Shehu: Azemi nuk bindej kollaj dhe nuk respektonte klishetë

nga **Agim Gashi** Mon Sep 13, 2010 12:43 am

Shehu: Azemi nuk bindej kollaj dhe nuk respektonte klishetë

Deputeti i Partisë Demokratike, Tritan Shehu, flet për përplasjen mes kësaj partie dhe liderit të dhjetorit Azem Hajdari. Kjo përplasje filloi në vitin 1995, kulmoi në 1996 për të përfunduar në 1997, gjatë kësaj kohe Shehu ishte kryetar i PD-së, ndërsa Berisha President i vendit. Ai nuk preferon ta quajnë përplasje, sipas tij në PD-në ka vetëm një të vërtetë, kontributi i Azem Hajdari që ka dhënë për këtë parti dhe për Shqipërinë. Gjithë përplasjen që Hajdari pati me PD-në, Shehu e përfshin me dy fjalë "Azemi nuk ishte një njeri që bindej kollaj, apo që respektonte lehtë klishetë e standardeve". Tritan Shehu, shprehet se edhe gjatë periudhës së vështirë së Azemit me PD-në, ai nuk i ka prishur këto marrëdhënie me vetë partinë dhe këtë e tregoi në 1997, kur Azemi u angazhua që kjo parti të përballonte "rebelimin komunist".

Zoti Shehu, ju keni qenë në nivelet më të larta të PD-së në vitet 1992-97, kohë kur pati dhe përplasje të asaj partie me zoti Hajdari, çfarë mund të na thoni?

Përplasje?! Unë nuk do të thosha kështu. Zoti Hajdari ka qenë gjithmonë një nga figurat më të rëndësishme të PD-së, gjatë gjithë atyre viteve. Kjo nuk ka qenë asnjëherë e lidhur me postin konkret të tij në parti. Ai ka qenë dhe do të them pa hezitim, është gjithmonë një simbol për partinë tonë. Ai qëndron në piedestal të përmbysjes së komunizmit dhe të proceseve demokratike te ne. Ky ka qenë e është gjithmonë qëndrimi ndaj veprës së tij. Meritat e kontributi i tij, veçanërisht për ne që ishim së bashku me atë që nga fillimi i lëvizjeve anti-komuniste në Shqipëri, janë të paçmuara. Si i tillë ai ka pasur dhe do ketë një aureolë të veçantë jo vetëm në PD, por në tërë historinë e ndryshimeve të mëdha demokratike të vendit tonë në këto vite. Kjo është e vërteta dhe kjo nuk ndryshon.

Atëherë si i konsideroni qëndrimet e tij, kritikat ndaj qeverisjes, marrëdhëniet me sindikatat, apo dhe të PD-së, që u mbajtën ndaj tij disa herë në ato vite?

Unë e theksova dhe më lart, se pavarësisht nga postet konkrete, që ai mbante në piramidën tonë partiake, Azemi ka qenë gjithmonë një simbol për PD-në. Kjo është shprehur qartësisht nga të gjithë dhe personalisht nga Berisha në mënyrë eksplicite apo nëpërmjet fakteve e qëndrimeve konkrete. Sidoqoftë çdo gjë duhet parë në kontekstin e momenteve, të situatave të periudhave, të rrethanave. Azemi, ka qenë një njeri i veçantë, gjithmonë kërkues i ndryshimeve, gjithmonë në luftë për ato. Kjo veti disa herë mund ta vinte dhe në pozicione kundërshtuese apo kritikuese. Azemi nuk ishte një njeri që bindej kollaj, apo që respektonte lehtë klishetë e standardeve. Nga ana tjetër, ai gjithmonë kërkonte hapësira të reja veprimi. Në të vërtetë vetëm njerëz të tillë, me të tillë temperament e energji, mund të realizonin vepra të mëdha, si ato që realizoi ai. Prandaj unë mendoj se, nuk mund të flasim për detaje por për kontekstin e madh të asaj, që bëri Azemi për Shqipërinë dhe lirinë tonë, që nga lëvizja e dhjetorit.

Po më tej, marrëdhëniet e tij me PD-në do të ftoheshin, gjë që u tregua me disa masa që u morën ndaj tij, duke shkuar deri në kërkesën për heqje imuniteti?

Jo, kjo nuk është e vërtetë. Këto marrëdhënie nuk u dobësuan asnjëherë dhe nuk u lidhën asnjëherë me poste konkrete. Azemi qëndronte mbi këto gjëra. Ai, si thashë, ishte dhe është gjithmonë një pjesë shumë e rëndësishme jo vetëm e PD-së, por e të gjithë zhvillimeve shqiptare. Dhe kjo falë të gjitha vetive e karakteristikave të tij, guximit, dëshirës, shpirtit të madh, qartësisë së mendimit, energjive të pashtershme. Kjo falë dhe vetive të tij jo konformiste ndaj realiteteve të ndryshme, por gjithmonë shtytëse për ndryshim. Kjo ka qenë e është e rëndësishme e determinuese dhe në marrëdhëniet e tij me bashkëpunëtorët apo strukturat. Ai gjithmonë, nga të gjithë, ka qenë nga njerëzit më të respektuar.
Nga ana tjetër dua të theksoj dhe rolin shumë të rëndësishëm, që luajti Azemi gjatë fushatës elektorale, shumë të vështirë, dhe më tej të vitit 1997. Ai në ato momente të 1997-ës ishte një promotor i luftës, që PD-ja po bënte për të përballuar rebelimin komunist. Unë gjatë asaj fushate kam punuar shumë ngushtë me atë. Me këtë rast dëshiroj të vë në dukje dhe atë që në pozicionin, që kisha e konstatoja çdo ditë në ato muaj të vështirë, vlerësimin e madh që Berisha kishte për Azemin, rolin që ai i jepte dhe i njihte atij. Kjo është e vërteta e madhe. Elementë të tjerë shumë marginalë e të përkohshëm nuk kanë asnjë vlerë në një kontekst të gjerë dhe sidomos kur flitet për veprën e një njeriu të madh si Azemi.

Ju e njihni Azemin që nga dhjetori i 1990, nga pozicione të ndryshme, si kanë qenë marrëdhëniet tuaja direkt me atë?

Gjithmonë kanë qenë shumë të mira e miqësore. Është krejt e vërtetë se këto marrëdhënie nuk u lëkundën kurrë. Në të gjithë këto vite ato ngelën të tilla. Unë e njoha Azemin që në fillimin e lëvizjeve studentore dhe në vazhdimësi pa ndërprerje. Pa dyshim në gjithë ato vite ka momente e rrethana shumë të afërta në këtë bashkëpunim të ngushtë e konstant. Megjithatë gjithmonë ai ka qenë i njëjti, ashtu si ishte në fillimin e lëvizjeve. Dinamizmi i tij, afërsia me njerëzit, aftësia për të afruar e mobilizuar në çdo rrethanë ata, guximi i palëkundur, mënyra e drejtpërdrejtë e të shprehurit të gjërave etj. Kanë qenë gjithmonë tiparet e tij dalluese. Dëshiroj të përsëris dhe një herë faktin, që këto tipare të tij spikatën përsëri me shumë forcë, në periudhën e ngjarjeve të 1997-ës.

Po marrëdhëniet e Berishës me atë?

Gjithmonë të palëkundura e shumë të mira. Për Azemin, Berisha ishte shumë i çmuar. Kjo shprehej në çdo fjalë apo veprim të tij. Me këtë rast dëshiroj të rikujtoj me kënaqësi nofkën, me të cilën ai e quante me shumë respekt Berishën gjithmonë: "Marshalli". Me këtë ai në të vërtetë shprehte gjithë respektin e konsideratën e tij. Të njëjtin vlerësim të madh unë kam gjetur dhe të Berisha për Azemin, kurdoherë. Këtë e kam konstatuar që nga viti 1990 dhe në vazhdim. Ngjarjet e vitit 1997, bashkëpunimi i ngushtë në përballimin e asaj situate shumë të rëndë, e rikonfirmuan qartë e pa asnjë lëkundje këtë gjë. Kjo është e vërteta, të cilën unë kam pasur mundësi ta përjetoj nga shumë afër. gi.bu

Gazeta Shqiptare - Për ZSH: Gjergj Kabashi

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30