Merren vesh për IBM-në dhe zyrat ndërlidhëse

nga **Agim Gashi** Wed Dec 05, 2012 12:21 pm

Merren vesh për IBM-në dhe zyrat ndërlidhëse

(I plotësuar, 5 dhjetor) - Në Bruksel sot në orët e para të mëngjesit kanë përfunduar takimet ndërmjet kryeministrit të Kosovës, Hashim Thaçi, atij të Serbisë, Iivica Daçiq, dhe përfaqësueses së lartë të Bashkimit Evropian për politikë të jashtme dhe siguri, Catherine Ashton.

Në kumtesën e zonjës Ashton, thuhet, pos tjerash, se “e kemi shqyrtuar progresin e bërë në implementimin e marrëveshjes IBM” dhe shtohet se të dy kryeministrat i kanë konfirmuar konkluzionet e grupit punuese për IBM, sipas së cilave dy porta (1 dhe 3) tash janë gati dhe do të jenë operacionale më 10 dhjetor, ndërsa dy portat e tjera (5 dhe 31) do të jenë gati më 31 dhjetor”.

Në njoftim theksohet se “të dy kryeministrat janë pajtuar që secili ta emërojë një zyrtar ndërlidhës”.

Në këtë kuadër zyrat aktuale të BE-së në Prishtinë dhe në Beograd, do të shërbejnë si zyre të oficerëve të ndërlidhjes të Kosovës në Beograd dhe të Serbisë në Kosovë.

Në njoftimin e zonjës Ashton, pas takimit Thaçi – Daçiq, me ndërmjetësimin e saj, kryeministri i Kosovës, Hashim Thaçi, “tashmë e ka krijuar një njësi speciale multietnike policore, brenda policisë së Kosovës, e cila do të ketë për detyrë ta mbroj trashëgiminë kulturore dhe religjioze”.

Kumtesa thotë se “të dy palët, poashtu, janë pajtuar që t’i shqyrtojnë mënyrat për sigurimin e rrjedhjes transparente të parave në mbështetje të komunitetit serb në Kosovë”.

Është theksuar se është arritur pajtueshmëri që në kuadër të këmbimeve të nivelit teknik, të vazhdojë puna për energji dhe telekomunikacion, në nivelin e ekspertëve dhe se të dy kryeministrat janë pajtuar për “intensifikimin e bashkëpunimit ndërmjet komisioneve përkatëse për personat e pagjetur”.

Sipas kumtesës, takimi i ardhshëm do të mbahet më 17 janar të vitit 2013.

Pas takimit kryeministri i Kosovës, Hashim Thaçi, deklaroi shkurt se është arritur marrëveshja për vendkalimet kufitare dhe se në to do të vendosen policët e Kosovës, ata të misionit EULEX dhe policët e Serbisë.

I pyetur për çështjen e pranisë së simboleve shtetërore, në vedkalime kufitare, zoti Thaçi u shpreh se “nëse serbët nuk i vendosin simbolet, nuk do t’i vendosim as ne”.

Kryeministri i Serbisë, Ivica Daçiq, ndaras, u tha gazetarëve se në bisedime është arritur marrëveshja që deri në fund të muajit dhjetor të funksionojnë katër “vendkalime administrative”, siç shprehen zyrtarët e Serbisë për vendkalimet kufitare ndërmjet Serbisë dhe Kosovës.

Sipas tij, do të funksionojnë vendkalimet në Konçul, Merdarë, Jarinjë dhe Bërnjak.

* * * * *

Takimi i tretë Thaçi-Daçiq, tema kryesore IBM

Kryeministri i Kosovës, Hashim Thaçi, takon sot në Bruksel kryeministrin e Serbisë, Ivica Daçiq.

Takimi, nën praninë edhe të shefes për politikë të jashtme të Bashkimit Evropian, Catherine Ashton, është i treti me radhë midis dy kryeministrave.

Në krye të agjendës së sotme është thënë se do të jetë zbatimi i Marrëveshjes për Menaxhimin e Integruar të Kufirit, të njohur si IBM.

Kosova dhe të Serbia kanë arritur këtë marrëveshje qysh në muajin shkurt, por zbatimi i saj ka ngecur.

Takimet e nivelit të lartë janë parë si mundësi për përmirësimin e marrëdhënieve në mes të dy shteteve.

Bashkimi Evropian ka thënë se përparimi në bisedime do të avancojë përpjekjet e Kosovës dhe të Serbisë, për të lëvizur përpara drejt integrimit në këtë bllok.

Takimi i parë Thaçi-Daçiq është zhvilluar më 19 tetor, ndërsa i dyti më 7 nëntor.

Protestë në Jarinë

Disa dhjetëra serbë janë mbledhur sot në Jarinë, për të shprehur pakënaqësinë e tyre ndaj bisedimeve që po zhvillohen sot në Bruksel, mbi zbatimin e marrëveshjes për Menaxhimin e Integruar të Kufirit.

Marrëveshja në fjalë pritet të nis së zbatuari më 10 dhjetor të këtij viti.

Protesta thuhet se po mbahet në zonën e ndërmjetme ndërmjet Kosovës dhe Serbisë, më saktësisht në magjistralen Leposaviq – Rashkë.

Protestuesit kanë nisur të tubohen me makina në drejtim të Jarinës, pasi janë dëgjuar sirenat që në orët e hershme të mëngjesit.

Në këtë pjesë të territorit të Kosovës, sirenat rëndom shërbejnë si thirrje për protestë.

Nuk ka ende asnjë njoftim zyrtar nga autoritetet e rendit në Kosovë mbi këtë tubim të sotëm.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30