Profesorët, roje nate

Profesorët, roje nate




Një urdhëresë administrative gojore nga Ministria e Arsimit ka shkaktuar një situatë kaotike nëpër shkollat e komunës së Ferizajt. Në Shkollën e Mesme “Zenel Hajdini”, profesorët kujdestarojnë gjithë natën. Për këtë ka reaguar kryetari i Sindikatës së Arsimit, por edhe profesorët.

Nga Bardh Frangu

“Të premten në ora 13 kemi mbajtur një mbledhje urgjente me drejtorët e shkollave, ku është thënë se duhet të ketë kujdestari nëpër shkolla për 24 orë”, ka thënë zyrtari në Drejtorinë Komunale të Arsimit, Adem Muhaxhiri, i cili nuk ka mundur të komentojë më shumë, ndërsa drejtori i kësaj drejtorie gjendej në një udhëtim zyrtar.

Burime të konfirmuara mirë thonë se ka qenë një urdhëresë gojore nga Ministria e Arsimit të Kosovës për një kujdes të shtuar rreth objekteve mësimore, e nxitur nga rasti i helmimit të nxënësve në Fushë-Kosovë. Këtë urdhëresë drejtorët e shkollave në komunën e Ferizajt e kanë kuptuar në mënyra të ndryshme dhe kështu edhe kanë vepruar. Ndërsa në shumicën e shkollave barrën për këtë kujdestari ua kanë ngarkuar punëtorëve teknikë, në Shkollën e Mesme Bujqësore “Zenel Hajdini”, profesorët që nga e premtja bëjnë kujdestari gjithë natën.

“Natën e së shtunës isha kujdestar në shkollë. Të them të drejtën, kjo ma kujtoi kohën e rojeve politike që bënim në ish-sistemin”, thoshte profesori i biologjisë, Fehmi Abazi, në Shkollën “Zenel Hajdini”, ndërsa kolegët e tij krijonin humor të zi nga kjo situatë e krijuar. Drejtori i shkollës mungonte, ndërsa lista qëndronte e vendosur në murin e sallës së profesorëve, të cilët ishin të detyruar ta respektonin.

Dy ditë kujdestari nate kanë mbajtur edhe mësimdhënësit e Shkollës së Mesme Teknike “Pjetër Bogdani”, por ata kanë gjetur mënyrën që të shkarkohen nga kjo barrë. Ata janë marrë vesh që ta paguajnë një shërbëtor teknik, i cili do të kujdestarojë në emër të tyre. “Kështu jemi marrë vesh me mësimdhënësit. Objekti i shkollës sonë është nën një kulm me atë të Fakultetit Teknik, i cili i ka punëtorët e sigurimit të përhershëm të objektit”, arsyetohej drejtori Isuf Qalaj, i cili, sikundër edhe drejtorët e tjerë, nuk dinte si ta arsyetojë këtë roje nate. Nga kjo kujdestari janë kursyer vetëm femrat. Ato janë angazhuar më shumë në kujdestarinë e ditës, ndërsa kujdestarinë e natës ua kanë lënë burrave.

Kryetari i Sindikatës së Arsimit për komunën e Ferizajt, Rexhep Sadiku, për herë të parë për këtë rast ka folur për Express. “Kam pritur që për këtë të reagojë SBASHK-u. Kam pritur edhe reagimet e punëtorëve të arsimit, por nuk ka pasur. Arsimtari nuk është i obliguar që të bëjë roje nate. Ai nuk është i obliguar që të përballet me huliganët e jashtëm. Ky veprim është kundërligjor”, ka thënë kryetari i sindikatave, Rexhep Sadiku.

I pyetur për këtë situatë të krijuar, zëdhënësi rajonal i policisë në Ferizaj, rreshteri Behxhet Krasniqi ka thënë për Express: “Ne nuk kemi të bëjmë me këtë kujdestari dhe as që jemi të njoftuar me këtë. Policia pas rastit në Fushë-Kosovë ka shtuar masat e sigurisë. Kemi shtuar patrullat përreth shkollave dhe kemi ngritur shkallën e vëzhgimit”.

Ende nuk ka ndonjë vendim të qartë për këtë, ndërsa drejtorët gjenden si të munden për sigurimin e objekteve shkollore, përkundër faktit që siguria në Kosovë është e drejtë ekskluzive e KFOR-it dhe Policisë së Kosovës.