Gëzim MUÇOLLI:NE VRANJEVC-poezi

nga **Agim Gashi** Tue Nov 15, 2011 9:57 pm

në vranjevc zoti lakuriq
mund të zbresë në tokë
nëse s’është vonuar të merr
pjesë në mbledhje të
bashkësisë lokale
nuk e di a është vranjevci
periferi e prishtinës
apo qendra e botës
nëse
nuk e sheh nga lartë
nuk e sheh nga poshtë
e sheh në “super”*
…me migjenin vranjevcin
do ta shetis
të bëhem tuberkuloz
e prap të mbetem poet
orën do ta heq
aty ku të tjerët
e kanë ndalur kohën
sytë e zjarrtë të një
voglushi
në rrugët plot lotësjellës
flasin më shumë
se kushedi sa fjalime
ndërgjegjja në vranjevc
gjen udhën e daljes
nga labirinti
çdo kush mund ta shohë
vetveten në pasqyrë
përmbajtja lexohet e kthjelltë
nuk i shohin me sy etiketat
e secili iu beson vetëm
syve të vet
…në vranjevc mund të vijsh
me njëqind emra
e të kthehesh vetëm me një
atë që e meriton
edhe emrin tënd
mund ta harrosh
nëse s’e njeh gjeometrinë
e shpirtit kryengritës
jo vranjevci nuk është
periferi e prishtinës
vranjevci është qendra
e botës.

*-“super TV” ishte kanali i parë televiziv i huaj satelitor
që mund të përcillej në Kosove në atë kohë.-G.M.

Poezia “Në vranjevc” është botuar në
numrin jubilar të 45 vjetorit të daljes
së Revistës “Zëri i Rinisë”në Prishtinë
,”ZR”nr 1341-1342,faqe 43, me datën
12-19 Maj 1990 dhe ka krijuar jo pak
probleme me organet e ndjekjes që e
kishin marrë rolin e cenzurës.Falenderoj
publikisht redaksinë e atëhershme si dhe
Prof.dr. Agim ZOGAJ i cili atëhere ishte
i revistës dhe nuk u tërhoq para forcës
së cenzurës dhe e publikoi këtë poezi
që i kushtohej pjesëmarrësve në
demostratat e atyre viteve të zjarrta.

Gëzim Muçolli ,13 nëntor 2011,Itali.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30