Thyhen zyrat e PDK-së në Vranidoll

Thyhen zyrat e PDK-së në Vranidoll

Shtabi Zgjedhor i Degës së PDK-së në Prishtinë fton organet e rendit dhe hetuesisë që të punojnë në zbardhjen e rastit, ndërsa autorët e këtij veprimi të ndëshkohen sipas ligjit.

Në fshatin Vranidoll të Prishtinës, natën midis të shtunës dhe të dielës, janë thyer dhe demoluar zyrat e Shtabit Zgjedhor të nëndegës së PDK-së në këtë fshat, njoftojnë burimet tona nga terreni. Një akt të tillë e kanë konfirmuar edhe aktivistët e kësaj partie nga ky lokalitet. “Siç njoftojnë aktivistët tanë nga ky fshat, natën e kaluar nga persona të paidentifikuar janë thyer zyrat e Shtabit Zgjedhor të Nëndegës së Vranidollit”, njofton PDK-ja me një komunikatë për opinion. Me të marrë këtë lajm, Shtabi Zgjedhor i Degës së PDK-së në Prishtinë, ka reaguar duke dënuar ashpër këtë akt, siç e quan ajo, qyqar dhe vandal, të realizuar nga një dorë e panjohur deri më tash. Shtabi zgjedhor i fton të gjithë qytetarët që të tregojnë kulturë demokratike zgjedhore dhe me sjelljet e tyre të dëshmojnë se Kosova ka kapacitete të mjaftueshme shtetërore e institucionale që të garantoj një proces elektoral civilizues e demokratik. Shtabi i Degës së PDK-së në Prishtinë fton organet e rendit dhe hetuesisë që të punojnë në zbardhjen e rastit, ndërsa autorët e këtij veprimi të ulët, të ndëshkohen sipas ligjit, thuhet në njoftimin e Zyrës për Informim të kësaj partie në Prishtinë.