Idriz Zeqiraj:Mërgata është realiste dhe kritike

nga **Agim Gashi** Sun Dec 23, 2012 9:14 pm

Idriz Zeqiraj:Mërgata është realiste dhe kritike

Gjatë kemi pritur për të festuar së bashku. Andaj, gëzuar nga zemra përvjetorin e 100-të të Pavarësisë të Shqipërisë tonë hyjnore!
Fillim shekulli i kaluar shënon mëvetësinë e Shqipërisë tonë, për më pak se gjysmën e trojeve etnike shqiptare. Megjithatë, kjo ishte dhe mbetet një kryengjarje historike, sepse shqiptarët e kudondodhur, tashmë kishin një atdhe të lirë dhe të pavarur.

Mërgata gjithëshqiptare, duke punuar dhe jetuar në vendet e demokracive të mirëfillta botërore, është më e hapur në shprehjen e mendimeve, më e shpenguar dhe larg drojës nga mëria dhe hakmarrja pushtetare, për lirinë e shprehjes, për mendimin alternativ, ndryshe.

Kjo mërgatë vazhdon të jetë e shqetësuar për shkallën e lartë të hajnisë zyrtare, e zbutur dhe e kamufluar me termin korrupsion, si dhe dështimin e drejtësisë në luftimin e krimit.

Rruga e Kombit, unifikimi i abetares dhe i literaturës tjetër shkollore, si dhe rivlerësimi i figurave kombëtare, janë elemente bazike që përafrojnë shqiptarët deri në një bashkim të shumëpritur.
Gjuha letrare e unifikuar, e proklamuar në një Kongres Drejtshkrimor, dyzetë vjet më parë, ishte një arritje e madhe për shqiptarët në përgjithësi. Zërat e çakorduar së fundi, janë një mesazh i keq, regresiv, kthim prapa, madje në dëm të shqiptarëve. Akademia e Shkencave dhe e Arteve e Kosovës, duhet t`i bëjë detyrat e shtëpisë. Sepse edhe mësuesi i gjuhës shqipe flet me zhargonin e gjyshit të tij!

Mërgata shqiptare përshëndet rishikimin e historisë dhe vlerësimin e figurave kontribuuese historike. Një popull që aprovon falsifikimin e historisë dhe denigrimin e figurave, që e bënë atë histori, nuk mund të këtë të ardhme prosperuese.

Sot, kur prisnim, më shumë se kurrë, rishikimin e historisë të së kaluarës, flakjen e shtrembërimeve dhe të falsifikimeve të vrazhda e banale, që i bëri asaj, historisë, komunizmi diabolik, po bëhet vetëm ndonjë retushim i pandjeshëm. Ndërkohë, vazhdon revanshi i nostalgjikëve enveristë-stalinistë, të ideologjisë të mykur sllaviste, për t`i vrarë, me heshtje e harresë, bërësit e luftës faktike dhe të vet shtetit të Kosovës, duke e sakatosur edhe historinë e sotme, madje në kohën e Internetit!!!

Shqiptarët, pavarësisht indoktrinimeve ideologjike, tashmë, duhet të pranojnë se nëse Plaku i urtë i Vlorës - Ismail Qemali, shpalli mëvetësinë e Shqipërisë, Mbreti Zog e konsolidoi shtetin e brishtë shqiptar, ashtu siç e ideoi dhe mençurisht e realizoi shtetin e Kosovës Presidenti Rugova.

Mërgata gjithëshqiptare ka mirëpritur dekorimet në kuadrin e 100 vjetorit të Pavarësisë, të bëra nga Parlamenti shqiptar, për figurat kombëtare si Azem Hajdarin - prijatar i Lëvizjes studentore të viteve `90-a; Pjetër Abnorin - simbolin e rezistencës kundra-totalitare dhe luftëtarit të zëshëm për demokraci, me të cilin kemi ndarë fatin e përbashkët në burgun famëkeq të Burrelit.

Refreni i përsëritur se shqiptarët kurrë më mirë nuk kanë qenë, është realitet. Por, vetëkënaqësia dhe stagnimi do të ishte fatale. Shqiptarët kanë dështuar në menaxhimin e pasurisë shtetërore. Vjedhja e shtetit nga vetë shtetarët pushtetarë, është bërë modë.

Shqiptarët janë dështakë të parehabilitueshëm në drejtësinë njerëzore. Vrasjet, pothuajse, publike dhe mos ndëshkimi i kriminelëve, janë dukuri unikale. Prania ndërkombëtare në Kosovë i ka legalizuar dhe ligjësuar krimet, duke i lënë të lirë kriminelët!

Lë të shpresojmë e besojmë në thënien lapidare të rilindësve tanë zulmëmëdhenj se paskëtaj Shqipëria edhe më mirë do të bëhet.

Uroj të jemi mirëkuptuar.

Ps. Kjo është fjala në manifestimin e 100 vjetorit të pavarësisë të Shqipërisë në Berlin.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30