Thaçi: Nuk fshehim asgjë nga bisedimet

nga **Agim Gashi** Wed Jul 06, 2011 11:11 pm

Thaçi: Nuk fshehim asgjë nga bisedimet

Bisedimet e nisura në pranverë të këtij viti në Bruksel me ndërmjetësimin e Bashkimit Evropian, kryeministri Hashim Thaçi thotë se janë standard dhe agjendë evropiane.

Gjatë një pritje që u bëri gazetarëve, kryeministri Hashim Thaçi ka folur gjerë e gjatë për bisedimet ndërmjet Kosovës dhe Serbisë, përderisa ka theksuar se marrëveshjet e arritura nuk ka nevojë që të ratifikohen nga Kuvendi i Kosovës.

“Natyrisht marrëveshjet ndërkombëtare ratifikohen në Kuvendin e Kosovës, por këto janë konkluzione dhe sa i përket konkluzioneve nga takimet e përbashkëta ndërshtetërore. Kuvendi i Kosovës i ka dhënë mbështetje të plotë Qeverisë për të diskutuar dhe për të nxjerrë konkluzione që janë në interes të Kosovës, por edhe në interesin e dy vendeve për një jetë më të mirë për qytetarëve të Kosovës, por edhe qytetarëve serbë”, ka thënë Thaçi.

Ai ka theksuar disa herë se Qeveria e Kosovës do të vazhdojë të jetë transparente ashtu siç ka qenë deri më tani dhe se nuk ka asgjë për t’u fshehur sa i përket bisedimeve me Serbinë.

“Nuk ka asgjë për t’u fshehur, sepse janë konkluzione shumë të përgjegjshme që janë në interesin e fillimit të njohjeve reciproke mes shtetit të Kosovës dhe Serbisë. Unë e kam theksuar edhe më herët dhe e theksoj edhe sot se ky proces do të përmbyllet me njohjen ndërshtetërore mes Kosovës dhe Serbisë si dy shtete të pavarura dhe do të përshpejtohet procesi i integrimit në Bashkimin Evropian edhe për shtetin e Kosovës edhe për Serbinë. Eshtë standard evropian, është agjendë evropiane, është edhe virtyt dhe kulturë dhe përcaktim edhe i yni të ndërtojmë fqinjësi të mirë me të gjithë”, është shprehur Thaçi.

Duke i quajtur këto zgjidhje evropiane, jo të imponuara as nga Prishtina as nga Beogradi, kryeministri Thaçi ka thënë se këto konkluzione do ta përshpejtojnë procesin integrues të Kosovës dhe të Serbisë në Bashkimin Evropian.

Disa herë është pyetur për masën e reciprocitetit për lëvizjen me targa të Republikës së Kosovës, por kryeministri Thaçi ka dhënë të njëjtën përgjigje.

“Qytetarët e Republikës së Kosovës do të lëvizin me dokumente të shtetësisë së Kosovës nëpër Serbi”, ka thënë ai.

Ndër pikat e ardhshme që mund të diskutohen dhe mund të nxirren konkluzionet e përbashkëta, sipas kryeministrit Thaçi, është telekomunikacioni, energjia, vulat doganore dhe çështjet tjera që janë në interes të fuqizimit dhe konsolidimit të shtetit të Kosovës, por edhe normalizimit të marrëdhënieve ndërshtetërore.

Thaçi ka folur edhe për përgatitjen e Kosovës për procesin e liberalizimit të vizave, duke shprehur besimin e thellë se edhe ligjet që kërkohet nga raporti i progresit do të miratohen deri në muajin shtator.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30