Opozita sulmon ambasadorët: Të ikin nga Shqipëria

nga **Agim Gashi** Mon Mar 21, 2011 1:37 am

Opozita sulmon ambasadorët: Të ikin nga Shqipëria

Ngjela rebelohet: Ambasadorët të mos përzihen në punët tona. Opozita thirrje për zgjedhje të parakohshme

Opozita e majtë del haptazi kundër ambasadorëve të akredituar në Shqipëri, madje duke kërkuar edhe kthimin e tyre në shtëpi, pasi sipas saj, prononcimet publike të bëra prej tyre, nuk kanë qenë aspak asnjanëse. Një deklaratë e tillë u bë dje nga përfaqësuesi i “Opozitës së Bashkuar” Spartak Ngjela, i cili në një dalje publike deklaroi, se ambasadorët e akredituar në Tiranë duhet të mbajnë vendin e tyre, pasi në të kundërt, sipas tij ata duhet të kthehen në vendet nga kanë ardhur. “Ju sugjeroj ambasadorëve që kanë dalë me papërgjegjësi nëpër Shqipëri, se po marrin përbuzjen e shqiptarëve. Kurrë të mos iu shkojë mendja, se shqiptarët janë qytetarë të rangut të dytë. Le të futen në shtëpitë e tyre, ashtu siç bëjnë në vendet e tjera të botës. Është mendjelehtësi të mendojnë, se do t’i bindin ata për të kundërtën”, – tha Ngjela. Për opozitën qëndrimet e ambasadorëve shihen si subjektive, pavarësisht se në të shumtën e rasteve deklaratat e tyre kanë qenë thjesht për përgjegjësi politike të partive dhe stabilitet të vendit. Ngjela po ashtu deklaroi, ashtu siç theksoi dy ditë më parë edhe vetë kreu socialist Edi Rama, se zgjedhjet e ardhshme vendore të 8 majit 2011 do të jenë për opozitën një demostratë e madhe për largimin e qeverisë, duke i parë kështu këto zgjedhje si politike. “Duke filluar nga dita e parë e fushatës dhe deri në rrëzimin e kësaj qeverie, ne do bëjmë një demostrim të forcës në sens demokratik, për të treguar se do triumfojë demokracia dhe jo kjo tirani, që ekziston dhe që duhet rrëzuar sa më parë”, – u shpreh Ngjela. Për kreun e PLD-së kërkesa kryesore e opozitës së majtë mbetet largimi i menjëhershëm i kësaj qeverie dhe zhvillimi i zgjedhjeve të parakohshme, kërkesë e cila sipas Ngjelës do të arrihet vetëm me anë të protestave të vazhdueshme. Megjithëse një mënyrë e tillë për të arritur synimet kryesore të opozitës për largim të qeverisë dhe zgjedhje të parakohshme, duket shumë iluzive dhe njëkohësisht aspak frytdhënëse deri tani, sërish opozita e majtë synon të ndjekë të njëjtën rrugë. Por jo vetëm rruga e protestave është ajo, që e bën opozitën të ndahet nga qëndrimet e ndërkombëtarëve, të cilët shprehin domosdoshmërinë e dialogut politik, por tashmë është dhe vetë sulmi opozitar ndaj tyre. Deklarata e bëra dje nga Ngjela në konferencnë për shtyp nuk ishte aspak kritike, por akuzuese dhe njëkohësisht sulmuese ndaj faktorit ndërkombëtar. Një qëndrim i tillë i opozitës sigurisht që ndikon në shtimin e konfliktit, që vetë të majtët po përpiqen të krijojnë me ambasadorët e huaj të akredituar në Shqipëri. Por duhet kujtuar, se kjo nuk është hera e parë, që opozita e majtë sulmon ndërkombëtarët, pasi disa kohë më parë ishte vetë kreu i grupit parlamentar socialist Gramoz Ruçi, i cili akuzoi ambasadorin e OSBE-së Eugen Wollfarth për mosnjohje të realitetit shqiptar. Kjo akuzë e kreut të grupit parlamentar erdhi pas deklaratës së bërë nga ambasadori i OSBE-së, i cili në atë kohë kërkoi përgjegjësi politike nga PS-ja për të dërguar emrat e saj të komisionerëve në KQZ.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30