Vetëvendosje padit drejtorin e arsimit në Prizren

nga **Agim Gashi** Wed Aug 08, 2012 8:37 pm

Vetëvendosje padit drejtorin e arsimit në Prizren

Qendra e Lëvizjes Vetëvendosje në Prizren ka deponuar sot kallëzim penal pranë Prokurorisë Komunale në Prizren ndaj Nexhat Çoçajt, Drejtor i Arsimit të Komunës së Prizrenit dhe Bekim Thaçit, mësimdhënës. Padia është bërë për keqpërdorim të parasë publike....

Lëvizja Vetëvendosje konsideron se Nexhat Çoçaj dhe Bekim Thaçi u kanë shkaktuar dëm të konsiderueshëm qytetarëve të Komunës së Prizrenit dhe rrjedhimisht kanë kryer disa vepra penale, thuhet në një komunikatë të Lëvizjes Vetëvendosje.

Sipas Vetëvendosjes, të apostrofuarit kanë kryer veprat penale: “Shpërdorimi i pozitës zyrtare dhe i autorizimit”, “Përvetësim gjatë ushtrimit të detyrës”, “Mashtrim në detyrë” dhe “Përdorimi i paautorizuar në detyrë”.

Po sipas saj, këto keqpërdorime kanë ndodhur me rastin e organizimit të “Javës së Remzi Ademajt”, manifestim ky për nder të dëshmorit në vitin 2011.

I gjithë ky keqpërdorim, sipas Vetëvendosjes, ka ardhur kur më datë 09.03.2011, Drejtoria e Arsimit dhe Shkencës, si pjesë e Administratës Komunale në Prizren, e udhëhequr nga drejtori Nexhat Çoçaj, paraqitën një propozim me të cilin kërkuan nga Kryetari i Komunës së Prizrenit t’ia lejojë shpalljen e tenderit për organizimin dhe shënimin e manifestimit “Java e Remzi Ademajt – Shtigjeve të lirisë”.

Ndërkaq, Vetëvendosje shton se në mbledhjen e mbajtur të datës 15.03.2011, Kryetari i Komunës së bashku drejtorët e Drejtorive Komunale të Prizrenit, shqyrtuan dhe miratuan, propozimin e lartcekur.

“Kurse më datë 29.04.2011, Administrata e Komunale e Prizrenit transferoi në ProCredit Bank në xhirollogari të Bekim Thaçit 12 mijë euro për organizimin dhe shënimin e manifestimit të sipërpërmendur. Po i njëjti, Bekim Thaçi, me datë 06.05.2011 bënë tërheqjen e 3 mijë euro nga xhirollogaria e tij, për të cilat nuk dihet destinimi i shpenzimeve të këtyre mjeteve”, thuhet në komunikatë.

Po ashtu, në të njëjtën datë, Vetëvendosje thotë se Bekim Thaçi ia transferon në formë huazimi paranë publike Nexhat Çoçajt në xhirollogarinë e tij në ProCredit Bank, 9 mijë euro.

Duke marrë parasysh këtë, Vetëvendosje, në bazë të nenit 220 paragrafi 1 të Kodit Penal të Republikës së Kosovës i ka propozuar Prokurorit Publik Komunal që të fillojë hetimin kundër Bekim Thaçit dhe Nexhat Çoçajt, pasi që ekziston dyshim i bazuar se këta kanë kryer veprat penale, duke u mbështetur në provat e paraqitura.

U.D e Kryeprokurorit të Qarkut të Prizrenit, Sylë Hoxha, tha se ende nuk e ka parë atë lëndë, por nëse ka baza ligjore, prokuroria do të nisë hetimet. Këto lëndë sipas tij kanë prioritet në këtë institucion.

Kurse shefi i Zyrës për informim në Komunën e Prizrenit, Ymer Berisha, tha se komuna është e gatshme të bashkpunojë me organet e drejtësisë dhe të gjtha keqpërdorimet eventuale, nëse kanë ndodhur, përgjegjësinë e mbajnë personat të cilët kanë realizuar një gjë të tillë.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30