Pritje për ansamblin i valleve “Vatra” në ambasadën e Kosovës në Bern

Pritje për ansamblin i valleve “Vatra” në ambasadën e Kosovës në Bern



Momente nga pritja që ambasadori Naim Malaj i bëri AV “Vatra”

Rikujtohet kontributin i kësaj trupe gjatë viteve të rezistencës dhe luftës për liri dhe pavarësi

Në Bern, një delegacion i Ansamblit të Valleve "Vatra" nga Bulachu me rrethinë i prirë nga Nexhmedin Isufi, kryetar dhe Sylejman Sylejmani e Liridon Islamin, anëtarë të Kryesisë u pritën ngrohtësisht në ambasadën e Republikës së Kosovës në Zvicër nga ambasadori, Naim Malaj. Bashkë me këtë delegacion ishte edhe piktori i njohur shqiptar nga Kosova Idriz Berisha.
Ambasadori Malaj, pasi u dëshiroi mirëseardhje, i njoftoi mysafirët me aktivitetin e ambasadës dhe veprimtarinë diplomatike të saj në kryeqytetin e vendit mik të Kosovës dhe gjithë shqiptarëve, duke pasur parasysh faktin se Zvicra ishte dhe është qendër e rëndësishme diplomatike, kulturore, ekonomike e shkencore.
Temë me rëndësi që spikati këtë takim ishte edhe interesimi i ambasadorit që komuniteti shqiptar nga Kosova të ketë koordinim më të mirë e më të organizuar të aktiviteteve të saj kulturore, artistike, sportive dhe të përgjithshme shoqërore dhe u premtoi se Qeveria e Republikës së Kosovës, respektivisht Ministria e Jashtme e saj, pas fushatës së saj diplomatike për njohje të reja të shtetësisë sonë, fokus qëndror do të ketë mërgatën dhe sfidat e saj. Malaj falënderoi udhëheqjen e AV "Vatra" për kontributin e madh që dha për shumë vite dhe po japin edhe tani për të ruajtur e kultivuar edhe më tej vlerat aq të çmuara të folklorit tonë të pasur burimor popullor, artit e kulturës sonë kombëtare në përgjithësi.
Ai nuk la pa rikujtuar edhe kontributin e jashtëzakonshëm të anëtarëve të kësaj trupe edhe gjatë viteve të rezistencës dhe luftës për liri dhe pavarësi e deri në ditët e sotme, duke theksuar se mbështetja e diasporës në përgjithësi ishte ndër vendimtaret për fitoren e populli tonë dhe Kosovës.
Në anën tjetër, kryetari i AV "Vatra", pasi falënderoi ambasadorin Malaj për pritjen e përzemërt, bëri një prezantim kronologjik për aktivitetin shumëvjeqar të "Vatrës",duke u fokusuar më shumë në inicimin e organizimit dhe koordinimit institucional nga ambasada jonë dhe gjetjen e formave të mbështetjes institucionale jo vetëm të atyre artistike, por të përgithshme kulturore, arsimore, afariste e shoqërore të komunitetit shumë serioz kosovar në Zvicër.
Delegacioni i "Vatrës" mori premtimin nga ambasadori, i cili theksoi se bashkëjeton me të gjitha shqetësimet e bashkëkombësve të tij, se do të kenë mbështetjen e plotë të tij në të gjitha aktivitetet e tyre dhe se kontaktet me ta do të jenë edhe më të shpeshta dhe gjithësesi më të frytshme.
Në fund të takimit, piktori akademik Idriz Berisha i dhuroi amabsadorit Malaj një pikturë me simbolikë të fuqishme artistike kombëtare e cila e emocionoi duke ditur se piktura të këtij artisti të madh gjenden edhe në odën e madhe të jasharajve legjendarë.
B.S.