Morina: kemi dështuar!

Morina: kemi dështuar!

Shqipe Osmani
Institucionet e Kosovës nuk i paguajnë vetëm policët serb pa e njohur sistemin e sigurisë. Buxheti i varfër mjafton për të paguar edhe mjekët serb, që veprojnë paralelisht sistemit të shëndetësisë së Kosovës.



“Ne kemi pasur kohë qe 9 vjet të punojmë për integrimin e këtij sistemi, kemi dështuar dhe tani kjo çështje është e rregulluar në aspektin juridik të funksionimit të sistemit shëndetësor me pakon Ahtisari ku komuna vendos për sistemin shëndetësor”, thotë Morina

Prishtinë, prill - Pavarësisht faktit se Kosova prej më shumë se një viti është shtet i pavarur dhe e ka Kushtetutën e saj, shumë sfera kanë mbetur jashtë kontrollit të shtetit. Edhe në shëndetësi funksionojnë dy sisteme paralele shëndetësore, përveç atij të Kosovës edhe i Serbisë, ndërsa shumë nga mjekët serb marrin nga dy paga. Institucionet e Kosovës vlerësojnë të jenë të përkushtuara, që sistemi shëndetësor në gjithë Kosovën të jetë unik, por kjo nuk është bërë ende për faktin se me unifikimin e sistemit shëndetësorë, është i lidhur edhe funksionimi i procesit të decentralizimit si dhe funksionimi i sistemit informativ, dhe atij të sigurimeve shëndetësore. Në anën tjetër kjo situatë mbase iu shkon për shtati punëtorëve shëndetësor serb, të cilët marrin paga të dyfishta. Këtë funksionim të dy sistemeve shëndetësore e kritikon opozita, e cila lë vend për kritikë në qasjen e qeverisë për unifikimin e sistemit shëndetësor.
Sistemi shqetësim për të gjithë
Skënder Berisha këshilltar për media i ministrit Alush Gashi, thotë se Ministria e Shëndetësisë është e përkushtuar që në gjithë territorin e Kosovës të ketë një sistem unik të bazuar në ligjet që dalin nga Kushtetuta e Kosovës. Ai nuk mohon faktin se punonjësit serb nuk i përgjigjen këtyre ligjeve edhe pse paga marrin nga institucionet e Kosovës. Berisha vë në pah se problem në vete për krijimin e një sistemi unik është mos vullneti i punonjësve serb për integrim. Megjithatë, Berisha mendon se një fakt i tillë nuk i pengon institucionet që të jenë të përgjegjshme kundrejt ligjeve në fuqi për të avancuar sistemin shëndetësor në veri të Mitrovicës dhe në enklavat serbe. Ai shprehet i bindur se me përkushtimin e institucioneve sistemi shëndetësor në Kosovë, do të jetë unik në gjithë territorin.
Rita Hajzeraj (AKR) nënkryetare e Komisionit Kuvendar për Shëndetësi dhe Mirëqenie Sociale, thotë se mos krijimi i një sistemi unik shëndetësor në Kosovë është një shqetësim i madh, i të gjithëve. “Unë shoh një pengesë shumë të madhe për ecjen përpara për integrimin e gjithë shoqërisë në ato vende ku janë dy sisteme. Fillimisht problemi qëndron në procesin e decentralizimit, që në fakt me këtë proces disa kompetenca do t’u mbesin vetëm komunave dhe nuk do t’i përgjigjen Ministrisë së Shëndetësisë drejtpërdrejt”, është shprehur Hajzeraj. “Neglizhenca e qeverisë po ndikon, që funksionimi i dy sistemeve paralele të vazhdojë edhe në këtë kohë kur jemi shtet i pavarur dhe kemi Kushtetutën tonë”, thotë Hajzeraj. Ajo mbase e sheh problemin e decentralizimit si element kyç në krijimin e sistemit unik shëndetësor në tërë territorin e Kosovës.
Qeveria të rezistojë ndaj “tekeve” serbe
Hyrishahe Hulaj, deputete e LDK-së, thotë se derisa ekzistojnë ligjet e shtetit të Kosovës të gjithë duhet t’i respektojnë. “Ligjet e Kosovës duhet t’i respektojnë të gjithë, edhe qytetarët serb që jetojnë në enklava”, thotë Hulaj duke theksuar kështu se problemi i integrimit të punëtorëve shëndetësorë në sistemin e Kosovë është kompetencë e qeverisë, e cila sipas saj duhet të jetë më rezistente në këtë pikë dhe në koordinim me bashkësinë ndërkombëtare, t’i koordinojë veprimet, që këto enklava të integrohen në një sistem unik shëndetësor. Mimoza Ahmetaj, (PDK), është kritike për përgjegjësinë e raportimit në nivelin, qendror për të gjitha institucioneve shëndetësore, që funksionojnë në Kosovë me theks të veçantë të atyre në enklavat serbe. Sipas saj sistemi unik në Kosovë mbase mund të jetë i mundur vetëm atëherë, kur shteti i Kosovës do ta ketë sistemin e sigurimeve shëndetësore dhe atë informativ shëndetësor. Ahmetaj shprehet se institucionet janë duke punuar intensivisht për unifikimin e sistemit shëndetësor në Kosovë. Deputetja Qamile Morina (LDD) thotë se mos krijimi i sistemit unik shëndetësor në tërë Kosovën është neglizhencë e institucioneve tona. Sipas saj, ajo që e vështirëson krijimin e një sistemi unik është Pakoja Ahtisari, dhe ligjet që kanë rrjedhë mbi bazën e kësaj pakoje, të cilat definitivisht e kanë shkëputur unitetin e sistemit shëndetësor. “Ne kemi pasur kohë qe 9 vjet të punojmë për integrimin e këtij sistemi, kemi dështuar dhe tani kjo çështje është e rregulluar në aspektin juridik të funksionimit të sistemit shëndetësor me pakon Ahtisari ku komuna vendos për sistemin shëndetësor”, thotë Morina. Ajo vë obligimet dhe përgjegjësitë, tek qeveria e Kosovës duke theksuar kështu se qeveria duhet të ketë planin dhe strategjinë se si t’i qaset integrimit të enklavave serbe në sistemin shëndetësor të Kosovës.