AKR, AAK e LDD në kërkim të rrugës për dalje nga kriza

nga **Agim Gashi** Thu Oct 21, 2010 8:34 pm

AKR, AAK e LDD në kërkim të rrugës për dalje nga kriza

Subjektet politike janë afër zgjidhjes për daljen nga kriza politike dhe institucionale që ka kapluar vendin pas daljes së Lidhjes Demokratike të Kosovës nga koalicioni me Partinë Demokratike të Kosovës. Në vazhdën e konsultave, anëtarët e Kryesisë së Kuvendit dhe shefat e grupeve parlamentare kanë pasur të enjten një drekë me kryeparlamentarin dhe presidentin në detyrë Jakup Krasniqi.
Në këtë takim, si? ka bërë të ditur kreu i Lidhjes Demokratike të Dardanisë Nexhat Daci ka pasur një konsensus të të gjitha partive për daljen sa më shpejtë nga agonia institucionale dhe politike në të cilën është futur Kosova.

Daci ka dalë i inkurajuar nga kjo drekë, duke thënë se asnjë prej përfaqësuesve të partive nuk ka gjetur ndonjë argument shtesë për të prolonguar zgjidhjen e krizës.
“Në qoftë se zorra qorre fillon të dhembë dhe nuk merren masat e duhura në kohë, pëlcitja e saj i përlyen gjithë zorrët tjera dhe organizmin. Prandaj ne po mundohemi në atë aspekt dhe me amandamentimin e Ligjit për zgjedhjet ne mund t’i ikim edhe vjedhjes së votave, dhe jemi edhe afër konsensusit edhe për këtë. Prandaj unë dua të jap një optimizëm që ne jemi afër një marrëveshjeje konsensuale të të gjitha partive parlamentare”, ka thënë Daci.

Ndërkohë, kryetari i AKR-së, Behgjet Pacolli, të cilit i është refuzuar ftesa për takim nga ana e LDD-së dhe AAK-së, ka thënë se kryeministri Hashim Thaçi është i pari i vendit dhe është përgjegjësi e tij të dalë para opinionit dhe të informojë se çka ka ndodhë ditëve të fundit.
“Kryeministri është duke u vonuar që nuk del para publikut, para qytetarëve, është detyrë e tij që të shpjegojë për situatën gjegjësisht për rrugën që ai do të ndërmerr më tutje dhe e ftoj edhe njëherë kryeministrin e Kosovës që të mos hezitojë, por të del dhe t’u shpjegojë qytetarëve për situatën e krijuar. Është i pari i vendit dhe është përgjegjësi e tij që të informojë qytetarët e Kosovës se çka po ndodhë këtu”, ka thënë Pacolli.

Nga ana tjetër, edhe Aleanca për Ardhmërinë e Kosovës si duket ka filluar të ndërrojë kursin e qëndrimit karshi zgjedhjeve. Anëtarja e kryesisë së kësaj partie, Donika Kada-Bujupi ka thënë se AAK-ja është për çfarëdo zgjedhje.
“Po bëhemi gati për zgjedhjet parlamentare që janë proklamuar për datën 13 shkurt, mirëpo jemi të gatshëm që në çfarëdo kohë, kurdo që mbahen zgjedhjet, të marrim pjesë dhe të fitojmë”, ka thënë ajo.
Ndërkohë partitë e vogla jashtëparlamentare kanë propozuar që postet ministrore të lëna bosh nga Lidhja Demokratike e Kosovës, të plotësohen me ministra të rinj, dhe partitë parlamentare t’i japin mbështetje Qeverisë Thaçi që të qeverisë deri në zgjedhjet e parapara më 13 shkurt të vitit të ardhshëm.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30