LDD Gjermani: NUK JEMI MË PJESË E NJË SUBJEKTI POLITIK KU DEMOKRACIA PARTIAKE DHE MENDIMI NDRYSHE NGULFATËN PËR ÇDO DITË..!

nga **Agim Gashi** Mon May 10, 2010 9:52 pm

NJOFTIM PËR MEDIA

Dega e LDD-së në Gjermani ndërpretë aktivitetin politik me të gjitha format e organizimit të saj dhe definitivisht largohet nga LDD-ja

NUK JEMI MË PJESË E NJË SUBJEKTI POLITIK KU DEMOKRACIA PARTIAKE DHE MENDIMI NDRYSHE NGULFATËN PËR ÇDO DITË..!

Arroganca politike, vetëkënaqësia si dhe frika nga të tjerët nuk janë dhe as mund të jenë vlerat tona!
Duke u nisur nga parimet themelore të demokracisë dhe pluralizmit partiak, duke iu përmbajtur rregullave dhe principeve shoqërore që përcaktojnë lirinë e veprimit politik, qoftë në atdhe apo jashtë tij, pastaj marrë parasysh faktin se bashkërisht me një numër të madh rugovistë ndërtuam subjektin e ri politik, Lidhjen Demokratike të Dardanisë (LDD), kishim bindjen e plotë se kjo parti e dalë nga LDK-ja dhe e udhëhequr nga një akademik do të jetë trashëgimtare dhe bartëse e mirëfilltë e filozofisë politike rugoviane.

Ndaj, nisur nga këto motive neve, por edhe shumica e veprimtarëve politikë nga Evropa dhe SHBA-të, u rreshtuam në formimin e kësaj partie, e që pikërisht ishin këta njerëz të cilët në fund të 80-tave dhe në fillim të vitit 1990-të kishin qëndruar të palëkundur përkrah alternativës së parë demokratike të asaj kohe, pranë LDK-së, të udhëhequr nga lideri i saj historik dr. Ibrahim Rugova. U rirreshtuam në LDD për të ndërtuar një subjekt të ri politik të cilin siç dihet na e imponuan rrethanat, me shpresën dhe besimin e plotë se kështu po i kontribuonim zhvillimit të më tejmë të demokracisë, pavarësisë dhe lirisë në Kosovë.
Mjerisht, me kalimin e kohës u pa qartë se rreshtimi dhe ndihmesa që i dha mërgata politike N. Dacit për formimin e LDD-së kishte qenë një gabim i madh politik, sepse shihej qartë se koncepti kombëtar dhe politik i shumicës së veprimtareve tanë në mërgim kundrejt “konceptit Daci” po dallonin në esencë dhe diametralisht. Meqenëse ne si mërgatë kemi kontribuar me të gjitha mjetet për një shtet të pavarur dhe demokratik, në të cilin fjala dhe mendimi i lirë do të ishin vlerat qenësore të tij, pra jemi angazhuar që të kemi një shoqëri dhe një sistem të mirëfilltë pluralist-demokratik, gati për dy dekada rresht të gjitha angazhimet tona i kemi bashkërenditur mjaft mirë me dr. Rugovën dhe atë në formën më të ndershme dhe më të sinqertë, për dallim nga z. Daci, i cili që në fillim të themelimit të partisë kërkoi nga mërgata vetëm mjete financiare, që binte ndesh fund e krye me rrethanat aktuale në Kosovë, meqë dihet se partitë parlamentare financohen nga buxheti i Parlamentit të Kosovës. Madje, ky mentalitet i tij binte në kundërshtim të plotë me kulturën, normat dhe rregullat e shtetit ligjor dhe demokratik. Këto, si dhe shumë shkaqe tjera bënë që kohë më parë nga LDD-ja të largohet z. Agim Rexhaj, një veprimtar i dalluar i çështjes sonë kombëtare si dhe ish kryetar i Degës së LDK-së dhe i LDD-së, por u larguan edhe shumë figura eminente të mërgatës të cilët në heshtje u anashkaluan nga kryetari dhe kryesia e LDD-së, disa prej të cilëve madje nga kreu i LDD-së u quajtën edhe “nderi i kombit”!?
Dhe, së fundi ideja e përafrimit dhe bashkimit të LDD-së me LDK-në, dëshirë kjo e kahmotshme e shumë veprimtarëve tanë, e mbështetur fuqishëm nga z. H. Gagica, si formë e vetme e forcimit dhe zhvillimit të demokracisë në vend, po ashtu ra ndesh me konceptin e Dacit dhe bashkëmendimtarëve të tij, i cili ndërmori masa denigruese ndaj disa veprimtarëve të dalluar të çështjes sonë kombëtare. Mbase, mbledhja e Këshillit Kombëtar të LDD-së dhe vetë Konventa e dytë, ishin dy takime që i ngjasonin plotësisht plenumeve të jashtëzakonshme, ku disave iu prenë kokat dhe disa të tjerë u avancuan, meqë rast u vërtetua edhe njëherë se demokracia në njërën anë, dhe autokracia e Dacit me bashkëmendimtarët e tij në anën tjetër, janë dy antipode të kundërta, gjë që kjo u dëshmua në vepër sidomos pas largimit të gazetarëve jashtë sallës ku zhvillonte punimet takimi i mbyllur i kësaj partie. Akti i fundit antistatusor dhe tejet i ulët ndaj kryetarit të Degës sonë fletë katërçipërisht për mungesë morale dhe parimesh brenda subjektit politik të cilit i kemi takuar për tri vite me radhë. Prandaj, pa dashur që t’i elaborojmë më tej gjërat që kanë të bëjnë me kreun autokrat të LDD-së, etj, Kryesia e Degës së LDD-së në Gjermani së bashku me të gjitha nëndegët dhe komisionet përkatëse në mbledhjen e vetë të mbajtur me datën 02. 05. 2010 në Heilbronn si dhe pas konsultimeve të bëra me datën 08. maj 2010 me të gjithë anëtarët e kryesisë dhe kryetarët e nëndegëve (hiç këtu kryetarin e nëndegës në NRW, dhe nënkryetar i Degës), morën vendim të prerë që të largohen nga Lidhja Demokratike e Dardanisë. Andaj, deklarojmë edhe njëherë se më nuk jemi anëtarë të LDD-së, aty ku demokracia e brendshme partiake si dhe mendimi ndryshe ngulfatën çdo ditë nga vetë kreu i kësaj partie..!

Më poshtë pasojnë emrat e anëtarëve të kryesisë, kryetarëve të nëndegëve dhe anëtarëve të Komisionit për informim:

Hafiz Gagica, kryetar,
Naim Gashi, nënkryetar i parë,
Ismet Krasniqi, nënkryetar,
Nail Rexhaj, sekretar i përgjithshëm,
Emin Demaj, arkëtar i Degës,
Emrush Çekaj, sekretar për financa,
Shefki Jakupi, anëtar i kryesisë dhe kryetar i nëndegës në Stuttgart,
Nazmi Cakolli, anëtar i kryesisë dhe kryetar i nëndegës në Saarland,
Nexhat Kameraj, anëtar kryesie dhe kryetar nëndege për Hamburg,
Isak Bashota, anëtar kryesie,
Enver Sinani, anëtar kryesie,
Shaban Bobaj, anëtar kryesie,
Fatmir Bajraj, anëtar kryesie,
Xhafer Leci, anëtar kryesie dhe koordinator për nëndegët në Baden Württemberg,
Osman Doda, anëtar kryesie dhe kryetar i nëndegës në Heilbronn,
Ramiz Kelmedi, anëtar i kryesisë së nëndegës në NRW,
Smajl Rabushaj, kryetar i nëndegës në Essen,
Skënder Ukaj, anëtar i kryesisë dhe i nëndegës në Bauern,
Bajram Osmani, kryetar i nëndegës për Bodensee-Oberschwaben,
Daut Beqiraj, nga nëndega e Bajern-it, anëtar i Komisionit për Informim,
Mentor Thaçi, anëtar i Komisionit për Informim,
Halil Rrustemaj, anëtar i Komisionit për Informim,
Rexhep Elezaj, kryetar i Komisionit për Informim.

Stuttgart, 09. Maj 2010

by LD Gjermani fb/ boss

LDD Gjermani: NUK JEMI MË PJESË E NJË SUBJEKTI POLITIK KU DEMOKRACIA PARTIAKE DHE MENDIMI NDRYSHE NGULFATËN PËR ÇDO DITË..! 31217_402550208680_187205523680_4058363_2319219_n

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30