Adnan Abrashi: Të gjithë kandidatët për kryetar të Prizrenit?!

nga **Agim Gashi** Tue Jul 14, 2009 12:53 pm

TË GJITHË KANDIDATËT PËR KRYETAR TË PRIZRENIT?!

Nga Adnan Abrashi

Shpesh, duke u motivuar nga shumë veprime dhe ndërmarrje të gabuara dhe spirituoze të politikanëve lokal dhe qendror, qytetarët e Prizrenit janë të pirur të sajojnë lloj-lloj batuta, apo “shtosa”, sikur zakonisht i quajnë me zhargonin provincial në përdorim
Këso far “shtosa”, vazhdimisht tregohen nëpër ndeje të shumta të badihavaxhive ordinar të qytetit.. Ato, gjatë tregimit të përsëritur, dita ditës shumohen, zbukuron, qëndisen dhe përshtaten me elemente të reja përmbajtjesore duke u bërë sa më të kapshme dhe interesante si humor.
Para mbajtjes së zgjedhjeve te përgjithshme dhe lokale të vitit 2007, atëbotë, kryetari ende aktual i degës së PDK-së në Prizren, dhe tani edhe deputet i Parlamentit të Kosovës, z. Zafir Berisha, ndoshta edhe si shaka, pat deklaruar se, posa PDK-ja t’i fiton zgjedhjet në këtë komunë, gjënë e parë që do ta bëj është ndryshimi i ngjyrës së “Shtëpisë së Bardhë”; asaj ndërtese më moderne dhe më atraktive administrative komunale të qytetit, ku aktualisht është vendosur udhëheqja e ngushtë pushtetar e saj.
Vërtet, PDK-ja i fitoj zgjedhjet, dhe, mbase njëra nga shumë premtimet të saja të parealizuara deri më tani, është edhe ky: ndryshimi i ngjyrës së SHTËPISË SË BARDH. Kështu, këtë vit, sa më shumë po afrohet dita e zgjedhjeve për pushtetin lokal, kësaj shakaje të mësipërme, tani si vazhdim po i shtohet edhe pjesa e dytë: “Këtë ndryshim të koloritit të mureve të ndërtesës më të famshme të qeverisë lokale në Prizren, nuk e bëri Zoti kësmet, ngase, qysh po duket, është e shkruar që këtë vit, sërish aty të vendoset si kryetar, ideatori dhe ndërtuesi i parë i saj, Eqrem Kryeziu”.
“Hajgare, hajgare, por kosi me pare” – thotë populli, ama, marrë seriozisht, ata që sado pak e njohin mentalitetin prizrenas dhe karakterin e ish kryetarit, z. Eqrem Kryeziut, të cilit kurrë nuk i dihet, atëherë, edhe pse ai zyrtarisht ende jo i kandiduar, shumë lehtë mund të ndodh e kundërta: konkurrenti më serioz për kryetar komune në këto zgjedhje të jetë pikërisht Eqrem Kryeziu, i cili, para këtij mandati, përplot 7 vite ishte i pari absolut dhe me ndikim të pacenueshëm vendimmarrës në këtë qytet.
Mu për këtë qëllim, nga tabori i degës së LDK-së në Prizren, si duket, qëllimisht lansohen në opinion emrat e disa kandidatëve tjerë si propozime të mundshme për kryetar komune nga kjo parti, dhe aty nuk figuron emri i EQËS. Kjo, s’ka se si të interpretohet tjetër, veçse si një taktikë e parapërgatitur qëllimisht nga vetë Eqrem Kryeziu. Ai, sigurisht pret që, së pari zyrtarisht, të gjitha degët e partive tjera ta kandidojnë kandidatin e tyre për kryetar komune, dhe, në fund, si befasi, në opinion të del emri i tij për këtë post si pretendent më serioz
PDK-ja e cila aktualisht është në pushtet, vazhdon të jetë e bindur se, nga këto zgjedhje, edhe këtë herë, pa kurrfarë telashe, do ta ketë votëbesimin e popullit për mandatin e ardhshëm katërvjeçar. Ajo, dy vite sa ishte në pushtet, aq krijoji si bindje një figurë të idealizuar për veten, saqë elektoratin e gjerë prizrenas e shikon nga prizma e disponimit pozitiv të reflektuar nga rrethi i ngushtë i militantëve partiak me të cilët ka kontakt çdo ditë si interes; më pas, shumë mbështetet në rezultate e aksionit, sikur thuhet, “tejet të suksesshëm” disa ditësh, për regjistrimin e anëtarëve të rijnë ku ofronin plotësimin e fletëaderimeve partiake edhe mysafirëve të rastit nëpër qebaptore dhe kafeteri; si dhe kalimit “spektakular” të ditëve të fundit në radhët e saj të disa anëtarëve të parëndësishëm dhe me autoritet minorë nga partitë e tjera..
Edhe përpos kësaj, dega e PDK-së në Prizren, ende nuk e ka shpallur zyrtarisht kandidatin e vet për kryetar komune për këto zgjedhje, andaj, bazuar, sërish në fjalët e “çarshisë”, beteja mbase përçarëse brenda - përbrenda partisë për këtë kandidat, do të zhvillohet: në mes të deputetit aktual të Kuvendit të Kosovës, z. Zafir Berisha, për të cilin flitet se nuk e ka përkrahjen e duhur të Hashim Thçit, dhe, kryetarit aktual, z. Ramadan Muja, i cili, si duket ka marr lezet në këtë post, dhe ka indicije serioze se Thaçi po e favorizon edhe për këtë mandat.
Nga spektri tjetër partiak opozitar dhe jashtëparlamentar të qytetit, në këto zgjedhje për kryetar komune të Prizrenit, pa dyshim se do të ketë edhe emra tjerë kandidatësh në koalicion si dhe ndonjë të pavarur. Të gjithë këta të tjerë në konkurrim, përpos si emra me një biografi pozitive, nuk do të jenë asgjë tjetër, veçse elemente pasuruese të mozaikut demokratik zgjedhor që duhet të duket me sa më shumë kandidat për kryetar.
Por, me këtë rast, mos ta harrojmë edhe befasinë e mundshme. Në fakt, për fillim, edhe pse jo aq emër i njohur për prizrenasit, kandidati tanimë veç i shpallur edhe zyrtarisht për kryetar komune nga radhët e AAK-së, z. Bislim Zyrapi, dita-ditës po e përvetëson simpatinë e qytetarëve të këtij qyteti. Sa më ka ra mua të dëgjoj, për të ende nuk ka batuta dhe barsoleta përqeshëse sarkazmatike. Përkundrazi, si vlerësim nga shumëkush mund të hasësh në konstatimin: “Nuk e njoh, ama kam dëgjua fjalë të mira për të”. Me sa duket, Bislim Zurapi, ngadalë, por sigurt, po përvetëson simpatinë e zgjedhësve prizrenas.
Sido që të jetë, pa dyshim se karakteristika e zgjedhjeve të nëntorit në Prizren do të përshkruhet nga disponimi i ndryshuar i zgjedhësve që do të variroj: në mes të sentimentit për ish kryetarin e mëparshëm Eqrem Kryeziu, nga njëra anë, dhe kandidatit të dal si propozim nga PDK-ja aktualisht në pushtet, por me gjasa të përçarjes brenda përbrenda saj pikërisht në lidhje me kandidaturën e kryetarit. Me këtë rast, patjetër si rezervë e befasisë së mundshme për fitore, duhet llogaritur edhe në kandidatin e AAK, z. Bislim Zyrapi, emri i të cilit, ngadalë por sigurt, ka filluar ta përfitoj simpatinë e prizrenasve.
Edhe pse nga aspekti klimatik, data e 15 nëntorit e shpallur si ditë zgjedhore për pushtetin lokal në Kosovë, pritet të jetë e ftohtë, për prizrenasit, ajo ditë do të jetë e ngrohët dhe përplot befasi. Të shpresojmë që ato të jenë të këndshme...

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30