Familjarët tërhiqen nga vendimi për rivarrosjen e eshtrave të Isa Boletinit në Vlorë

nga **Agim Gashi** Sat May 16, 2015 4:03 pm

Familjarët tërhiqen nga vendimi për rivarrosjen e eshtrave të Isa Boletinit në Vlorë

16 Maj 2015 -

Dy ditë pasi shpërthyen reagimet dhe kundërshtimet që mbetjet mortore të Isa Boletinit të rivarrosen në Vlorë, kanë ndërruar mendje edhe familjarët e tij. Gazmend Boletini, i cili kishte votuar pro Vlorës në Këshillin për ceremoninë e rivarrimit dhe të enjten kishte qenë në Shqipëri për të takuar kryeministrin shqiptar lidhur me këtë çështje, tash është tërhequr, shkruan Koha Ditore.

“Pas reagimeve të popullit edhe ne kemi vendosur që të jemi me popullin”, i ka thënë gazetës të premten stërnipi i Heroit të Kombit. Sipas tij, për vendimin e familjes është njoftuar edhe Qeveria e Kosovës, përkatësisht kabineti i zëvendëskryeministrit Thaçi.

“Kemi njoftuar edhe Zyrën e zëvendëskryeministrit”, ka thënë Boletini, tek ka shtuar se nuk e di nëse nga vendimi do të tërhiqen edhe dy qeveritë, ajo e Kosovës dhe e Shqipërisë.
Të premten Komuna e Mitrovicës ka mbajtur në mbledhje të jashtëzakonshme për të kundërshtuar vendimin e dy qeverive dhe Këshillit organizativ. Qysh të mërkurën kur ishte marrë vendimi që eshtrat e Boletinit të rivarrosen në Vlorë, kryetari i Mitrovicës, Agim Bahtiri, kishte votuar kundër. Në shenjë revolte kishte lëshuar mbledhjen. Të enjten derisa në Tiranë dy qeveritë dhe familjarët e Isa Boletinit rikonfirmuan se rivarrimi do të bëhej në Vlorë, kishin shpërthyer edhe më shumë zëra kundër.
Në Mitrovicë ishte mbajtur një tubim në Shtëpinë e Kulturës ”Rexhep Mitrovica”. Aty edhe vetë Mulla Asllan Murati që për 14 vjet kishte mbajtur në një vend sekret eshtrat e heroit, kishte thënë se është kundër vendimit që prehja e mbetjeve mortore të bëhet në Vlorë. Fillimisht ishte paraparë që rivarrimi të bëhej më 28 nëntor të vitit të kaluar në fshatin Boletin që gjendet në veri të Mitrovicës. Më pas ceremonia ishte shtyrë për 16 janar të këtij viti për t’u ricaktuar më 10 qershor në Vlorë.
Isa Boletini ishte vrarë në Mal të Zi në janar të vitit 1916 nga xhandarët malazezë. Nga 8 mbetje kockore të sjella nga Mali i Zi, përveç vërtetimit se një palë janë të Isa Boletinit, në raportin e Institutit të Mjekësisë Ligjore të Strasburgut ishte theksuar se një palë të tjera janë të Jonuz Ahmet Boletinit, ndërsa për 6 palë të tjera nuk është arritur të vërtetohet. Sipas disa versioneve thuhet se trupat ishin varrosur në Pobrezhje afër Podgoricës nga banorët lokalë. Aty qëndruan deri më 1998, përderisa përpjekje për t’i tërhequr ata ka pasur edhe më 1994. Më 15 nëntor të vitit 1998 qe bërë zhvarrosja e trupave nga Mali i Zi, pasi, siç thonë familjarët, Isa kur ishte vrarë ishte me dy djemtë e vet, dy nipa dhe tre bashkëluftëtarë. Sipas Gazmend Boletinit, në atë kohë Muhamet Shukriu dhe një nip i familjes, Remzi Murati, kanë shkuar bashkë në Mal të Zi. Atje i ka shoqëruar Mulla Idriz Demiri, ish-kryetar i Bashkësisë Islame në Mal të Zi. Eshtrat ishin sjellë në Mitrovicë, ku i kishte pranuar Mulla Asllan Murati. Ky i fundit për 14 vjet i ka mbajtur në një vend sekret. Tek më 2011 e zbuloi vendin. Më 21 korrik të atij viti ia dorëzoi ata ish-kryetarit të Komunës, Avni Kastrati.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30