Edhe LDK-ja e konsideron të mbyllur ‘protokollin’ e EULEX-it

Edhe LDK-ja e konsideron të mbyllur ‘protokollin’ e EULEX-it

Blendi Gashi, Bota Sot
“Dora e zgjatur instrumentalizuese, dashakeqe, obstruktive e shantazhuese e politikës së Beogradit zyrtar pretendon të veprojë ende në shtetin e ri të Kosovës dhe për të pretenduar për të mbajtur të gjallë termin e një Kosovë “të destabilizuar”, tha Ramë Manaj.




I pyetur se a beson se në fushatë zgjedhore do të ketë stabilitet në koalicion kur dihet se dy partitë konkurrojnë ndaras, Manaj u shpreh se koalicioni ka të bëjë me pushtetin qendror dhe LDK-ja në garën zgjedhore hyn si e vetme.

Ngjarjet e fundit në veriun e Mitrovicës, draft protokolli i EULEX-it si dhe zgjedhjet komunale të 15 nëntorit kanë qenë temat për të cilat ka folur sekretari i përgjithshëm i LDK-së, Ramë Manaj në konferencën e rregullt me gazetar, ku njëkohësisht shpalosi qëndrimet e partisë së tij për rrjedhat politike aktuale në vend. Ai tha se LDK mbështet vlerësimet dhe reagimet e institucioneve të larta të vendit për ngjarjet e fundit që kanë ndodhur në veriun e Kosovës ku një grup qytetarësh serb me protesta e dhunë janë përpjekur të pengojnë kthimin e qytetarëve shqiptarë në trojet e tyre, “Çdo përpjekje, çfarëdo dhune për të penguar të drejtat dhe liritë themelore të qytetarëve pa dallim përkatësie është e papranueshme dhe e patolerueshme”u shpreh ai. Ai vlerësoi se manifestimet e dhunës asnjëherë nuk mund të jenë zgjidhje, duke u shprehur se dhuna ka mbetur pas nesh dhe çdo manifestim i dhunës është i papranueshëm dhe lidhur me këtë secili duhet të përballet me gjyqin. “Fatkeqësisht dora e zgjatur instrumentalizuese, dashakeqe, obstruktive e shantazhuese e politikave të Beogradit zyrtar pretendon të veprojë ende në shtetin e ri të Kosovës për të penguar integrimin e serbëve në radhë të parë dhe për të pretenduar për të mbajtur të gjallë termin e një Kosovë “të destabilizuar”, tha Manaj. Ai gjithashtu tha se LDK-ja përkrah qëndrimin e krerëve të institucioneve për ta mbyllur temën e draft protokollit të EULEX-it. “Institucionet e vendit e kanë në vazhdimësi gatishmërinë të cilën po e dëshmojnë për çdo ditë, së bashku me vullnetin dhe përkushtimin për të bashkëpunim të ngushtë dhe të vazhdueshëm me EULEX-in dhe me institucionet tjera ndërkombëtare në Kosovë në interes të qytetarëve të Kosovës dhe progresit dhe zhvillimit të saj”, pohoi Manaj. Gjithashtu ai foli edhe për zgjedhjet ku tha se javën e ardhshme pritet të formohet shtabi qendror i LDK-së për të përcjellë procesin e zgjedhjeve nëpër të gjitha komunat. Ai tha se degët e LDK-së janë në vlugun e punës për të përfunduar procesin e propozimit për kryetar komunash dhe për anëtar të asambleve komunale, proces të cilin e cilësoi mjaft transparent dhe gjithëpërfshirës. Manaj beson se platforma zgjedhore e LDK-së nëpër komuna do të vlerësohet pozitivisht, sepse sipas tij ajo është mjaft e mirë, e pranueshme më përfshirëse dhe më kualitative se programet tjera”, tha ai. I pyetur se a beson se në fushatë zgjedhore do të ketë stabilitet në koalicion kur dihet se dy partitë konkurrojnë ndaras, Manaj u shpreh se koalicioni ka të bëjë me pushtetin qendror, dhe LDK në garën zgjedhore hynë si e vetme. Ndërkaq lidhur me kandidimin për kryetar të komunës së Prishtinës së Rexhep Osmanit ai tha se LDK-ja i ka bërë të qartë qëndrimin e saj sa i përket kandidaturave dhe do të propozojnë kryesitë e degëve dhe për propozimet vendos Këshilli i Përgjithshëm dhe asnjë kandidaturë jashtë kësaj procedure nuk është kandidaturë e LDK-së dhe të kandidohet si i pavarur ka të drejtë secili.