të të gjitha lagjeve veriore është që të vendosen menjëherë pika statike të policëve të Kosovës, EULEX-it apo të KFOR-it, në vendet më strategjike të lagjeve veriore me popullatë të përzier etnike.
Përveç kësaj, ai kërkoi që patrullat policore të jenë më të shpeshta në brendi të lagjeve të tyre dhe që ato domosdoshmëri të jenë multietnike, e jo sikur që po ndodh në të shumtën e rasteve, të jenë të përbëra vetëm nga policët serbë.
“Me realizimin e këtyre kërkesave do të ndiheshim të gjithë më të sigurt, do të pamundësohej sorollatja e keqbërësve nëpër lagje dhe do të përmirësoheshin raportet ndëretnike në lagje. Ndërmarrja e këtyre masave do të ndikonte që në këto lagje të kthehen pa hezituar edhe të gjithë ata që me dhunë janë zhvendosur nga lagjet”, ka thënë Miftari.
Përfaqësuesit tjerë të lagjeve veriore, thanë se janë të vendosur për të mos i lëshuar pronat e tyre, përkundër problemeve tjera të shumta që familjeve të tyre ua shkaktojnë ekstremistët serbë dhe bandat e ndryshme kriminale serbe, vetëm pse janë shqiptarë.
Ata kërkuan edhe kësaj radhe që të vazhdohen punët në rindërtimin e shtëpive shqiptare të filluara dhe atyre që ende nuk kanë filluar, në mënyrë që njerëzit mos t’i humbin shpresat dhe dekurajohen për kthim në pronat e tyre në veri të qytetit.
Kastrati tha se i kupton plotësisht problemet me të cilat shqiptarët e lagjeve veriore po ballafaqohen në jetën e përditshme dhe se në veçanti e shqetësojnë problemet e sigurisë që vazhdimisht janë të pranishme nëpër ato lagje.
Ai premtoi se do t’i takojë drejtuesit e policisë dhe ata të institucioneve për të kërkuar realizmin e kërkesave që u shtruan në bisedë, e për të cilat është i mendimit se mund realizohen pa asnjë problem.
Lidhur me kërkesat tjera, kryetari Kastrati tha se komuna po bën gjithçka që është e mundur që shqiptarët që jetojnë në lagjet veriore të ndihmohen, me qëllim që të kenë sa më pak telashe për të bërë një jetë normale.
Për sa i përket rindërtimit të shtëpive në veri, ai tha se po pret që të arrijnë mjetet e premtuara nga Qeveria e Kosovës për të vazhduar këtë proces tejet të rëndësishëm.

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30