Qeveria për protokollin policor të EULEX

Qeveria për protokollin policor të EULEX-it

Përveç marrëveshjes në fushën e policisë, tashmë është paralajmëruar edhe nënshkrimi i marrëveshjeve të ngjashme edhe për drejtësinë dhe doganat.




Qeveria e Kosovës thotë se është informuar nga misioni i Bashkimit Evropian për forcimin e sundimit të ligjit në Kosovë për takimet që ky mekanizëm do të zhvillojë në fund të javës së parë të tetorit me përfaqësuesit serb, në lidhje me zbatimin e marrëveshjes për bashkëpunim policor EULEX-Serbi.

Qeveria e Kosovës bën të ditur se është njoftuar nga EULEX-i për takimet që ky mision do të zhvillojë me zyrtarë të shtetit serb për të jetësuar marrëveshjen për bashkëpunim policor, të nënshkruar më 11 shtator. Opozita vlerëson se edhe ekzekutivi do të bëhet pjesë e zbatimit të kësaj marrëveshje.
Qeveria e Kosovës thotë se është informuar nga misioni i Bashkimit Evropian për forcimin e sundimit të ligjit në Kosovë për takimet që ky mekanizëm do të zhvillojë në fund të javës së parë të tetorit me përfaqësuesit serb, në lidhje me zbatimin e marrëveshjes për bashkëpunim policor EULEX-Serbi.
Mirëpo, sipas zyrtarëve të ekzekutivit kosovar, Kosova nuk do të jetë palë e këtyre takimeve, andaj dhe, siç thuhet, nuk ka obligime për këtë çështje.
Zëvendëskryeministri i Kosovës, Hajredin Kuçi, thotë për Radion Evropa e Lirë se bashkëpunimi me EULEX-in në fushën e sundimit të ligjit do të ndodhë vetëm në kuadër të ligjeve, të Kushtetutës së Kosovës dhe bazuar në ftesën, të cilën Kosova ia ka bërë misionit evropian. “Unë mendoj se raportet me EULEX-in janë korrekte dhe bashkëpunimi është i plotë. Ne do të bashkëpunojmë për fushat e rendit e të ligjit-ato që parashihen me ligjet tona dhe me Kushtetutë, si dhe me ftesën që i kemi bërë EULEX-it. Për ato që nuk janë marrëveshje të Qeverisë së Kosovës, mendoj që as nuk kemi qenë palë dhe as nuk kemi obligime”, thekson zëvendëskryeministri Kuçi. Takimi që zyrtarët e EULEX-it pritet të zhvillojnë me përfaqësuesit e Qeverisë së Serbisë, është i pari i këtij lloji që kur është nënshkruar marrëveshja për bashkëpunim policor. “Ky takim është konfirmuar për datën 7 tetor në Beograd, në të cilin do të diskutohen anët praktike të marrëveshjes teknike. Kjo marrëveshje teknike do ta përmirësojë bashkëpunimin rajonal për luftimin e krimit, si dhe për përmirësimin e komunikimit”. “Qeveria e Kosovës është e informuar lidhur me këtë takim. EULEX-i konsultohet nga afër me Qeverinë e Kosovës për të gjitha çështjet që janë të lidhura me mandatin e tij, e që kanë për qëllim të sigurojnë përfitime konkrete për gjendjen e sundimit të ligjit në Kosovë.”, thuhet, ndër të tjera, në komunikatën e EULEX-it të lëshuar ditë më parë. Përfaqësues të këtij misioni, kohë më parë, kishin bërë të ditur se shkëmbimi i informatave në mes të Policisë serbe, asaj të EULEX-it dhe Policisë së Kosovës mund të ndodhë vetëm me miratimin e të gjitha palëve. Në lidhje me qasjen e EULEX-it në të dhënat e policisë së Kosovës, zoti Kuçi shprehet:“Kemi përgatitur ligjin për mbrojtjen e të dhënave që dërgohen në Kuvendin e Kosovës. Mendoj se bashkëpunimi me EULEX-in është i plotë në këtë drejtim, edhe sa u përket të dhënave dhe informatave të tjera, të cilat kërkojnë një transparencë, edhe nga institucionet e Kosovës përballë EULEX-it, por edhe të EULEX-it përballë institucioneve të Kosovës”. Ndërsa, opozita kosovare mendon se kundërshtimi i Prishtinës zyrtare për të qenë palë e zbatimit të marrëveshjes për bashkëpunim policor EULEX-Serbi është vetëm, siç thuhet, një farsë e institucioneve kosovare. Nënkryetari i Aleancës për Ardhmërinë e Kosovës, Ahmet Isufi, beson se procesi i udhëhequr nga EULEX-i për zbatimin e marrëveshjes për policinë me Serbinë dobëson fuqinë e institucioneve shtetërore të Kosovës. “Ata me fjalë e thonë se janë kundër, por megjithatë, me veprimet që i kanë bërë deri tani, po tregojnë se janë në vijë të njëjtë”, thotë Isufi. Përveç marrëveshjes në fushën e policisë, tashmë është paralajmëruar dhe nënshkrimi i marrëveshjeve të ngjashme ndërmjet EULEX-it dhe Beogradit zyrtar për drejtësinë dhe doganat.rel