Arrestohet komandanti i stacionit policor në Kastriot

Arrestohet komandanti i stacionit policor në Kastriot

Sejdi Zeqirin e ngarkon dyshimi i bazuar se ka shpërdoruar detyrën zyrtare dhe për marrje të ryshfetit

Njësia e hetimeve rajonale me urdhër të prokurorit publik të qarkut ka arrestuar komandantin e stacionit policor në Kastriot, Sejdi Zeqirin, nën dyshimin e bazuar se ka shpërdoruar detyrën zyrtare dhe për marrje të ryshfetit.
Bëhet e ditur se pas arrestimit, toger Sejdi Zeqirit i është caktuar edhe masa e ndalimit policor për 48 orë dhe i njëjti është suspenduar nga puna.
Zyra për informim thekson se Policia e Kosovës është e përkushtuar që në radhët e asaj të ketë vetëm ata zyrtarë që me përkushtimin dhe punën e tyre meritojnë të jenë pjesë e PK-së. "Ndaj çdo zyrtari policor, i cili me veprimet e tij bie ndesh me ligjin për policinë ose legjislacionin tjetër në Republikën e Kosovës do të merren masa që varësisht nga pesha e veprës mund edhe të përjashtohen nga puna".
Dy ditë më parë me urdhër të prokurorit publik të qarkut në Gjilan kanë arrestuar tre zyrtarë policorë dhe të njëjtit menjëherë pas arrestimit edhe janë suspenduar nga puna.
Në vazhdimësi të këtij procesi hetimor, po ashtu është arrestuar edhe një zyrtar policor që punonte në stacionin policor në Viti për shpërdorim të detyrës zyrtare.