Sundimi i ligjit - thelbësor drejt BE-së

nga **Agim Gashi** Fri May 27, 2011 10:29 pm

Sundimi i ligjit - thelbësor drejt BE-së

“Përballja me çështjet që kanë të bëjnë me sundimin e ligjit është shumë e rëndësishme, është vendimtare për të ardhmen e Kosovës, është vendimtare për të ardhmen e njerëzve dhe është thelbësore për ambiciet që keni për punën dhe zhvillimin me Bashkimin Evropian”, tha në Prishtinë shefja e diplomacisë evropiane, Kethrin Eshton. Këto komente, ajo i bëri pas takimit me shefin e misionit evropian për sundimin e ligjit në Kosovë, Ksavier de Marnak.

Përfaqësuesja e lartë e Bashkimit Evropian për Politikë të Jashtme dhe Siguri, Kethrin Eshton, theksoi rëndësinë e trajtimit të çështjeve që ndërlidhen me sundimin e ligjit në Kosovë, gjë që, siç tha ajo, është vendimtare për të ardhmen e Kosovës dhe zhvillimin e saj drejt Bashkimit Evropian.

Pas një takimi të shkurtër me shefin e misionit evropian për sundim të ligjit, Ksavier de Marnak, Eshton siguroi mbështetjen e plotë të BE-së për këtë mision.

“Njëzeteshtatë shtetet anëtare të Bashkimit Evropian mbështesin plotësisht misionin dhe punën, të cilën ai po përpiqet ta bëjë. Përballja me çështjet që kanë të bëjnë me sundimin e ligjit, është shumë e rëndësishme, është vendimtare për të ardhmen e Kosovës, është vendimtare për të ardhmen e njerëzve dhe është thelbësore për ambiciet që keni për punën dhe zhvillimin me Bashkimin Evropian”, tha Eshton.

Në vizitën e saj të dytë në Kosovë, shefja e diplomacisë evropiane pritet të zhvillojë takime me përfaqësues të Qeverisë së Kosovës. Një konferencë e përbashkët për media me kryeministrin e vendit, Hashim Thaçi, është paralajmëruar të mbahet gjatë ditës në qytetin e Prizrenit.

Eshton bëri të ditur se në këto takime do ta diskutojë rëndësinë e së ardhmes së Kosovës. Ajo tha se është shumë e rëndësishme që të mbështetet puna, të cilën është duke e bërë EULEX-i në vend.

“Është jashtëzakonisht e rëndësishme që të gjithë ne ta mbështesim misionin, siç bëjmë ne në Bashkimin Evropian, dhe të njohim rëndësinë e punës që është duke u bërë”, u shpreh Eshton.

Dje, Eshton qëndroi në Beograd, ku zhvilloi një takim me presidentin serb, Boris Tadiq. Vizita e saj në Serbi koinçidoi me arrestimin e ish-gjeneralit serb gjatë luftës në Bosnjë, Ratko Mlladiq.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30