Topi i kundërpërgjigjet Berishës

nga **Agim Gashi** Mon Dec 26, 2011 9:47 pm

Topi i kundërpërgjigjet Berishës

Një ditë pasi kryeministri i Shqipërisë, Sali Berisha, e akuzoi se e ka shndërruar selinë e Presidencës së Shqipërisë në një partiçkë për interesat e tij politike, presidenti i Republikës së Shqipërisë, Bamir Topi kundërpërgjigjet nga Durrësi duke deklaruar se ai nuk është apendiks i askujt, apo thënë shkurt një shtojcë politike.

Pas vizitës së tij në Bashkitë e Kavajës dhe të Durrësit, që drejtohen përkatësisht nga kryebashkiakët socialistë Elvis Roshi dhe Vangjush Dako, ku ka bërë thirrje për më shumë bashkëpunim mes qeverisë qendrore dhe atyre lokale, Kreu i Shtetit theksoi se “deklaratat e politikanëve duhet të jenë në kohezion me çfarë urojnë në mëngjesin e festës së Krishtlindjes, pra dialog e komunikim”.

Presidenti Topi në një prononcim për mediet i pyetur për akuzat e mbrëmshme të kryeministrit se po cenon institucionin me ambicien politike deklaroi prerë se ai do të ketë si bibël në punën e tij vetëm Kushtetutën e vendit dhe se nuk do të përmbushë në asnjë moment orekset e partive politike.

“Pavarësisht nga sa thuhen unë jam në detyrën time kushtetuese dhe institucioni i Presidentit do të zbatojë vetëm Kushtetutën e vendit, dhe kurrsesi nuk mund të jetë apendiks i orekseve të partive politike”, u shpreh Topi.

I pyetur nëse do të rikandidojë, Topi deklaroi se “do të sfidoj këdo nëse do të ketë garë për President nga populli”.

Në këtë mënyrë Kreu i Shtetit përforcon kërkesën për ndryshime kushtetuese, dhe zgjedhjen e Presidentit me referendum popullor, që do të hidhte dorazi poshtë edhe marrëveshjen e bërë PD-PS në vitin 2008, që vuri në jetë zgjedhjen e Presidentit me 50+1 vota, pra me shumicë të thjeshtë, jo të cilësuar.

Por, sa i përket zgjedhjes së Presidentit nga populli që përkthehet në ndryshimin e Kushtetutës, kryeministri tha prerë se zgjedhja e Presidentit të ardhshëm pas mbarimit të mandatit të Presidentit Topi do të bëhet sipas Kushtetutës, duke refuzuar kërkesën e kreut të PS-së për një emër konsensual të propozuar me pranimin e PD-PS.

Berisha u shpreh se ndryshimet kushtetuese të bëra me pëlqimin e kryesocialistit Edi Rama, garantojnë zgjidhjen e kreut të shtetit pa kaluar vendin në ngërç dhe në zgjedhje.

“Ky vend nuk mund të bëhet nëse nuk konsolidon Kushtetutën e tij. Me z. Rama ne ramë dakord që presidenti të zgjidhje 50 +1 vota, çka i dha mundësinë Kushtetutës të funksionojë, sepse përndryshe vendi do të shkonte në zgjidhje. Tani kërkohet të rikthehemi të ai varianti grek që e çoi Greqinë në zgjedhje”, tha Berisha.

Berisha tha se presidenti Topi bëri me dije mosrikandidimin pasi mësoi se PD nuk do e rikandidonte në këtë post për herë të dytë.

Berisha e akuzoi presidentin Topi se “gjatë detyrës së tij ka ndërmarrë një seri aktesh, të papajtueshme me programin e PD-së, duke shkelur parimet e mëdha programore të saj dhe faktikisht po dekonstitucionalizon institucionin e presidencës, duke e shndërruar në selinë e një partiçke të vogël”, tha Berisha.

Po kështu, kreu i qeverisë, tha se implikimi i Topit në ngjarjet e 21 janarit dhe një seri qëndrimesh të tjera, në mënyrë absolute pa asnjë bazë, bënë që ai të shkelte besimin dhe mirëbesimin e mazhorancës së djathtë që e përzgjodhi në krye të shtetit në vitin 2007.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30