Gurë për Bogdanoviqin

Gurë për Bogdanoviqin



Në mënyrë të pazakontë, serbët sulmojnë serbët. Kjo ka ndodhur të shtunën në veri të Mitrovicës, ku protestuesit serbë kanë gjuajtur me gurë makinën e ministrit serb për Kosovën, Goran Bogdanoviq. Thuhet se kjo ka ndodhur pasi që Bogdanoviq tash sa ditë u ka bërë thirrje për ndaljen e protestave që serbët po i mbajnë tash një javë kundër kontrollit të EULEX-it në pikat doganore 1 dhe 31.

Nga Besiana Xharra më 27.06.2009 në ora 20:58

Protestuesit serbë në veri të Mitrovicës, kanë gjuajtur me gurë makinën në të cilën ishte Goran Bogdanoviq, ministër për Kosovën në Qeverinë e Serbisë dhe Nebojsha Bradiqev, ministër i Kulturës.

Të shtunën, këta dy, bashkë me përcjellje po shkonin në Mitrovicë, për të festuar të dielën festën e serbëve, Vidovdan, kur papritmas, posa po kalonin afër protestuesve serbë në Leposaviq, janë gjuajtur me gurë nga protestuesit serbë.

Policia e Kosovës tregon se makina ka vazhduar lëvizjen dhe se nuk ka pësuar ndonjë aksident.

“Nuk i dimë shkaqet e këtij incidenti. Ata kanë ardhur me leje të Qeverisë së Kosovës për festën e tyre, Vidovdan, dhe pse janë sulmuar nga protestuesit, mbetet të zbulohet”, tha Besim Hoti, zëdhënës i Policisë Kosovës për rajonin e Mitrovicës.

Edhe pse ai thotë se nuk i di arsyet, mediat serbe deklarojnë se kjo ka ndodhur pasi që Bogdanoviq tash sa ditë është duke kërkuar nga serbët në Veri që të ndërpresin protestat.

Ata kanë filluar të protestojnë tash një javë, kundër EULEX-it, i cili po bën kontrollin e pikave doganore në Leposaviq dhe Zubin Potok, pasi që, sipas tyre, nuk duan t’i paguajnë taksë Qeverisë së Kosovës, por vetëm asaj të Serbisë.

Ministri serb për Kosovën disa herë iu ka bërë thirrje protestuesve serbë që të ndërpresin protestën në veri të Mitrovicës.


Mirëpo, protestuesit serbë, me këmbëngulje thonë se nuk do të ndalen derisa EULEX-i të largohet nga pikat doganore 1 dhe 31.

Zëvendëskryetari i Komunës së Leposaviqit, Goran Lazoviq, ka thënë për Kontakt Plus se magjistralja në Leposaviq gjatë tërë ditës vazhdon të mbetet e bllokuar për të gjitha makinat e EULEX-it.

Ai thotë se të hënën pret një takim me protestuesit e Zubin Potokut për të biseduar rreth gjendjes së deritanishme, kurse thirrjes së tyre për të negociuar me EULEX-in dhe Qeverinë Serbë, nuk i është përgjigjur askush.

Edhe Stevan Bozoviq, kryetar në Zubin Potok, ka deklaruar se edhe në atë pjesë magjistralja vazhdon të bllokohet dhe po ashtu nuk kanë marrë asnjë përgjigje nga EULEX-i për bisedime.

“Nuk do t’i ndalim protestat derisa EULEX-i nuk ndërpret doganën për serbët që hyjnë në Kosovë”, u ka thënë Bozoviq protestuesve të Zubin Potokut.

Mirëpo, edhe pse ata po mundohen të bllokojnë punën e zyrtarëve të EULEX-it, bëhet e ditur se në asnjë moment nuk kanë arritur të bëjnë një gjë të tillë.

“Pavarësisht nga sulmet e fundit për ta parandaluar, EULEX-i po regjistron mallrat tregtare dhe po merr fotokopje të licencave të shoferëve të kamionëve, si dhe të dokumenteve me listën e vlerës dhe llojit të mallit që transportojnë, e gjitha kjo, në një mënyrë transparente dhe në një përpjekje për të ulur edhe më tej kontrabandën”, është shprehur Karin Limdal, zëdhënëse e EULEX-it.

Si zyrtarë të EULEX-it, po ashtu edhe të Policisë Kosovës, kanë deklaruar se prej se EULEX-i është vendosur në atë pjesë, kontrabanda me Serbinë është ulur dukshëm.

Serbët në Veri, për herë të tretë brenda dy muajve po protestojnë për heqjen e kësaj kontrolle.

Hera e parë ka qenë më datën 20 maj, kur EULEX-i pati filluar të zbatojë masat parandaluese për aktivitetet kontrabanduese, duke kërkuar që mallrat e transportuara të kenë dëshmi të caktuar.

Ndryshe prej herëve të kaluara, kur protestat e tyre kanë zgjatur 1 apo 2 orë në ditë, kësaj radhe ata po i mbajnë nga 12 orë.

Por edhe zëdhënësi i policisë, Besim Hoti, tregon se përkundër deklaratave të serbëve që po bllokojnë rrugën, ata nuk kanë fuqi të bëjnë një gjë të tillë.

“Tubimi i këtyre serbëve nuk ka fuqi që të bllokojë në tërësi magjistralen, pasi që policia e ka nën kontroll dhe qarkullimi është i lirshëm në ato vende. Ata rrinë aty vetëm fizikisht, sepse punën e EULEX-it nuk mund ta pengojnë”, është shprehur Hoti.