Socialistët braktisin Kuvendin

Socialistët braktisin Kuvendin




Partia socialiste vendosi të mërkurën që të bojkotojë punimet e seancës plenare të Kuvendit të Shqipërisë. Derisa po e braktisnin sallën e Kuvendit, deputetët socialistë pohuan se nuk do të ktheheshin atje përderisa qeveria të pezullojë atë që opozita e quan taksa votimi, e që faktikisht është çmimi i kartës së re të identitetit.

Nga Express më 23.04.2009 në ora 18:20

Vendimit të socialistëve iu bashkëngjitën edhe deputetët e PSD, ndërkohë që qëndrimin e tyre ende nuk e kanë bërë të njohur deputetët e LSI.

Kërkesës së opozitës iu përgjigj të mërkurën dy herë kryeministri, Sali Berisha, i cili e refuzoi kërkesën e socialistëve, duke u shprehur se të gjithë qytetarët që nuk kanë pasaporta do të kenë mundësi që të marrin kartat e identitetit për të votuar pa asnjë pengesë më 28 qershor. Ndryshe, kryeministri Berisha theksoi se procesi i pajisjes së qytetarëve me karta identiteti po ecë shumë mirë, ndërkohë që sqaroi edhe atë se disa kategori të caktuara kartën e identitetit po e marrin falas, kurse rreth 700,000 aplikues të tjerë po e marrin atë vetëm për 200 lekë.

Një natë më parë, gjegjësisht të mërkurën në mbrëmje, ambasadorët e SHBA, të BE dhe të OSBE janë takuar me kryeministrin Berisha, ndërkaq të enjten me kryetarin e bashkisë së Tiranës, Edi Rama. Nuk janë dhënë hollësi rreth këtyre dy takimeve, ndonëse besohet se në fokus të bisedimeve mund të ketë qenë pikërisht acarimi mes dy partive për shkak të letërnjoftimeve dhe rreziku për trazimin e procesit zgjedhor.(BBC)