Qeveria e re, 'bekimi' i fundit nga Kuvendi

Qeveria e re, 'bekimi' i fundit nga Kuvendi

Bota sot, Tiranë
Pas votimit në kuvend, kabineti i ri qeveritar do të betohet para Presidentit të Republikës.



Kryetarja e Kuvendit Jozefina Topalli


Tiranë – Kryetarja e Kuvendit Jozefina Topalli do të vendosë se kur do të thirret seanca parlamentare për miratimin e programit të Këshillit të Ministrave dhe kabinetit qeveritar të drejtuar nga Sali Berisha.
Sipas rregullores së Kuvendit, në nenin 110 të saj, pika 1 thuhet se “dita e seancës plenare për miratimin e programit politik dhe të përbërjes së Këshillit të Ministrave, në zbatim të nenit 97 të Kushtetutës përcaktohet nga Kryetarja e Kuvendit në marrëveshje më Kryeministrin”.
Presidenti i Republikës Bamir Topi dekretoi një ditë më parë kabinetin e ri qeveritar, në përbërje të të cilit janë 15 ministra, të cilët u emëruan nga kryeministri Sali Berisha. Pas dekretimit nga kreu i shtetit, lista me emrat e ministrave shkon në Parlament, për të marrë “vulën” përfundimtare, çka mund të nisin zyrtarisht detyrën e re. Gjithashtu, Kryeministri Sali Berisha do të paraqesë dhe programin ku do të bazohet qeverisja katër vjeçare e koalicionit për integrim.