Lajme nga komuna e Lipjanit

Prapë ndërhyn Buja




Kuvendi Komunal i Lipjanit ka ngritur taksat e atyre që bëjnë transportin e udhëtarëve nga Aeroporti i Prishtinës në 20 000 euro nga 7000 euro, si edhe ato për eksploatimin e xehes së nikelit. Zyrtarët të avio-kompanive thonë se këtë çmim e paguajnë udhëtarët

Nga Tinka Kurti më 15.04.2009 në ora 10:32

Kompanive ajrore iu është shtuar edhe një ngarkesë në pagesa. Këtë e ka vendosur Kuvendi i Komunës së Lipjanit dhe e ka nënshkruar kryetari i tij, Shukri Buja. Që të veprojnë këto kompani duhet të paguajnë 20 mijë euro taksë për punë në hapësirat e kësaj komune e jo 7 mijë si kanë paguar më parë.

Përderisa udhëheqësit e këtyre kompanive janë të shqetësuar se kjo pagesë shtesë do t’i dëmtojë pasagjerët, përkatësisht ndikon në ngritjen e çmimit të biletës, Buja thotë se kompanitë kanë fitim të madh dhe kjo shifër e caktuar është shumë e arsyeshme.

“Është e arsyeshme pse kemi ngritur nivelin e taksës për marrje të punës së agjensioneve transportuese të udhëtarëve në 20 mijë euro”, shpjegoi Buja për Express.

Para se të merrej ky vendim, për të siguruar leje pune, këtyre kompanive iu është dashur të paguajnë vetëm 7 mijë euro

Pronari i agjencisë turistike “Kosova Airlines”, Ramzi Ejupi është shprehur i shqetësuar pasi që këtë haraç do ta paguajnë udhëtarët. Ai shpjegoi se për shkak të kësaj do të shtrenjtohen buletat. Por, thotë se janë të detyruar ta pranojnë çfarëdo takse që t’iu vihet.

“Ne jemi të detyruar ta pranojmë çfarëdo takse, por në fund këtë do ta paguajnë konsumatorët. Kjo do të ndikojë në rritjen e çmimit të biletës”, tha Ejupi për gazetën.

Remzi Ejupi është mësuar me taksa të panevojshme.

“Nuk jam i befasuar me asnjë taksë që mund të paraqitet. Në secilin mëngjes mund ta dëgjojmë ndonjë të re. Pasi që këtë e bënë Lipjani, nuk do të befasohem poqe se taksë kërkojnë edhe fshatarët e Miradisë, të Sllatinës apo të Vrellës ”, tha Ejupi.

Ndërkaq, sipas Bujës, vendimi është marrë në pajtim me ligjin. “Taksat paguhen me rastin e marrjes së lejes dhe ato bëhen në baza vjetore për vitin kalendarik”, thuhet në këtë rregullore e KK të Lipjanit të miratuar në dhjetor të vitit të kaluar.
Në këtë rregullore precizohet se veprimtaritë afariste të industrisë nxjerrëse, asaj të nikelit si dhe transportit të rregullt ajror për të siguruar leje pune do të paguajnë nga 20 mijë euro.

“Ne e kemi marrë këtë vendim në bazë të rregullores për taksat. Tarifat dhe gjobat komunale” tha Buja.

Kjo rregullore ka hyrë në fuqi në janar të këtij viti duke e shfuqizuar rregulloren e vitit 2007. Sipas Bujës, vënia e taksës është e arsyeshme sepse këto kompani kanë qarkullim dhe fitim të madh.

“Duke pasur parasysh qarkullimin që bëjnë kompanitë, natyrisht se kjo taksë do të jetë e arsyeshme për to”, tha Buja.

Shukri Buja ditë më parë kishte intervenuar në operimet brenda territorit të Aeroportit Ndërkombëtar “Prishtina” duke e caktuar se aty mund të punojnë vetëm taksistët që janë të regjistruar në administratën e Komunës së Lipjanit.