Pasqyra e zezë e trojeve shqiptare

Arrestohet pas 12 vjetësh arratisjeje



Tiranë-Në fshatin Zgur është arrestuar Besnik Vishën, i kërkuar që prej më tepër se 12 vjetësh, me akuzën e vrasjes dhe armëmbajtjes pa leje. Kapja e tij është kryer në një operacion të koduar "Darka jashtë" që ka zgjatur që prej të premtes, kur forcat e RENEA-s ishin vënë në vëzhgim të tij, në faqet e luginës së Zgurit, ku fshihej Visha. I kërkuari cilësohej si një ndër më të kërkuarit nga policia e Tiranës, për shkak të rrezikshmërisë së lartë që paraqiste ndërsa i dënuar për vrasjen e Refik Domit, në hyrjen e Universitetit Bujqësor në Kamëz. Krimi, sipas burimeve të policisë, dyshohet se ka ndodhur për motive banale pas një grindjeje të nisur që në Bathore e deri në afërsi të vendit të ngjarjes. I arrestuari, sipas burimeve të policisë, që prej kohës së shpalljes së tij në kërkim, ka qëndruar në zonën e fshatit të tij të familjes në Zgur, ndërsa oficerët e kërkimit posedonin për të foto të vjetra, që nuk përputheshin me pamjen sotme. Dje ai është ndaluar në banesën e tij, në kohën që ishte bashkë me gruan, ndërsa vëllezërit e tij të thirrur nga RENEA, negociuan që ai të mos bënte rezistencë. Në banesë policia i ka bllokuar atij, një automatik me dy krehra të mbushur dhe me fishek në gojë, si dhe me dy granata, një në brez dhe një që e mbante në dorë, por me siguresë të vënë. Për krimin e vrasjes ndaj Domit, Visha është dënuar nga Gjykata e Tiranës në vitin 1998 me 16 vite burg. Që prej vendimit të dhënë nga ky organ, Visha ishte futur në listën e personave të kërkuar. Dy vite të shkuara, ai i kishte shpëtuar policisë së kryeqytetit në disa aksione, pasi ai kishte lënë banesën ku fshihej momentet e fundit përpara se të mbërrite ajo. Madje, në dy raste RENEA, ka mbërritur në vendstrehimin e tij, me informacionin se ai ndodhej në banesë, por kur këta kishin mbërritur aty, ai largohej.

Spahiu kritikon gjyqtarët: Bandat s'mund të diktojnë proceset



TIRANË- Me tone të ashpra i është drejtuar sot gjyqtarëve nënkryetari i KLD-së, Kreshnik Spahiu gjatë një konference me krerër e gjykatave të shkallës së parë dhe të Apelit.
Ai ka lëshuar kritika në adresë të tyre, por pa përmendur raste konkrete, duke theksuar se një problem shumë i madh vazhdon të mbetet zvarritja e proceseve gjyqësore.
Duke folur për proceset gjyqësore, e në mënyrë të veçantë të dosjeve për bandat e rrezikshme Spahiu deklaroi prerë se "bandat nuk duhet të diktojnë proceset gjyqësore". Sipas tij, avokatët mbrojtës të të pandehurve si anëtarë të bandave të rrezikshme bëjnë hapa akrobatikë për të zvarritur me vite proceset gjyqësore dhe për këtë gjyqtarët duhet të luajnë rol thelbësor.
Më tej Spahiu ka folur edhe për reformën në gjyqësor, që do të nisë me lëvizjen e 10-ra gjyqtarëve. Nuk është deklaruar se kur do të nisë lëvizja dhe sa gjyqtarë do të përfshijë, por sipas Spahiut kjo do t'i shërbejë reformimit të sistemit.

Hungari: Arrestohen 25 shqiptarë





Policia hungareze

Policia kufitare e Hungarisë ka arrestuar sot pasdite 19 shqiptarë nga Kosova të cilët kishin hyrë ilegalisht në këtë shtet në qytetin Ashotaloma. Me ta ishin edhe dy tregtarë nga Sllovakia. Grupi i dytë prej gjashtë shqiptarëve nga Kosova janë arrestuar afër qytetit Roske, në jug të këtij vendi, ka bërë të ditur policia lokale.
Agjencia hungareze e lajmeve MTI ka bërë të ditur se në të dyja rastet ka filluar procesi penal.

Kosova dhe Shqipëria bashkëpunim në fushën e sigurisë

Bota sot
Zv.Drejtori i Policisë së Shqipërisë u takua me Drejtorinë e Policisë së Kosovës dhe bashkëpuntorët e tij

Drejtori i Përgjithshëm i Policisë së Kosovës z. Sheremet Ahmeti së bashku me stafin e tij të lartë, priti në një vizitë zyrtare, zv. Drejtorin e Përgjithshëm të Policisë së Shqipërisë z.Agron Kuliqaj dhe stafin e tij.
Në këtë takim u diskutua për gjendjen e sigurisë në përgjithësi në të dy vendet dhe për bashkëpunimin ndër-policor, si dhe për vizitën e Kryeministrit të Shqipërisë z. Sali Berisha.
Po ashtu është diskutuar edhe për mundësinë e zgjerimit dhe ngritjes së bashkëpunimit në mes të dy policive, asaj së Shqipërisë dhe Policisë së Kosovës në mënyrë që të arrihet një nivel më i lartë i sigurisë në të dy vendet.

Është gjetur një foshnjë e braktisur



Policia e Kosovës në Prizren, njoftoi se nga kalimtarët e rastit, në rrugën e fshatit Grekoc, që çon në qytezën e Suharekës, të shtunën në mbrëmje është parë një foshnjë e mbështjellë me batanije, e cila ishte e braktisur nga persona ende të paidentifikuar. Ndërkaq, që në vendin e ngjarjes kanë dalë njësitet hetimore të policisë dhe foshnjën e braktisur, e gjinisë mashkullore, e kanë transferuar në Qendrën Spitalore të Prizrenit, ndërkohë që rasti është vënë nën procedimet përkatëse të hetimeve.

M. Shasivari

Abuzimi me pronat, pranga kreut të Hipotekës



Vihet në pranga drejtori i Hipotekës së Vlorës, Edmond Banushaj, ndërsa bashkë me të është ndaluar dhe ish-juristi i në drejtorinë e Zyrës së Regjistrimit të Pasurive të Paluajtshme, Viktor Kulaj, si dhe shtetasi Oard Begaj. Burimet zyrtare të policisë së Vlorës bënë të ditur se arrestimi i këtyre tre personave u bë në kuadër të operacionit "Fillimi i vjeshtës". Gjithashtu, në pranga ka përfunduar edhe kryeplaku i fshatit Vuno, Leonard Bala.
Mbrëmë, në një konferencë për shtyp, zëdhënësi i qytetit të Vlorës bëri të ditur se ishte arrestuar drejtori i ZRPP-së së Vlorës, Edmond Banushaj. Vënia në pranga e drejtuesit të Hipotekës së Vlorës është bërë në qytetin e Tiranës pasditen e vonë të së premtes. Ka qenë një bashkëpunim mes policisë së Vlorës, prokurorisë së këtij rrethi, si dhe sektorit kundër Krimit Ekonomik ai që ka bërë të mundur arrestimin e Banushajt, si dhe të Viktor Kulajt dhe Oard Begaj. Deri në orët e vona të mbrëmjes nga blutë nuk është pranuar të deklarohet asgjë lidhur me këtë ngjarje, duke u shprehur vetëm se ishin kryer arrestime. Ndërkohë, burime nga prokuroria bënë të ditur se vënia në pranga e drejtuesit të Hipotekës ka lidhje me dhënie në mënyrë abuzive të pronave personave që nuk kishin dokumente pronësie. Bëhet fjalë për prona shtetërore që u janë dhënë privatëve për të kryer ndërtime të ndryshme, shprehen burimet. Ndërkohë deklarohet se hetimet kanë filluar mbi një vit më parë se dhe tashmë është mbledhur i gjithë dokumentacioni që vërteton fajësinë e drejtorit të Hipotekës, si dhe dy personave të tjerë të arrestuar. Akuzat e ngritura ndaj Banushajt, Kulajt dhe Begajt janë "shpërdorim detyre", "falsifikim dokumentesh" dhe "vënie në përdorim e dokumenteve të falsifikuara".

Dy të arrestuar për vrasjen në Shtedim



Podujevë,Lidhur me vrasjen që ndodhi në orët e para të së martës në Shtedim afër Podujevës, për të cilën u kemi informuar dje, policia ka arrestuar dy persona me dyshimin e bazuar se kanë përdorë armën ndaj viktimës, që mbeti i vrarë pas një zënke. Viktima është qëlluar me një plumb dhe si pasojë e plagëve të shkaktuara, mjekët kanë konstatuar vdekjen e tij. Me vonë NJHR ka arrestuar të dyshuarin kryesor, i cili ka pranuar veprën dhe ka dorëzuar pistoletën e tipit “TT”, me një karikator dhe tre fishekë. Me urdhër të prokurorit tre të dyshuarit janë dërguar në qendrën e ndalimit, për procedurë të mëtutjeshme, njofton Policia e Kosovës. /I.Havolli

Hajnat kapen në kamerë të uebit



Hajnat të cilët hyn me dhunë në shtëpinë e një burri në qytetin amerikan Oklahoma janë kapur me anë të kamerës së uebit nga gruaja e tij e cila jeton në Filipine.
Policia ka thënë se të dyshuarit janë arrestuar pasi gjë gruaja Maribel Chouinard, me qëndrim në Filipine, i ka vërejtur ata dhe e ka lajmëruar burrin e saj.
Çifti ka përdorë kamerën e uebit për të komunikuar me video pamje derisa jetojnë larg njëri-tjetrit, raportojnë mediat botërore.
Burri i saj Jim Chouinard, ushtarak me profesion, ka lajmëruar policinë të cilët i kanë kapur dy të rinj afër shtëpisë dhe më vonë e kanë arrestuar edhe të dyshuarin e tretë.
Policia ka njoftuar se ata ishin identifikuar në bazë të fotografive të cilat ia kishin dërguar me e-mail zonjës Chouinard në Filipine.

Policia konfiskon mbi 18 mijë e 700 fishekë




Mbi 18 mijë e 700 fishekë të kalibrit 7.62 milimetra të paketuar në 26 arka janë zbuluar mbrëmë nga njësite patrulluese të Policisë së Kosovës, gjatë kontrollit të një veture në Prizren. Togeri Hazir Berisha tha se në mesnatë, një patrullë policore nga nënstacioni policor i Zhurit ka sinjalizuar një veturë Opel Vectra për t’u ndalur në një pikë kontrolli, mirëpo, shoferi vetëm sa e kishte shtuar shpejtësinë e lëvizjes. Patrulla më pas është vënë në ndjekje të veturës së dyshuar dhe në hyrje të Prizrenit është ndaluar. Gjatë kontrollit policia ka gjetur dhe sekuestruar fishekët e fshehur në atë veturë.

Pinari: 'Gërdeci' shpërtheu nga mina me sahat





Tiranë – Shpërthimi i municioneve në Gërdec, ngjarje e ndodhur në vitin 2008 ka ardhur si pasojë e shpërthimit të minave me sahat.
Deklarata, që pëson atë të ish-ministrit të Mbrotjes Fatmir Mediu, është bërë nga ish-drejtori i kompanisë MEICO, Ylli Pinari, i cili ndodhet i arrestuar fill pas ngjarjes së rëndë.
Gjatë seancës së djeshme, avokati mbrojtës i Pinarit, ka theksuar se Prokuroria e Përgjithshme nuk ka verifikuar dhe hetuar një informacion të Ministrisë së Brendshme, që bënte fjalë për shpërthimin e minave me sahat. Avokati tha më tej se prokuroria duhet ta merrte në shqyrtim këtë dokument, për të cilin foli edhe ish-ministri Mediu në një emision televiziv.
Avokati i Pinarit tha në sallën e gjyqit, se prokuroria nuk ka ndermarre asnje hetim ne lidhje me kete dokument, i cili eshte servirur nga ministri i Brendshem.

Zbulohet gjysmë kilogrami ari në Han të Elezit




HANI I ELEZIT, 12 tetor- Në pikëkalimin kufitar Hani i Elezit pas ndaljes së një automjeti që vinte nga Maqedonia në drejtim të Kosovës, oficerët doganor kanë zbuluar sasi të arit. Automjeti i markës Mercedes me targa të Shkupit është ndalur nga oficeret doganor, gjatë pyetjes së personit në fjale, ai është përgjigjur që nuk ka asgjë për të deklaruar.

Pas kontrollës detale të oficerëve, kanë zbuluar në çantën e dorës së bashkudhëtare së vozitësit një sasi ari. Ku me pas gjatë kontollës trupore është gjetur edhe një sasi tjetër ari, ku gjithsej sasia e zbuluar e arit ishte 550 gr. Sasia e arit është konfiskuar si dhe rasti do ti nënshtrohet procedurës së kundërvajtjes doganore.

Italiani tenton të vrasë të bijën, ishte e lidhur me një shqiptar




Policia italiani


ANCONA - Nuk e duronte dot lidhjen e së bijës 23 vjeçare me një shqiptar dhe vendos ta ndëshkojë, duke e goditur në fyt me një kaçavidë. Ngjarja ka ndodhur në Ancona të Italisë natën e shkuar dhe ka për autor një italian 44-vjeçar të quajtur Mario Matarazzo. Sipas mediave italiane, që i referohen policisë, ai tashmë është arrestuar me akuzën e tentativës për vrasje. Ndërkohë, vajza është shtruar në spitalin rajonal të zonës ku banon. Sipas mjekëve për fat prerja nuk ka qenë shumë e thellë dhe ajo ndodhet jashtë rrezikut për jetën.
Policia bën me dije se agresioni ndodhi në derën e shtëpisë, në rrugën Guazzatore. "Matarazzo deri tak kohë më parë banonte me gruan, dy fëmijët, djalë e vajzë dhe mbesën e vogël. Por prej disa ditësh ishte larguar nga shtëpia, pikërisht për shkak të zënkave pasi ishte kundër lidhjes së të bijës me shqiptarin"- thonë mediat italiane.
Një natë më parë u kthye dhe e sulmoi me mjetin e mprehtë. Pasi e qëlloi në fyt, burri u largua, por u gjet nga karabinierët, që u njoftuan dhe u vunë në kërkim të tij.

Konfiskohet arsenal i municioneve



Derisa po patrullonin në terren, përgjatë rrugës Zhur- Prizren, të dielën paradite, policia rrugore ka zbuluar një arsenal të pazakontë municionesh, kalibrash të ndryshëm. Në fakt, teksa policia po e sinjalizonte vozitësin e veturës “Opel -Vectra” I. Ramadani, që të ndalonte për një kontroll, ky e shton shpejtësinë e qarkullimit, ndërsa policia i vihet pas, derisa ia arrin ta arrestojë. Ndërkaq, me rastin e bastisjes së veturës, u gjetën afro 20 mijë fishekë, të cilët u konfiskuan. Rasti është nën procedurën e hetimeve, thuhet në njoftimin e Policisë së Kosovës në Prizren.
M. Shasivari

Policia kufitare bllokoi katër gomone







Policia kufitare kap katër gomone në bregdetin shqiptar, tre italiane dhe një shqiptare. Aksioni ka qenë i shpejtë dhe i fshehtë, ndërsa morën pjesë katër mjete lundruese, dy skafe dhe dy gomone. Sipas burimeve të policisë kufitare, që në orët e para të mëngjesit të se dieles, në bazë të një informacioni të marrë nga shërbimet në terren, konfirmohej se janë vërejtur mjete lundruese në det. Menjëherë pas njoftimit ka filluar aksioni për kontrollin e vijës bregdetare nga zona e Orikumit, Grykëderdhja e Vjosës, Karaburun dhe më tej në zonën e Dhërmiut. Pjesë e këtij aksioni kanë qenë edhe 25 forca policie. Sipas kreut të policisë kufitare, Rezart Velmishti, nga kontrollet e kryera në një territor të gjerë janë gjetur të strehuara në zonën e Karaburunit tre gomone më përmasa mesatare dhe të pajisura me motorë. Nga kontrolli i ushtruar është konstatuar se personat që i përdornin gomonet ishin shtetas italianë. Verifikimet rezultuan se gjithçka ka qenë konform rregullave të autoriteteve italiane e në këto kushte policia ka gjobitur drejtuesit e gomoneve me nga 10, 000 lek për mos njoftim në kapiteneri që kanë hyrë në ujërat territoriale shqiptare dhe më pas janë lënë të lira. Italianët janë justifikuar se janë strehuar aty nga frika e përkeqësimit të detit. Po gjithashtu gjatë kontrollit në det është verifikuar dhe dokumentacioni i disa varkave dhe gomone të vogla që kanë qenë duke peshkuar. Nga verifikimi ka rezultuar se një gomone e vogël pa motor (me vela ) nuk ka pasur dokumentacion të rregullt dhe më pas është bllokuar nga policia. Gjatë kontrollit në breg të detit në zonën e Zvërnecit, policia ka gjetur në disa shkurre një skaf të vogël, pa motor, të cilin më pas e kanë sekuestruar së bashku me kartelin. Policia po punon për të identifikuar pronarin e këtij skafi.

Bulqizë, vret burrin më pas edhe veten



Një krim i rëndë ka goditur familjen sot gjatë orëve të para të mëngjesit. Një grua ka goditur për vdekje bashkëshportin me armë dhe më pas ka vrarë edhe veten. Ngjarja e rëndë ndodhi sot në orët e para të mëngjesit në lagjen “Gjeologu” të qytetit të Bulqizës. Policia e Bulqizës ka bërë të ditur identifikimin e viktimave të gjetura sot në këtë qytet. Ato janë Bledar dhe Arjeta Bilali, përkatësisht 29 dhe 25-vjeçe. Ata janë me origjinë nga qyteti i Shkodrës. Ata mbetën të pa identifikuar për disa orë, pasi ishin banorë të rinj të këtë qytet, që kishin ardhur 8 muaj më parë. Policia nga vendi i ngjarjes bëri të ditur paraprakisht se krimi ndodhi pas një grindjeje midis çiftit. Vijojnë hetimet për të zbardhur këtë ngjarje të rëndë

Itali, shqiptari arratiset nga burgu i sigurisë së lartë



Romë - Një i dënuar shqiptar është arratisur në mënyrë spektakolare nga burgu i sigurisë së lartë në Terni të Italisë.
I burgosuri Taulant Toma është larguar pa lënë gjurmë nga vrimat në rrjetën rrethuese të një fushe minifutbolli, ku së bashku më të dënuar të tjerë kishte luajtur për më shumë se një orë.
Alarmi për arratisjen e shqiptarit 36-vjeçar është dhënë dje pasdite pas orës 16:00. Ndërkohë autoritetet italiane po vijojnë kërkimet, në të cilat janë përfshirë ekspertë nga Roma dhe Peruxhia.
Taulant Toma mësohet se ishte i lidhur me bandën e shqiptrait tjetër Ilir Paja, i quajtur nga forcat e rendit në Itali me pseudonimin UFO, për shkak të aftësisë së tij për t’ia mbathur nga burgu, gjë të cilën e kishte bërë dy herë.
Toma ndodhej në qeli pasi ishte shpallur fajtor për rrëmbim personi.

Përleshje e armatosur në Çair, dy veta të plagosur





Dy veta janë plagosur nga një përleshje me armë zjarri që ndodhi sonte rreth orës 17 e 30 minuta në qendrën tregtare Çairçanka në Shkup. Sipas dëshmitarëve, të cilët nuk deshën të flasin para kamerës, njëra nga grupet e involvuara, me veturë ka ikur nga vendi i ngjarjes.
Nga Ministria e Punëve të Brendshme paralajmëruan se do të japin informacione më konkrete pas shqyrtimit të rastit.
Jozyrtarisht bëhet fjalë për përleshje mes dy grupeve kriminale. Nga MPB thonë se kanë njohuri për identitetin e kryerësit dhe se pas tij intensivisht po gjurmohet.
Nga Qendra Klinike njoftuan se një 25 vjeçar i plagosur është në gjendje të rëndë shëndetësore. Nga atje njoftuan se i plagosur ka plagë në stomak dhe se është i kyçur në aparate. I plagosuri i dytë është i pranuar në Spitalin e qytetit të Shkupit. 33 vjeçari kishte marrë plagë në anën e majtë të kraharorit. Mjeku kujdestar Jasminka Çabukovska tha se pacienti është në gjendje stabile, pas nxjerrjes së plumbit dhe intervenimeve tjera mjekësore.

Bashkëpunim policor në mes dy shteteve



Drejtori i Përgjithshëm i Policisë së Kosovës z.Sheremet Ahmeti, me bashkëpunëtor, priti në vizitë Ambasadorin Turk në Kosovë z.Hüsrev Ünler. Drejtori i Policisë së Kosovës, z.Ahmeti, në pika të shkurtra njoftoi z.Ünler, me historikun dhe punën e policisë së Kosovës, si dhe me hapat e rëndësishme të cilat janë ndërmarrë në ndërtimin dhe konsolidimin e Policisë së Kosovës. Gjatë prezantimit të tij për gjendjen e përgjithshme të sigurisë në vend e ne veçanti te sigurisë se qytetarëve të nacionalitetit turk që gjinden ne Kosovë, z.Ahmeti përmendi edhe rëndësinë dhe bashkëpunimin e mirë që ka PK-ja me shtetin turk dhe falënderoi policët e Turqisë qe kanë shërbyer ne misione te ndryshme ne Kosovë. Drejtori i PK-se falënderoi Ambasadorin turk për përkrahjen dhe mbështetjen e vazhdueshme qe po ofron vendi i tije përmes trajnimeve te ndryshme te cilat po ndikojnë ne mënyrë pozitive, në ngritjen dhe profesionalizimin e oficerëve të Policisë së Kosovës. Në këtë takim u diskutuan edhe çështje te tjera si, mundësia e inkuadrimit te PK-se ne organizatat policore ndërkombëtare te Sigurisë, ku z.Ünler premtoje përkrahjen qe vendi i tije do te kontribuoje ne te mire te PK-se.

Drogë në autobusin e linjës Gjirokastër-Tiranë, arrestohet faturino



GJIROKASTËR - Faturino i autobusit të linjës Gjirokastër-Tiranë, është kapur me një kg mariuanë që e mbante poshtë sedijes së shoferit. Kontrolli i mjetit u bë në mesnatë, pas informacioneve që dispononte policia për transportimin e lëndës narkotike.
Sot, zëdhënësi i policisë së Gjirokastrës, bëri me dije se "mbrëmë vonë specialistët e Luftës Kundër Krimit të Organizuar kanë marrë informacion në rrugë operative se në autobusin e linjës së orës 23.00, Gjirokastër-Tiranë me targa GJ 61 52 A, kishte një çantë me lëndë narkotike të dyshuar si mariuanë me destinacion Tiranën.
Menjëherë është ngritur një postbllok në vendin e quajtur agjencia e qytetit Tepelenë në aksin rrugor Gjirokastër - Memaliaj. Rreth orës 00.10 autobusi u ndalua nga policia dhe pas një kontrolli të imtësishëm u gjet poshtë sedijes së shoferit çantë me rroba, që në brendësi kishte një pako të mbushur me lëndë narkotike, e dyshuar si mariuanë, me peshë 1 kilogramë.
Nga veprimet e para hetimore rezultoi se kjo çantë i përkiste shtetasit Spiro Pepe, 56 vjeç, faturino i autobusit. Policia bën të ditur se është arrestuar në flagrancë ky person, banues në Memaliaj të rrethit Tepelenë. Lënda narkotike u sekuestrua në cilësinë e provës materiale dhe materialet i kaluan Prokurorisë së Gjirokastrës, ndërsa po punohet për zbardhjen e plotë të kësaj ngjarjeje dhe zbulimin e rrjetit me të cilin punonte faturino.

Trafiku i drogës Shqipëri- Itali, sekuestrohen 30 kg heroinë





8 persona, pjesa më e madhe e të cilëve shqiptarë, janë arrestuar në Itali me akuzën për trafik lëndësh narkotike. Arrestimi i tyre u bë në kuadër të një operacioni blic të skuadrës së gatshme të këtij qyteti të koduar me emrin “Elios 2009”. Nga një hetim i nisur në janar të këtij viti u bë e mundur zbulimi i aktivitetit të bandës e cila importonte heroinë nga Shqipëria dhe e shiste më pas në veri të Italisë. Gjatë hetimeve janë sekuestruar 30 kilogram heroinë dhe 51 mijë euro, ndërsa është zbuluar laboratori në të cilin kryhej ndarja dhe paketimi në doza i drogës.
Dy shqiptarë të moshës 27 dhe 32 vjeç janë identifikuar si narkotrafikantët kryesorë. Detyra e tyre ishte marrja e heroinës nga Shqipëria, transportimi i saj në nje apartament në Milano, ndarja dhe konfeksionimi në doza të cilat u jepeshin më pas shqiptarëve të tjerë, italianëve dhe afrikano-veriorëve për ta shitur.
Droga vinte nga Shqipëria me kamionë. Mjetet imbarkoheshin në anijet që vinin nga Greqia në portin e Barit për të vazhduar më pas drejt Milanos.

Pejë-Prizren:Arrestohen 5 persona për krim të organizuar dhe trafikim


POLICIA E KOSOVËS




Policia e Kosovës njoftoi sot se mbrëmë, pas një kontrolli në rajonin e Pejës dhe Prizrenit janë arrestuar 5 persona të dyshuar për krim të organizuar dhe trafikim me drogë, 4 prej tyre shtetas të Kosovës, ndërsa tjetri i ShqipërisMe këtë rast është konfiskuar një kilogram substancë narkotike dhe dy vetura. Policia e Kosovës përmes një njoftimi për media bëri të ditur se operacioni i mbrëmshëm i kryer me sukses ka rrjedhë si rezultat i shkëmbimit të informacioneve ndërmjet Policisë së Kosovës dhe Shqipërisë dhe pas hetimeve disamujore.

Mitrovicë: Arrestohet një serb i dyshuar për sulm ndaj të rinjve shqiptarë

Policia ka arritur ta kapë dhe ta arrestojë njërin nga sulmuesit e dyshuar për sulmin e djeshëm ndaj dy të rinjve shqiptarë, në Veri të Mitrovicës.

Përmes një komunikate për opinion policia ka bërë të ditur se i dyshuari D. Millunoviq, 22 vjeçar, banor i Mitrovicës, është arrestuar dje rreth orës 15:30min, pasi që njëri nga viktimat e ka identifikuar.
I dyshuari është sjellë në stacionin policor, ku me autorizim të prokurorit
publik do të mbahet për 48 orë.
Ndaj tij do të iniciohet paraqitje penale, për përfshirje në sulm fizik, ndërsa rasti do t’i dorëzohet prokurorisë.
Policia është në kërkim të së paku edhe një të dyshuari i cili është identifikuar nga viktima.

Bombë edhe në gjykatë



Një alarm për bombë ka detyruar punonjësit e Gjykatës së Qarkut në Prishtinë, rreth orës 14, të evakuohen nga ndërtesa. Policia e Kosovës e ka marrë seriozisht një thirrje anonime telefonike që lajmëronte për vendosjen e një mjeti shpërthyes në ndërtesën e gjykatës që ndodhet në afërsi të Kuvendit Komunal. Policia po kontrollon zyrat, për të vërtetuar nëse alarmi është i rrejshëm.

Tenton ta vrasë baballëkun


Nga Express

Policia në Mitrovicë ka ndaluar Xh. I. 29-vjeçar, si të dyshuar për përfshirje në një rast të shtënave me armë zjarri, të kualifikuar si vepër penale “vrasje në tentativë”

Policia njofton se rasti është raportuar rreth orës 10:30, në rrugën e “Ulqinit”, në fshatin Zhabar i Epërm i Mitrovicës. Viktima e këtij rasti, një 64-vjeçar, ka njoftuar autoritetet policore se dhëndri i tij kishte shtënë me armë zjarri në drejtim të tij, në dhomën e shtëpisë së të dyshuarit, derisa ata ishin përfshirë në një mosmarrëveshje.

Viktima e këtij rasti të raportuar se nuk ka pësuar lëndime trupore, ndërsa besohet se dy të shtëna me armë zjarri kanë përfunduar në dyshemenë e dhomës ku qëndronin palët e përfshira në rast. Në bazë të informatave të siguruara nga dëshmitarët dhe palët e përfshira në rast, thuhet se rasti ishte nxitur si rezultat i një zënke në mes të palëve, ndërsa i dyshuari në tentim për të goditur viktimën e tij, është penguar nga të pranishmit e tjerë në dhomë, ndërsa dy plumba të shkrepur nga një revole kanë përfunduar në dysheme.

“Si pjesë të procedurave të parapara me ligji, Policia e Kosovës ka bërë bastisjen e shtëpisë së të dyshuarit në kërkim të armës e cila ishte e përfshirë në rast. Lidhur me rastin policia ka arrestuar dhe marrë në intervistë edhe pronarin e shtëpisë I. I. (1946), pasi i njëjti kishte tentuar që të fsheh armën e cila ishte përdorur”, thuhet në komunikatën e policisë.