Ministrat e LDK-së dorëzojnë detyrat

nga **Agim Gashi** Mon Oct 18, 2010 6:23 pm

Ministrat e LDK-së dorëzojnë detyrat

(E plotësuar) Zëvëndskryeministri, Ramë Manaj, gjashtë ministrat dhe zëvëndësministrat e LDK-së në qeverinë e udhëhequr nga Hashim Thaçi, dorëzuan postet e tyre ashtu siç kishin njoftuar dy ditë më parë. Dorëzimin e posteve ata e bënë në mënyrë individuale tek sekretarët e përhershëm të ministrive përkatëse. Në këtë mënyrë edhe zyrtarisht shënohet fundi i koalicionit qeveritar ndërmjet LDK dhe PDK-së. Njëri nga ministrat e LDK-së në largim, ai i pushtetit lokal Sadri Ferati deklaroi:
“Kisha sugjeruar që asgjë të mos ndalet, por të vazhdojë puna. Kosovën e presin procese të ndieshme, sidimos ato që lidhen me veriun, me dialogun me Serbinë dhe të gjitha institucionet duhet të bëjnë punën e tyre”, tha Ferati.
Ndërkohë, nga Partia Demokratike e Kosovës e kryeministrit Hashim Thaçi nuk ka ende ndonjë reagim.
Përkohësisht, Qeveria Thaçi mund të vazhdojë një lloj qeverisjeje me zëvendësministrat që do të mbeten në funksione.
Anëtarët e Qeverisë nga radhët e Lidhjes Demokratike të Kosovës, sipas zëvendëskryeministrit Ramë Manaj, po i dorëzojnë detyrat dhe nga dita e hënë përfundon partneriteti qeverisës PDK-LDK
“Ministrat do të bëjnë dorëzimin e detyrave sekretarëve permanentë, me procesverbal, dhe ky është akti juridik i dorëzimit”, ka deklaruar Manaj.
Që nga dita e sotme, kur LDK-ja edhe zyrtarisht tërhiqet nga koalicioni qeverisës, topi është në anën e PDK-së dhe kryeministrit Thaçi që të reagojë konform situatës dhe të sjellë një vendim, qoftë ai edhe për mocionin e votëbesimit të Qeverisë që do të pasonte edhe me shpërndarjen e Kuvendit dhe nisjen e procedurave për zgjedhjet e jashtëzakonshme.
Në Qeverinë Thaçi, LDK-ja ka pasur një zëvendëskryeministër, pesë ministra dhe disa zëvendësministra.
Përderisa PDK-ja, si partia më e madhe, është deklaruar se nuk do ta mbështesë formimin e qeverisë teknike, zgjidhje e vetme mbetet procesi i zgjedhjeve të jashtëzakonshme.
Se si do të shkohet në këtë proces, ka disa mënyra që parashihen edhe me Kushtetutë.
Një prej opsioneve më të mundshme është ai i mocionit të votëbesimit të Qeverisë, që mund të ndërmerret me nismën e kryeministrit Hashim Thaçi, apo një grupi deputetësh.
Me votëbesimin e Qeverisë, pason shpërbërja edhe e Kuvendit dhe nisja e afatit për zgjedhje të jashtëzakonshme, që, sipas Kushtetutës, duhet organizuar jo më herët se 30 ditë, apo jo më vonë se 45 ditë që nga data e shpërbërjes së legjislativit.
Zgjedhjet e jashtëzakonshme, megjithatë, pritet të sfidojnë Komisionin Qendror të Zgjedhjeve, i cili do të duhet të nisë tash një proces të shpejtë zgjedhor.
Kurse, nga aspektet tjera, mbetet e paqartë se si do të veprohet me buxhetin e vitit 2011, i cili nuk është i miratuar dhe me shpërndarjen e Kuvendit do të mbetet si i tillë.

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30