Thaqi rikandidon kryetarët

Rikandidon kryetarët

PDK’ja vendosi t’i rikandidojë 16 kryetarët aktualë të komunave të saj edhe për një mandat tjetër. Këshilli Drejtues miratoi në tërësi rekomandimet e Kryesisë me vetëm një abstenim. Xhavit Haliti u caktua shef i Shtabit Zgjedhor. Nasim Haradinaj ka dhënë dorëheqje nga çdo funksion në PDK, ndërsa Jakup Krasniqi e ka vlerësuar atë si vendim individual




Nga Përparim Isufi

Partia Demokratike e Kosovës ka kryer gjysmën e punës për një pasdite të vetme, duke rikandiduar 16 kryetarët aktualë të komunave që kontrollon kjo parti edhe për një mandat tjetër.

Vendimi është marrë të martën nga Këshilli Drejtues i PDK’së, pas një debati njëorësh, ku nuk pati asnjë votë kundër dhe vetëm një abstenim.

“PDK ka analizuar dhe vlerësuar shumë pozitivisht punën dhe suksesin e arritur të të gjithë njerëzve të zgjedhur për këtë mandate qeverisës, si në nivelin lokal, ashtu edhe në nivelin qendror. Qeverisja e mirë dhe demokratike, sundimi i ligjit, transparenca, efikasiteti në shërbim të të gjithë qytetarëve të Kosovës na obligon, para së gjithash, ta respektojmë vullnetin e qytetarëve që në komunat fituese të vazhdojmë me kandidatët dhe ekipet fituese”, thuhet në pikën e dytë të propozimit që Kryesia e PDK’së, një ditë më parë i kishte dërguar Këshillit të Përgjithshëm.

Në emër të Këshillit Drejtues të PDK’së, kryetari Hashim Thaçi ka paraqitur një deklaratë politike, e cila u miratua unanimisht nga të gjithë anëtarët e Këshillit.
Në këtë deklaratë, PDK thotë se angazhohet për zgjedhje të lira, fer, demokratike dhe për transparencë maksimale në procesin elektoral.

“Qëndrimi zyrtar i PDK’së është për instalimin e kamerave në çdo vendvotim dhe vendnumërim në Republikën e Kosovës”, ka thënë kryetari Thaçi. Gjithashtu PDK ka vendosur që kandidatët e mundshëm për kryetarë në komunat ku ajo është në opozitë, të propozohen në konsultim me Kryesinë e PDK’së, ndërsa vendimi përfundimtar rreth kandidaturave i është lënë barrë Këshillit Drejtues që pritet të mblidhet edhe një herë para 15 shtatorit, dita kur skadon afati i dorëzimit të listave të kandidatëve në Komisionin Qendror të Zgjedhjeve.

Partia ka emëruar Xhavit Halitin në pozitën e shefit të Shtabit Zgjedhor, ka kërkuar nga degët që t’i formojnë menjëherë shtabet komunale zgjedhore dhe ka obliguar deputetët që të angazhohen në fushatën elektorale nëpër komunat prej nga vijnë.

Por, pjesëmarrësit e kësaj ngjarjeje kanë mbetur pa fjalë atëherë kur anëtari i Këshillit Drejtues, Nasim Haradinaj, është ngritur dhe ka ofruar dorëheqje të parevokueshme nga të gjitha funksionet partiake.

Haradinaj është kushëri i afërm i kryetarit të Aleancës për Ardhmërinë e Kosovës, Ramush Haradinaj. “Prej sot jap dorëheqje nga PDK. Ju falënderoj për punën, për mirëkuptimin që keni pasur. Ju falënderoj të gjithëve, I falënderoj shokët e paraluftës, gjatë luftës dhe të pasluftës”, ka thënë Nasim Haradinaj, pa dhënë ndonjë arsye dhe pa shfaqur ndonjë shenjë pakënaqësie.

Pasi ka përshëndetur kolegët e tij të deridjeshëm, ai ka dalë nga salla. Sekretari i përgjithshëm i PDK’së, Jakup Krasniqi, e ka cilësuar si çështje individuale largimin e Nasim Haradinajt.

“PDK asnjëherë nuk ka ndjekur rrugën e partive moniste për të përjashtuar anëtarë as nga Kryesia as nga Këshilli Drejtues. Nëse dikush mendon se mund ta ushtrojë më mirë veprimtarinë e vet në ndonjë parti politike regjionale, mund ta shfrytëzojë të drejtën e vet”, është shprehur ai, duke aluduar në vendimin e AAK’së, ditë më parë, për ta përjashtuar Bujar Dugollin nga të gjitha funksionet partiake.

Të rikandiduarit e PDK’së

1. Bajram Rexhepi (Mitrovicë)
2. Bajram Mulaku (Vushtrri)
3. Sami Lushtaku (Skenderaj)
4. Nexhat Demaku (Drenas)
5. Sokol Bashota (Klinë)
6. Shukri Buja (Lipjan
7. Bajrush Xhemajli (Ferizaj)
8. Nexhmedin Arifi (Viti)
9. Begzad Sinani (Kamenicë)
10. Qazim Qeska (Rahovec)
11. Ramadan Muja (Prizren)
12. Naim Ismajli (Shtime)
13. Salim Jonuzi (Dragash)
14. Qemajl Mustafa (Gjilan)
15. Isni Kilaj (Malishevë)
16. Xhabir Zharku (Kaçanik)