E hëna e zezë

E hëna e zezë


Nga Express më 27.01.2009 në ora 17:34

Kjo javë ka nisur me një goditje të madhe në tregun e punës në SHBA, pasi që të hënën fabrikat e ndryshme kanë kumtuar largimin e 72.300 punëtorëve.

Së paku gjashtë subjekte prodhues e e shërbyese kanë publikuar programet për shkurtimin e shpenzimeve, ku kryesisht bëhet fjalë për dëbimin e punëtorëve. Që nga fillimi i këtij viti janë mbyllur 200.000 vende pune, ndërsa vjet 2,6 milionë amerikan kanë humbur vendet e punës.

“E tëra ndodh për shkak të konsumatorëve, të cilët janë goditur rëndë. Dobësimi i tyre jep shkas për dëbiem nga puna, kurse kjo edhe më shumë zvogëlon konsumin”, ka deklaruar për Reuters-in, Robert Brusca, ekonomisti kryesor i shtëpisë konsultative “Fact & Opinion Economics”.

Gjiganti farmaceutik “Pfizer” ka paralajmëruar largimin e 26 mijë punëtorëve, përderisa vjet kishte dëbuar 4.700 të tjerë. Prodhuesi i pajimeve për ndërtimtari “Caterpillar” do të shkurtoj 20.000 vende pune , “ për shkak të ambientit shumë të rëndë për biznes”. Kompania e telekomunikimit “Sprint Nextel Corp” do të ketë 8.000 punëtorë më pak, kompania tregtare “Home Depot” - 7 mijë, kurse “Texas Instruments” dëbon 3.400 punëtorë. Për shkak të shitjes së dobët në gjashtë javët e fundit korporata automobiliste “General Motors” ka kumtuar se do të largoj dy mijë punëtorë në fabrikat në Miçigen dhe në Ohajo.

Ndërkaq, në anën tjetër të botës, në Itali menaxheri kryesor i prodhuesit të automobilave “Fiat”, Sergio Marchionne ka vlerësuar se do të vijnë në pikëpyetje 60 mijë vende të punës, poqese qeveria nuk ndihmon këtë sektor.