Papunësia shqetësim kryesor për qytetarët e Kosovës

Papunësia shqetësim kryesor për qytetarët e Kosovës





Prishtina


Sipas një hulumtimi të UNDP, papunësia mbetet shqetësim kryesor për qytetarët e Kosovës. Raporti i titulluar "Mozaiku i Kosovës 2009", që përfshin 6400 të anketuar, nxjerr në pah se ndryshe nga hulumtimet e mëparshme, tani të anketuarit duken të jenë më të kënaqur me mirëqenien e tyre financiare sesa në të kaluarën. Në krahasim me raportet e kaluara, të anketuarit kanë raportuar qasje shumë më të madhe në shërbimet themelore, duke theksuar kështu një arritje të rëndësishme të pushteteve lokale. Sidoqoftë, rritja e qasjes në shërbimet publike nuk duket se ndikon në kënaqshmërinë e përgjithshme me ofrimin e shërbimeve, thuhet në këtë raport që do të publikohet nesër. Të anketuarit vazhdojnë të konsiderojnë se furnizimit me energji elektrike duhet t'i kushtohet kujdes i menjëhershëm, pastaj kujdesit primar shëndetësor, mirëmbajtjes së rrugëve dhe ujësjellësit. Rezultatet po ashtu tregojnë se përderisa të anketuarit mbesin aktivë dhe dëshirojnë që zëri i tyre të dëgjohet, disa të anketuar tani preferojnë të protestojnë në rrugë në mënyrë që të arrijnë qëllimet e dëshiruara. Rezultatet e njëjta po ashtu tregojnë se, përveç papunësisë shumë të lartë, rajonet qendrore të Kosovës mbesin në gjendjen më të keqe dhe janë më pesimistët për mirëqenien e tyre ekonomike në të ardhmen. Mozaiku i Kosovës është projekt i cili realizohet për një kohë të gjatë dhe shqyrton rolin e pushtetit lokal në Kosovë. Është i krijuar për t'i kontribuar debatit të vazhdueshëm dhe reformës së pushtetit lokal duke theksuar prioritetet, vështirësitë në ofrimin e shërbimeve, gatishmërinë e njerëzve për pjesëmarrje në procesin e politikave publike dhe sinqeritetin e komunave ndaj kërkesave lokale. Mozaiku i Kosovës 2009, i përgatitur nga UNDP ja, në partneritet me USAID in, është raporti i tretë në vargun e hulumtimeve të krijuara për të matur perceptimet e qytetarëve dhe vetëdijesimin e tyre për zhvillime të ndryshme të cilat ndikojnë në jetën e tyre të përditshme dhe në ndërveprimin e tyre me pushtetin lokal. Raporti ka përfshirë realizimin e intervistave të drejtpërdrejta me 6400 të anketuar nga 33 komuna.