Blair Doktor Nderi i UP-së

nga **Agim Gashi** Fri Jul 09, 2010 3:56 pm

Blair Doktor Nderi i Universitetit të Prishtinës

Publikuar: Sot, më 09 korrik 2010 Blair Doktor Nderi i UP-së Tb09bfcce1da90

Prishtinë, 9 korrik – Ish-kryeministri i Britanisë së Madhe, Tony Blair është shpallur sot Doktor Nderi i Universitetit të Prishtinës. Në këto momente ai po takohet me qytetarë të Kosovës para Tetarit Kombëtar.
Unë dhe vendi im do të jemi përkrah jush në rrugën tuaj drejt së ardhmes, sot dhe përgjithmonë, ka thënë ish-kryeministri i Britanisë së Madhe me rastin e pranimit të çmimit “Doctor Honoris Causa”, të ndarë nga Universiteti i Prishtinës.
Çmimi “Doctor Honoris Causa”, ish-kryeministrit Tony Blair i është dorëzuar të premten për kontributin e madh të dhënë për lirinë e Kosovës.
Me këtë rast Blair tha se marrja e këtij çmimi është një nder i madh për të, dhe pohoi se gjatë studimeve nuk ka qenë aq student i mirë, kurse për mikun tjetër të Kosovës, Bill Clinton, tha se ka qenë student i shkëlqyeshëm.
“Kur kam qenë unë në universitet, kam qenë pak më shumë i interesuar për rokënrolin, se për studimet”, tha Blair, kurse në moshën e mëvonshme e kam kuptuar se sa i rëndësishëm është arsimi.
Ai pohoi se njerëzit e rinj që edukohen në Kosovë, do të jenë udhëheqësit e ardhshëm të vendit dhe cilësia e tyre do të përcaktojë të ardhmen e vendit.
Ai foli edhe për vendimin që është marrë 11 vjet më parë për të ndërhyrë ndaj caqeve ushtarake serbe.
“E mbaj mend, shumë vite më herët morëm ato vendime që i morëm, duke mos ditur se cili është rezultati, por duke e ditur se nëse nuk do të përballemi me atë sulm, nuk do të meritonim emrin e civilizimit të madh”, pohoi Blair, ndërsa premtoi se nëse do të ketë ndonjë rol për ta ndihmuar Kosovën, do ta kryej me kënaqësi.
“Unë dhe vendi im do të jemi përkrah jush në rrugën tuaj drejt së ardhmes, sot dhe përgjithmonë”, premtoi Blair.

I cilësuar si mik dhe hero i Kosovës për kontributin e dhënë gjatë fillimit të fushatës ajrore të NATO-s mbi caqet ushtarake serbe të Millosheviqit, që më pas solli lirinë dhe pavarësinë e sotme të Kosovës, Toni Bler po pritet në Prishtinë me nderimet më të mëdha.

Ndërsa u shpall Doktor Nderi i Universitetit të Prishtinës, Blair tha se para 11 vjetësh kishte parë një Kosovë të rrënuar e me plot sfida të luftës. Kurse sot, ai tha se po shihte një Republikë, shtet të ri, ku njerëzit po e mirëpresin me ngrohtësi.

“Më kujtohet koha, para disa viteve më parë, kur ne i morëm ato vendime, pa e ditur se cilat do të jenë rezultatet, por duke e ditur se nëse nuk do të vepronim, rreziku do të ishte më i madh dhe nuk do të meritonim emrin e civilizimit më. Pra, vepruam dhe jam shumë krenar që e bëmë këtë”, tha Toni Blair.

Ai tha se ndihej krenar që ishte ndër të parët që mbështeti intervenimin e NATO-s, që çoi deri te çlirimi i Kosovës.

“Është një vend i madh ky shtet i pavarur i Kosovës dhe do ta bëni edhe më të madh ju vetë”, tha Tony Blair, duke ofruar edhe angazhimin e tij nëse kjo shihet e domosdoshme për të mirën e Kosovës.

Ndërkohë, ministri i Arsimit, Enver Hoxhaj, rikujtoi ditët e fundit të luftës së vitit 1999, kur Kosovës po i shtoheshin shpresat e lirisë, kurse emri i kryeministrit Tony Blair ishte bërë tashmë një nga ikonat e kësaj lirie.

“Sot, para 11 vjetësh, një ushtar i paushqyer, me një pushkë dhe përplot zemër, luftonte për lirinë e popullit të vet. Sot, para 11 vjetësh, një nënë, përveç mbijetesës së minutave të fundit të luftës, kishte edhe një hall, se si ta pagëzonte djalin që lindi në mal. Mendja i shkoi që ta pagëzonte në Çlirim apo në Shpëtim. Por, ajo gjeti një emër që personifikonte edhe çlirimin, edhe shpëtimin - vendosi ta pagëzonte djalin e saj me emrin Toni Bler”, tha Hoxhaj.

Ish-kryeministri Tony Blair vazhdoi agjendën me takimin dhe fjalimin e mbajtur para Kuvendit të Kosovës, si dhe një takim me qytetarët në qendër të Prishtinës.

Dje, presidenti Fatmir Sejdiu i ndau atij “Medaljen e Artë të Lirisë”, kurse kryeministri Hashim Thaçi i dhuroi një kopje e “Deklaratës së Pavarësisë së Kosovës”.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30