Syla paraqet padi në prokurori

Syla paraqet padi në prokurori




Azem Syla, anëtar i Kryesisë së PDK-së dhe ish-komandant i Shtabit të Përgjithshëm të UÇK-së, ka ngritur kallëzim penal ndaj Nazim Bllacës nga Ribari i Madh i Lipjanit, i arrestuar dje nga Policia e Kosovës.

“Në kuptim të dispozitës së nenit 198 al.1 të Kodit të Procedurës Penale të Republikës së Kosovës (KPPK) dhe duke ju bashkangjitur njoftimin tim për media të datës 30.11.2009 paraqes kallëzim penal për të gjitha veprat penale që ndiqen sipas detyrës zyrtare e që i ka kryer Nazim Bllaca nga fshati Ribar i Madh - Komuna e Lipjanit, i cili më 30.11.2009 është arrestuar nga Policia e Kosovës”, thuhet në kërkesën drejtuar Prokurorisë Publike të Qarkut në Prishtinë (Kryeprokurorit Osman Kryeziu) dhe Prokurorisë Speciale të Republikës së Kosovës në Prishtinë (Kryeprokurores Elisabeth Arnal).

Syla, i cili është apostrofuar nga Bllaca si urdhërdhënës i tij në një numër rastesh të vrasjeve dhe tentimvrasjeve, që sipas tij janë organizuar nga SHIK-u në periudhën e pasluftës, kërkon nga prokuroria ta njoftojë mbi epilogun e hetimeve zyrtare nga ana e saj.

“Arsyeja e kërkesës sime që të më njoftonin mbi epilogun e hetimeve të juaja zyrtare është që pas përfundimit të hetimeve zyrtare kundër Nazim Bllacës, unë do të ndërmarr veprime të caktuara juridike dhe ligjore në mbrojtje të dinjitet tim, për shkak të shpifjeve dhe gënjeshtrave të cilat me deklarimet e tij më 29.11.2009 i ka plasuar në media-opinionin kosovar, i paraqituri”.

Syla e ka autorizuar avokatin Tomë Gashi që ta përfaqësojë në Prokurorinë Publike të Qarkut në Prishtinë, Prokurorinë Speciale të Republikës së Kosovës në Prishtinë, në të gjitha gjykatat kompetente në Kosovë në çështjen penale kundër Nazim Bllacës.