Familjaret e të pagjeturve në grevë urie

Familjaret e të pagjeturve në grevë urie

Gjendja e tyre shëndetësore është përkeqësuar dukshëm, por ato shprehen të vendosura për të vazhduar grevën, madje paralajmërojnë edhe masa radikale, duke hyrë në grevë urie prej ditës së hënë, datë 14 shtator.



Nënat nga Gjakova, tash e 14 ditë janë në grevë.

Nënat nga Gjakova, të cilat tash e 14 ditë janë në grevë, kanë paralajmëruar se duke filluar nga dita e sotme, do të fillojnë grevën e urisë, në shenjë pakënaqësie me mos zbardhjen e fatit të personave të zhdukur që nga përfundimi i luftës në Kosovë. Ato thonë se greva e tyre është e paafatizuar dhe ajo mund të ndërpritet vetëm pas identifikimit të një pjese të mbetjeve mortore, për çka duhet të garantojë Qeveria e Kosovës, EULEX-i dhe Komiteti Ndërkombëtar për Persona të Zhdukur (ICMP).
Dje janë bërë dy javë qëkur një grup nënash nga Gjakova kanë hyrë në grevë, në shenjë pakënaqësie me mos angazhimin e institucioneve vendore dhe atyre ndërkombëtare për zbardhjen e fatit të personave të pagjetur, si dhe për shkak të mos identifikimit të 405 mbetjeve mortore që ndodhen në kontejnerët e morgut të Prishtinës.
Gjendja e tyre shëndetësore është përkeqësuar dukshëm, por ato shprehen të vendosura për të vazhduar grevën, madje paralajmërojnë edhe masa radikale, duke hyrë në grevë urie prej ditës së hënë, datë 14 shtator.
"Pas vizitave që i bëri nënave greviste, nga presidenti i Kosovës, Fatmir Sejdiu dhe ministrja Nekibe Kelmendi është premtuar që do t'i kushtohet prioritet kësaj çështje, do t'i shfrytëzojnë të gjitha mekanizmat që mund të bëjnë për identifikimin e mbetjeve, por sot po bëhen 14 ditë. Ne ndonjë rezultat pozitiv konkret nuk e kemi pas ende dhe kështu që greva jonë duhet patjetër të ndryshojë formën e grevës", ka thënë Nysrete Kumnova nga "Thirrjet e Nënave" të Gjakovës.