KQZ rishpall zgjedhjet vetëm në Prizren e Lipjan, rinumërim në Gjilan

KQZ rishpall zgjedhjet vetëm në Prizren e Lipjan, rinumërim në Gjilan



Komisioni Qendror i Zgjedhjeve vendosi të shpallë rivotim në komunën e Prizrenit dhe atë të Lipjanit, ndërsa për komunën e Gjilanit shumica e anëtarëve të KQZ-së votuan që, fillimisht të zhvillohen hetimet e shkeljeve të supozuara elektorale nga përfaqësues të KQZ-së, të rinumërohen votat dhe pastaj të merret vendimi pro apo kundër përsëritjes së zgjedhjeve lokale për këtë komunë.
Këtë e bëri të ditur kryetarja e KQZ-së, Nesrin Lushta, pas mbledhjes së këtij institucioni.
“U vendos që të bëhet rivotimi në dy komuna, pra në komunën e Prizrenit dhe të Lipjanit, ndërsa në komunën e Gjilanit të mos bëhet rivotimi, por së pari të bëhet hetimi dhe rinumërimi nga ana e KQZ-së. Pastaj, nga rezultati që do të arrihet, të vendoset a ka nevojë për rivotim, apo jo”, tha Lushta.
Votimi për Prizrenin në KQZ përfundoi me 8 vota për, 2 kundër dhe një abstenim, ndërsa me 7 vota pro, 2 kundër dhe një abstenim u vendos që të shpallet rivotim edhe në Lipjan.
Vendimi i KQZ-së erdhi pas diskutimeve intensive dhe pas marrjes së një interpretimi më të hollësishëm nga Komisioni Zgjedhor për Ankesa dhe Parashtresa për vendimin e 19 dhjetorit të këtij organi.
Me këtë vendim, KQZ-ja udhëzohej të urdhërojë rivotimin në tri komuna, ku, pas shqyrtimit të 43 ankesave nga KZAP-i, thuhej se janë evidentuar shkelje dhe parregullsi të shumta, të cilat, siç thuhet, nuk do të mund të rregulloheshin me anulim të këtyre vendvotimeve.