Ekrem Ajruli: Kur qesh doktor valuta (Cikël poetik)

nga **Agim Gashi** Tue Apr 21, 2009 11:18 am

Ekrem Ajruli
Ekrem Ajruli
CIKËL POETIK NGA PËRMBLEDHJA POETIKE “KUR QESH DOKTOR VALUTA
QYTETI IM
ty qyteti im lule në bajrak
me rrugë të gjëra si sokak
hej qytet i bukur
me parqe, lulishte
pallate të larta
rrugët plotë plehërishte
anë e kënd butiqe
e lokale nate
metropol Afrike
me kulturë mulate
ti qyteti im
sheshin me gropa
në pallat tenxheret
kështu na donë Evropa
shumë intelektual
qyteti im paska
burra pa kandar
fytyrë me shtatë maska
“atdhetarët” tanë
trupin drejtë si lis
bythë e këmbë në Bombaj
mendjen në Paris
ke shumë shoqata
e dhjetëra parti
gënjeshtrat e gjata
punët lesh e li
kur ulen në karrige
sulen kush ç’të kapi
jeta sociale
është bërë lesh arapi
dasma e gëzime
rend e pa rend
shkrihet pasuria
për dy gishta vend.
hej qyteti im
rrugët me asfalt
të shndrit fytyra
e zhytur në baltë
do mjekra të çuditshme
nuk dimë se nga vijnë
vallë e duan djallin
apo perëndinë.
hej qytet qyqarësh
vatër taksidarësh
çerdhe matrapazësh
e bordel kurvarësh
ke dhe një shtresë
që nuk duket fare
se s’mund të durojnë
këtë shoqëri zuzare
FITORE
ikën hordhia
e vjen fallanga
anë e mbanë ferr
populli në pranga
zbythen kleptomanët
kur mësyjnë harbutët
ikin matrapazët
kur vërshojnë hajdutët
në këtë komedi
aktrojnë të gjithë
elektorati ngel prapë
me gishtin në b....

DO TË SHKRETA EPOLETA
Ndrit katundi anë e mbanë
Vajti terri erdhi mëngjezi
U gëzua tërë mëhalla
Se poet u bë pekmezi
Shkruan vargje me shtërzim
Ca satira e parodi
Deklaron pa hezitim
Penë e parë jam në letërsi
I thotë gjërat shkurt e prerë
Për do të shkreta epoleta
Një poezi e boton shtatë herë
Çka nuk mban mjerë gazeta
Merr lapsin prej padronit
E vërsulet mbi fletore
Për ta ruajtur lezetin e fronit
Bën do vargje hamullore
Penën n'dorë si jatagan
E vringëllon ditë e natë
Ku e din poet Pekmezi
Se satira s'duron diktat
DJEMT E TITOS
Shkuan tri dekada
Ai s’është me të gjallët
Amanet na i la
Zgjeboproletarët
Tek enden qytetit
Me gazetë në dorë
Hapat nuk u ndihen
Zvarriten si bollë
Nuk lanë pa lëpirë
Sahan e çanak
Se vesi i kuq
U lëviz në gjak
Në punë të papunë
Shpejtojnë të venë gisht
Fosilet proletare
Krimbat me bisht
Dje ngjyrën e kuqe
E shihnin me admirim
Sot kur ua përmend
U ngjallën trishtim
SHESTIM HISTORIE
Numërojmë nëpër shekuj
Vuajtje e krime
Gjersa fqinjët bisha
Kremtojnë okupime
U këndojmë heronjve
Ode e elegji
Natë e ditë n’çajtore
Shestojmë historinë
Na vranë atë dekadë
Na dogjën këtë vit
Festojmë fitoret
Me litar në fyt
Na internuan atë vjeshtë
Na helmuan këtë stinë
Këmbëkryq në oxhak
E presim lirinë
Soditim rininë
T’plakur që n’agim
Tradita dhe kultura
Shkojnë në degjenerim
Sorollatemi Evropës
Si qyqet pa fole
Me duart në xhepa
Gojën plotë atdhe
E shembëm një mur
Të lart shtatë dekada
Na i ngritën katër tjerë
Më të zi se nata
Kështu e gllabërojmë jetën
Vazhdimisht në agoni
E shndërruam në leckë
Të shtrenjtën LIRI

REZIL QIBAR AGA
Sa të paska hije
Kollarja me lule
N’postinsadaka
Këmbëkryq kur u ule
Seç paske lindur
Me yll në ballë
Për të zezat tua
Nuk skuqesh vallë
Kurrë jetën se deshe
Me djersë të ballit
Gjithmonë të pëlqen
E mizës së kalit
LUM E LUM
Lum e lum bën mileti
për subjektet politike
gjë tjetër nuk u mbeti
veç përrallave patetike
nëpër zyra t’qeverisë
në luks t’gjitha veshur
kukullat tona politike
shkojnë për lesh
e vijnë të qethur
seç druan nga trazirat
“ajka jonë intelektuale”
çirren e shkumojnë rezilët
për do premtime banale
OPOZITA
Uh pozitë ëndrra ime
eh pozitë sa të prita
ah pozitë seç më trete
oh pozitë më agoi dita
KU BIE DRENICA
Atje ku shqiponja
përbuzë acarin, stuhinë
ku shkau-bishë
donë të ngulfatë lirinë
atje ku s'ka vlerë
pasuria as vetë jeta
ku shtrydhet e ndrydhet
me shekuj e vërteta
atje pushteti monstrum
endet oborreve
me pushkë vazhdimisht
fëmijët vdesin burrërisht
ku bëhet istikam
çdo gur ferrë çdo prag
e shkinës i cof klyshi në bark
pinguinët e primaçokët
pyesin ku bie Drenica
atje ku shkaut helm
i bëhet shlivovica
Drenica është
tornado uragan suferinë
që monstrumit n'damar
gjakun ia ngrinë

FRONI
Herë me sharrë
herë me latë
marangozi
laton fronin
për kënd e bëri
këtë dhuratë
për mbretin
apo poltronin
gdhend andej
gdhend këndej
i dha komoditetin
marangozi fatziu
na e lindi
në botë pushtetin
me plotë mund
e sakrifica
bëri fron
nga druri bungut
në te kur ulen
do prapanica
i vjen ndot
edhe cungut
MALI
S'më frikëson
Sharra zhurmëmadhe
që vjen një herë
në vit
nënën ma lodroi
ai me gomarin
nga pak e për ditë

Disa
Flasin
e shkumohen
për rregull
nene e ligje
gjithmonë duan
mjegull
për t’hapur shteg
aty ku s’ka shtigje
me duar
të pastra
e kollare në fyt
këmishën bardhë
si bora
dhe shpirtin
e ndytë
KU E GJETA FERRIN
Gjersa ti pas hyjnive
Rend poshtë në Purgator
Unë këtu në gji të Evropës
Përleshem
Me cerber e kremator
Kot zbret poshtë
Ti Dante Aligeri
Ja këtu në cep të Ballkanit
Sundon Luciferi

EH!
Atdhe i shtrenjti atdhe
Me shekuj numëron plagët
Këmbë e duar lidhur ec mbi dhe
Në ballë të radhiten vragë
Me shekuj rin copëtuar
Nga të huajat hordhi
Litarin në fyt ta shtrëngojnë
Hajdut të kuq hajdut blu-shpirtzi
Shesheve të digjet flamuri
Kufiri të ngushtohet çdo ditë
Ne bijtë zemër guri
Për një grusht monedha
Heshtim-mbyllim sytë
LOLESTANI
Hej Lolestan
Kërthizë e globit
Vendtakim ideal
I matrapazit dhe robit
Rezervat hajdutësh
Ku kultivohen jovlera
Parajsë e loleve
Që në mes të janarit
U çelën pranvera
Kujt t’i besoj sot
As vet më nuk di
Në atdheun e loleve
Të gjithë derrat
Paskan një turri

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30