Qeveria dhe opozita përplasen përplasen rreth raportit të progresit

nga **Agim Gashi** Fri Oct 14, 2011 5:40 pm

Qeveria dhe opozita përplasen përplasen rreth raportit të progresit

Përderisa Qeveria e Kosovës për dy ditë rresht ka folur për vlerësime pozitive të Raportit të Progresit të Komisionit Evropian për Kosovën, opozita e shikon `anën tjetër të medaljes’. Në seancën e Kuvendit të Kosovës, deputetët e opozitës kanë kërkuar që të zhvillohet debat për Raportin e Progresit, por edhe nga kryeparlamentari Jakup Krasniqi, edhe nga kryeministri Hashim Thaçi kanë marrë një përgjigje të njëjtë: “Lexojeni së pari Raportin”.
Deputetja e LDK-së, Hykmete Bajrami ka folur e para për Raportin e Progresit, duke thënë se në bazë të këtij raportit, del se në fusha të ndryshme jo që nuk janë bërë hapa para, por janë bërë hapa prapa.
“Edhe sa vite ne si shtet i ri duhet të lëmë korrupsionin të lulëzojë, politikën të ndërhyjë në çdo sferë të jetës, nepotizmin etj” Deri kur Qeveria do ta kontrollojë Kuvendin” Historia po përsëritet, sepse ne kemi Qeverinë më optimiste. Me një qeverisje të tillë raporte të tilla do të kemi edhe 30 vjetët e ardhshme , e ne nuk do të jemi në Evropë”, ka thënë Bajrami.
Ndërkaq Ardian Gjini nga AAK-ja, me ironi është pajtuar që Raporti është real, siç e thotë edhe Qeveria, ngase sipas tij, ashtu siç thotë raporti, në veri nuk ka progres, nepotizmi në institucione vazhdon të jetë i pranishëm, nuk ka progres në reformën e administratës publike, nuk ka progres në lirinë e shprehjes dhe se është reale që Qeveria nuk ka vullnet për ta luftuar korrupsionin dhe se po vazhdon të ndërhyjë në emërimet në Policinë e Kosovës.
Gjini ka kërkuar që të zhvillohet debat për Raportin e Progresit, për t’i ballafaquar mendimet e pozitës dhe të opozitës dhe për të nxjerrë sfidat që dalin nga ky raport.
Ndërkohë, kryeparlamentari Jakup Krasniqi ka vënë në dyshim faktin që deputetët e kanë lexuar këtë raport.
“Raporti nuk është i përkthyer në gjuhën shqipe dhe nuk e keni kuptuar disa. Jam për një debat për këtë pikë, por të jetë i organizuar jo kështu”, ka thënë Krasniqi.
Edhe kryeministri Hashim Thaçi është pajtuar që të ketë debat, por po ashtu, ai është pajtuar edhe me kryeparlamentarin Jakup Krasniqi.
“Pajtohem me kryeparlamentarin Krasniqi, që fillimisht të lexohet Raporti i Progresit e pastaj të debatojmë dhe t’i nxjerrim sfidat e përbashkëta që dalin për vitin e ardhshëm. Ky sukses për dialogun për liberalizimin e vizave, është sukses i shtetit tonë, është sukses i përbashkët, i qeverisë, i opozitës, i autoriteteve lokale, etj”, ka thënë Thaçi.
Thaçi ka folur për vlerësime të larta që Raporti i Progresit i bënë reformave të Qeverisë së Kosovës në fusha të ndryshme, ndërkohë deputeti i LDK-së, Sabri Hamiti ka theksuar se deklarimet solemne të kryeministrit duhet të kalojnë në analiza konkrete.
Ai ka thënë se as kryeparlamentari, as askush nuk mund të paragjykojë nëse është lexuar raporti apo jo, por duhet të zhvillohet debat në mënyrë që, siç ka thënë ai, propagandës së Qeverisë t’i bëhet një analizë e mirëfilltë.
Thaçi nga ana e tij ka shprehur gatishmërinë për debat, duke thënë se nga ai debat do të fitonin të gjithë, duke bërë një vlerësim real, por edhe duke nxjerrë përgjegjësitë e përbashkëta, përderisa ka kërkuar edhe nga opozita që të punojë më shumë.
Sidoqoftë, seanca nuk ka vendosur asgjë sa i përket një seance të veçantë ku do të debatohej për Raportin e Progresit, por ka mbetur që kjo të kërkohet në mënyrë zyrtare, qoftë nga kryeministri, qoftë nga deputetët, në mënyrë që Kryesia të caktojë seancën.
Ndryshe, në seancën e sotme janë ngritur çështje të ndryshme, sikur që është çështja e veriut të Kosovës, politizimi i sportit në Kosovë e çështje të tjera.
Ndërkohë, deputeti i PDK-së, Ramiz Lladrovci ka mohuar deklaratat e drejtuesve të Vetëvendosje se i ka bërë ofertë deputetit të kësaj lëvizje, Afrim Hoti për t’iu bashkuar koalicionit qeverisës.

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30