HIPOKRIZIA POLITIKE

HIPOKRIZIA POLITIKE



Një parti politike (Partia e Drejtësisë), kritikoi Qeverinë pse nuk po angazhohet më shumë që Kosova ta fitojë statusin e vëzhguesit në Konferencën Islamike. Ndërkaq Kosova ende nuk është pranuar si shtet pikërisht nga Konferenca Islamike, që të kishte të drejtë të “konkurronte” për statusin e vëzhguesit. Por nuk është vetëm kjo parti politike që e fajëson Qeverinë për faktin se vendet arabe islamike nuk e pranojnë Pavarësinë e Kosovës. Këto përpiqen të thonë se Kosova ka faj për këtë qëndrim të tyre, e jo politika e vendeve arabe që krijon me të drejtën e saj aleanca andej kah nuk i kanë shqiptarët. Sidoqoftë, nesër a pasnesër, mund të ndodhë që edhe Konferenca Islamike ta pranojë pavarësinë e Kosovës, por kjo nuk do të varet nga Kosova, po nga ndonjë qëndrim i ri politik i pritshëm i Konferencës Islamike ndaj politikës bipolare botërore. Megjithatë, deri atëherë, ne duhet ta adresojmë shkakun pse ende nuk na kanë pranuar shtetet arabe (dhe Irani) dhe ky shkak është se atje ka pasur sukses propaganda dhe lobimi i shtetit terrorist të Serbisë, që nuk është i sotëm, por është i vendosur nga mareshali Tito dhe organizata e të paangazhuarve të Naserit dhe Nehrus, e jo pse Kosova ka faj për këtë punë, sepse Kosova nuk ka pasur shtet që të procedonte diplomaci e politikë të marrëdhënieve me shtete dhe organizata botërore. Pra nuk kërkojnë që Kosova t’i pranojë ata duke “qitur” lutje të bëhet anëtare vëzhguese e Konferencës Islamike, por Kosova me vetë faktin që kërkon pranim të shtetësisë prej tyre, ata i pranon në mënyrën më korrekte të mundshme diplomatike, pra nuk i mohon politikisht as faktikisht. Natyrisht, që po të mos kishim parti politike të cilat qëndrojnë në krahun e atyre që nuk na pranojnë, atëherë nuk do të kishim as ide të përcaktimeve të Kosovës së dhunshme dhe artificiale të “përcaktimeve” voluntere jozyrtare (partiake) bipolare. Kosovën e ka ndihmuar të pavarësohet Aleanca Euroatlantike, pikë! Dhe përcaktimin e Kosovës e ka trasuar politika gjeniale e presidentit Ibrahim Rugova, dhe populli i Kosovës që me 90% për qind i ka takuar dhe e ka ndjekur politikën e Rugovës. Kjo nuk do të thotë që Kosova të mos lobojë në vendet arabe për t’u pranuar pavarësia e saj, por është pak e pakuptueshme të kujtojmë se ka nevojë lobimi dhe ka nevojë prezantimi i drejtësisë së çështjes së Kosovës të jetë shtetit i pavarur dhe sovran. Kështu që lobimet nuk janë të tepërta, por as kjo nuk do të thotë që ato të mos vazhdojnë, por duhet ditur se në ato vende “lobimi” serb e ka fituar luftën kundër “lobimit” shqiptar, jo pse diplomacia serbe ka nivel, sepse ajo nuk ka nivel fare dhe ajo ndihmohet vetëm nga aleancat joparimore politike të Serbisë me Rusinë, dhe Serbia thirret dhe mbështetet në aleancat për të cilat Kosova nuk është as meritore, as fajtore. Por çfarë jemi ne, mund të ndodhë që jashtë çdo lloj procedimi protokollar diplomatik të qesim lutje të na pranojnë si vëzhgues, ata të cilët ende nuk janë të gatshëm të na pranojnë si shtet. Na pranuan a jo ata, Kosova gjeografikisht është në Evropë, që do të thotë në djepin e kulturës së saj Perëndimore. Gjeografinë dhe kulturën nuk mund as ta eksportojmë, as ta importojmë, kush do le të na pranojë si të tillë, çfarë jemi realisht dhe historikisht.