Bashkatdhetarët kanë tejkaluar investimet e bashkësisë ndëkombëtare në Kosovë

Bashkatdhetarët kanë tejkaluar investimet e bashkësisë ndëkombëtare në Kosovë

Kastriot Shehdadi
Sipas FID-it dhe Agjencionit Zviceran për Zhvillim 275 milionë euro dërgesa vijnë në Kosovë



Përfaqësues nga diaspora dhe pjesëmarrës të tjerë institucionalë dhe të shoqërisë civile vlerësuan kontributin e vazhdueshëm të bashkatdhetarëve tanë për mirëqenien e familjeve të tyre në Kosovë

Përfaqësues nga diaspora dhe pjesëmarrës të tjerë institucionalë dhe të shoqërisë civile vlerësuan kontributin e vazhdueshëm të bashkatdhetarëve tanë për mirëqenien e familjeve të tyre në Kosovë, por edhe mungesën institucionale të koordinimit të projekteve zhvillimore investive në vendlindje. Kjo është kostatuar në debatin “Diaspora forcë shtytëse në zhvillimin e Kosovës” të organizuar nga Forumi për Iniciativë Demokratike (FID-it) dhe të përkrahur nga Agjencioni Zviceran për Zhvillim dhe Bashkëpunim-SDC. Sipas hulumtimit të bërë nga FID-i në bashkëpunim me Universitetin e Neuchatelit në Zvicër rreth problematikës së diasporës kosovare, me bashkatdhetarët tanë në Zvicër e Gjermani, pastaj me biznesmenë kosovarë,është vlerësuar si mjaft i dobishëm për faktin se kanë dalë të dhëna të reja nga të cilat mund të hartohen strategji të qëndrueshme bashkëpunimi e zhvillimi. Arbnor Pula, drejtor ekzekutiv i FID-it, ka thënë se “275 milionë euro janë dërgesat që vijnë çdo vjet në Kosovë ndërsa 40 milionë euro në të mira materiale, që në GJDP_në e Kosovës kanë efekt
në masën 17.5 për qind”. Nga Pula është pohuar më tej se ekziston pritshmëri në rritje në mesin e politikëbërësve, agjencive donatore, specialisteve të zhvillimit e të tjerë mbi rolin që diaspora kosovare duhet ta luajë në zhvillimin e Kosovës. Sipas të dhënave të dala nga sondazhi mbi matjen e standardit jetësor, përqindja e familjeve në Kosovë të cilat përfitojnë nga dërgesat në të holla nga diaspora është 29 përqind, e cila përqindje është më e lartë se vlerësimet e llogaritura në vitin 2004 nga Fondi Monetar Ndërkombëtar.
Samual Walt, drejtor i SDC në Prishtinë, duke treguar për fuqinë e diasporës kosovare, ka thënë se tejkalon investimet e bashkësisë ndërkombëtare në Kosovë. Sipas Walt, ndihma që ka ardhur nga diaspora pas vitit 1999 nga bashkësia ndërkombëtare është më e vogël se sa mjetet që kanë sjellë kosovarët e punësuar jashtë Kosovës. Derisa një pjesë e mjeteve të bashkësisë ndërkombëtare që i janë dedikuar Kosovës janë ndarë për trajnime ekspertësh, mjetet e diasporës qindpëqrind janë shfrytëzuar për familjet në Kosovë. Sipas theksimeve të mëtejme të Walt, Zvicra është vendi që më së shumti ka dhënë donacione për Kosovën.
“Pjesëtarët e diasporës duhet megjithatë të inkurajohen që të investojnë, ndërsa qeveria do të duhej të bënte përmirësimin e klimës së përgjithshme investuese, duke mundësuar marrjen e kredive, duke mbajtur politikat e favorshme fiskale dhe duke promovuar Kosovën si vend i sigurt për investim” ka sugjeruar Arbnor Pula.