Çeku: Serbia, sponsor i arrestimeve

nga **Agim Gashi** Thu Mar 17, 2011 8:24 pm

Çeku: Serbia, sponsor i arrestimeve

Arrestimet e djeshme nga policia e EULEX-it, të tetë ish pjesëtarëve të Ushtrisë Çlirimtare të Kosovës dhe lëshimi i fletarrestit edhe për deputetin Fatmir Limaj, nga ish-komandanti i UÇK-së Agim Çeku, konsiderohen si përpjekje të sponsorizuar nga Serbia me qëllim të njollosjes së luftës së pastër të UÇK-së për lirinë e vendit.

Si qytetar i Kosovës dhe si ish-udhëheqës i UÇK-së, Çeku ka thënë të enjten se ndihet i shqetësuar për faktin se po vazhdojnë ngritjet e aktakuzave për ish-luftëtarët e UÇK-së, pikërisht për njollosjen e luftës së drejtë të Kosovës.

“Po harrohet fakti se këtu ka ndodhur një luftë, ku ka pasur pushtuesin, në këtë rast Serbinë dhe i ka pasur çlirimtarët, në këtë rast Ushtrinë Çlirimtare të Kosovës. Gjithë ato përpjekje të cilat janë sponsoruar nga Serbia, janë përpjekje për ta paraqitur Serbinë si viktimë. Dihet shumë mirë, bota e di se kush është viktimë, kush është agresor. Unë kurrë nuk jam pajtuar, kurrë nuk do të pajtohem dhe askush nuk mund të më bindë se ushtarët e UÇK-së, kanë bërë krime”, ka thënë Çeku.

Ministri i Forcës së Sigurisë së Kosovës ka kërkuar që të ndalojnë përpjekjet për zbehjen e vlerave të Ushtrisë Çlirimtare të Kosovës dhe që Kosova të trajtohet si viktimë dhe si fitues në luftën e fundit.

“Lufta nuk është lojë shahu. Lufta është situata për vdekje, apo për jetë dhe çdo luftë ka pasur viktima, çdo luftë, shpresoj që kurrë më të mos ndodhë, por në çdo luftë dihet kush është viktimë, kush është agresor dhe kush është fitues. Ne kemi qenë viktimë, ne jemi fitues, duhet të sillemi si fitues dhe kërkojmë nga të tjerët të na trajtojnë si viktimë dhe si fitues dhe mos të provojnë të na zhveshin nga vlerat tona, të mos provojnë që t’i zbehin vlerat tona. Për ne ato janë të shenjta”, është shprehur Çeku.

Këto komente, kreu i MFSK-së i bëri pas takimit me ministrin maqedonas të Mbrojtjes Zoran Konjanovski, me të cilin ka biseduar për bashkëpunimin mes Kosovës dhe Maqedonisë në fushën e sigurisë dhe të mbrojtjes.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30