Deda: PDK po e shantazhon Kosovën

nga **Agim Gashi** Wed Oct 27, 2010 12:13 pm

Deda: PDK po e shantazhon Kosovën

Nga Express më 26 tetor 2010

Dy drejtuesve të Partisë Fryma e Re, Shpend Ahmeti dhe Ilir Deda, nuk iu lejua të mbajnë debat të martën me studentët e Departamentit të Shkencave Politike të Universitetit të Prishtinës. Me kërkesë të Klubit Universitar për debat të UP-së, Deda dhe Ahmeti ishte planifikuar të mbanin një takim me studentët e shkencave politike, për të debatuar për çështje të ndryshme, por jo edhe për çështje politike.

Por, drejtuesit e Fakultetit Filozofik, ndonëse fillimisht kishin thënë po, dhjetë minuta para se të fillonte debati, kishin dhënë urdhër, që debati të mos mbahej.

Ahmeti dhe Deda për disa minuta janë endur korridoreve të Fakultetit Filozofik për të kuptuar se çfarë në fakt po ndodhte. Dhe përgjigja që kanë marrë është se në universitet nuk lejohen të mbahen tubime, apo debate politike.

“Po duket se dikujt po i pengon Fryma e Re. Këtë e kanë organizuar vetë studentët, na kanë ftuar që të bashkëbisedojmë për problemet e Universitetit të Prishtinës dhe në momentin kur krejt është organizuar, kur studentët kanë potencuar se ata vetë po donë me na biseduar neve, dikush ka vendosur dhjetë minuta para këtij takimi se duhet mbyllet ajo sallë dhe askush nuk mund të hyjë në atë sallë, duke e ditur se ka pasur interesim të madh të studentëve për të ardhur këtu”, tha Ahmeti në hollin e Fakultetit Filozofik, siç transmeton Kosovapress.

Deda nga ana tjetër e quajti veprim që cenon demokracinë dhe fjalën e lirë, vendimin e drejtuesve të Fakultetit Filozofik.

“Në vitin 2010, në Evropë në një shtet të pavarur demokratik, studentët e Kosovës nuk kanë drejtë ta ftojnë një subjekt politik të bashkëbisedojnë me ta për hallet e tyre. Kjo nuk i përket Kosovës demokratike, nuk i përket Kosovës në Evropë. Kjo nuk i përket shekullit 21”, tha Deda.

Menjëherë pas kësaj, Ahmeti e Deda kanë gjetur një sallë tjetër për të mbajtur debatin, përderisa drejtuesit e Fakultetit Filozofik janë arsyetuar se në bazë të statutit të UP-së nuk lejohet të mbahen debate politike.

“Universiteti është organizatë jolaike dhe jopolitike dhe pikërisht për këtë jemi përpjekur që të mos ketë vend për organizime të tilla të natyrës politike. Kjo ka qenë e gjitha. Dhe studentët, disa, një grup prej tyre ka ardhur dhe thonë se jemi të interesuar të bëjmë diçka në frymë te debatit, thashë ajo çështje nuk bëhet në kuadër të universitetit, keni vende tjera, bibliotekën universitare dhe keni vende tjera ku mund të organizojnë”, tha prodekani për çështje arsimore, Demë Hoti, teksa mohoi se ndonjëherë ka pasur debate të organizuara nga partitë tjera politike.

Debatin e planifikuar me studentët, drejtuesit e Frymës e kanë vazhduar në Kinemanë “ABC”, në fakt kanë bashkëbiseduar dhe janë munduar ta sqarojnë situatën e krijuar, përderisa Ahmeti e Deda kanë “shkrepur” akuza në drejtim të Qeverisë së Hashim Thaçit.

“Universiteti e ka ditur kush janë njerëzit prej fillimit, kur i kanë thanë po, edhe tash në një mënyrë që t’i shantazhojnë, na jepni emrat t’i shikojmë çka munde të bëjmë. Është diçka që dua të them se pushteti i shantazhit kurrë s’do të ketë sukses, edhe këto dy parti, edhe Partia Demokratike e Kosovës do të dështojë, bash për shkak të kësaj që po bën shantazh ndaj rinisë, shantazh ndaj popullit të vendit. Dilni në krejt Kosovën shihni çfarë shantazhi bëhet prej kësaj partie”, tha Deda.

Ahmeti, ndërkaq tha se veprimi i sotëm nuk do ta ndalojë Frymën që ta vazhdojë rrugën e nisur. Fryma e Re, tha ai gjithmonë do t’i përgjigjet ftesës që vjen prej Universitetit të Prishtinës, posaçërisht kur vjen prej forcës shtytëse të ndryshimeve.

Sipas organizatorit të debatit nga Klubi për debat i UP-së, Edi Sejdiu, qëllimi i debatit nuk ka qenë assesi promovimi i Partisë Fryma e Re, por diskutimi i problemeve, me të cilat ballafaqohet universiteti.

“Kemi dashur të bëjmë një profil pak ma ndryshe, duke i ftuar subjektet e ndryshme politike, shumë thjesht jo të bëjmë promovim partish, jo të bëjmë promocion partish, por të bëjmë një debat politik me të gjithë udhëheqësit e partive tona politike”, tha Sejdiu. /kosovapress

Mon	Tue	Wed	Thu	Fri	Sat	Sun
1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28
29	30	31