Drejtësia e përgjysmuar!

Drejtësia e përgjysmuar!

Besim Toska, BOTA SOT
Intervista: Gjyqtarët e prokurorët emërohen në vjeshtë





Peter Bach, drejtor i Sekretariatit të Komisionit të Pavarur Gjyqësor dhe Prokurorial

Komisioni i Pavarur Gjyqësor dhe Prokurorial synon të përzgjedhë kandidatët më të mirë për gjyqtarë dhe prokurorë sipas standardeve më të larta profesionale dhe integritetit moral në përputhje me kriteret e përcaktuara në legjislacion. Procesi i përzgjedhjes do të realizohet në përputhje me standardet evropiane dhe sipas meritës, premton Peter Bach, drejtor i Sekretariatit të Komisionit të Pavarur Gjyqësor dhe Prokurorial të Kosovës, në një intervistë për “Botën sot”. Ai thotë se këtij Komisioni do të mund t’i bashkohen tre gjyqtarë e prokurorë vendës pas përzgjedhjes dhe emërimit të gjyqtarëve të Gjykatës Supreme dhe të prokurorëve të Prokurorisë Speciale të Kosovës. Ndërsa, pas përzgjedhjes dhe emërimit të gjyqtarëve e prokurorëve nëpër zyrat rajonale të gjykatave dhe prokurorive, edhe dy gjyqtarë e prokurorë të tjerë, të këtij niveli do t’i bashkohen komisionit. Kështu që përfundimisht Komisioni do të përbëhet nga pesë (5) gjyqtarë dhe prokurorë ndërkombëtarë dhe pesë gjyqtarë e prokurorë vendës.
“Bota sot”: Procesi i emërimit ka filluar, me ç’rast është bërë aplikimi për pozitat e gjyqtarëve dhe prokurorëve, si e vlerësoni këtë proces, të cilin e kemi pritur për një dekadë?
Peter Bach: Do të dëshiroja t’ju përkujtoja se ky është vetëm një proces i aplikimit paraprak dhe se aplikacionet e veçanta për pozitat specifike do të pranohen vetëm pas shpalljes së pozitave të veçanta nga Këshilli Gjyqësor i Kosovës.
Kush janë anëtarët e komisionit?
“Bota sot”: Cilat kanë qenë arsyet që disa prej aplikacioneve janë refuzuar që në fillim?
Peter Bach: Kandidatët që nuk e kanë kaluar provimin e jurisprudencës, pastaj ata që kanë më pak se tre vjet përvojë përkatëse pune ose ata që janë afër moshës së pensionit, fillimisht ishin të refuzuar, sepse nuk i plotësojnë kriteret themelore për emërimet gjyqësore të përmendura në Udhëzimin administrativ 2005/52, neni 6.
“Bota sot”: Ka shumë kritika nga institucionet vendëse gjyqësore në lidhje me mospërfshirjen e ekspertëve vendës që nga fillimi i procesit?
Peter Bach: Tre gjyqtarë e prokurorë vendës do t’i bashkohen Komisionit të Pavarur Gjyqësor dhe Prokurorial pas përzgjedhjes dhe emërimit të gjyqtarëve të Gjykatës Supreme dhe të prokurorëve të Prokurorisë Speciale të Kosovës. Më vonë, pas përzgjedhjes dhe emërimit të gjyqtarëve e prokurorëve nëpër zyrat rajonale të gjykatave dhe prokurorive, edhe dy gjyqtarë e prokurorë të tjerë, të këtij niveli po ashtu do t’i bashkohen komisionit. Kështu që, përfundimisht komisioni do të përbëhet nga pesë (5) gjyqtarë dhe prokurorë ndërkombëtarë dhe pesë gjyqtarë e prokurorë vendës.
“Bota sot”: Sa gjyqtarë dhe prokurorë planifikoni t’i pranoni dhe a keni kandidatë të mjaftueshëm që janë të interesuar të jenë pjesë e këtij procesi?
Peter Bach: Numri i të emëruarve varet nga pozitat që janë në dispozicion. Sipas Ligjit aktual të gjykatave, janë rreth 420 pozita për gjyqtarë dhe prokurorë. Po, kemi numër të mjaftueshëm të kandidatëve. Procesi i aplikimit paraprak është duke ecur shumë mirë. Ne kemi shumë kandidatë të interesuar që do të thotë se të gjitha pozitat do të plotësohen.
“Bota sot”: A mendoni se do të emëroni njerëz të besueshëm dhe se sundimi i ligjit do të fitojë besimin e merituar?
Peter Bach: Komisioni i Pavarur Gjyqësor dhe Prokurorial synon të përzgjedhë kandidatët sipas standardeve më të larta profesionale dhe integritetit moral në përputhje me kriteret e përcaktuara në legjislacion. Procesi i përzgjedhjes do të realizohet në përputhje me standardet evropiane dhe sipas meritës.
Hapi tjetër është testi i etikës
“Bota sot”: Kur do të bëhet emërimi i parë i gjyqtarëve dhe prokurorëve të rinj në Republikën e Kosovës dhe kur do të shihen rezultatet e para nga KPGjP-ja?
Peter Bach: Momentalisht jemi në përfundim të procesit të aplikimit paraprak. Hapi tjetër është testi i etikës. Vetëm atëherë do të mund të bëhej shpallja e pozitave për Gjykatën Supreme dhe Prokurorinë e Kosovës. Pas kësaj pason periudha e verifikimit e më pas kandidatët do t’i nënshtrohen komisionit. Megjithatë, për shkak të pushimeve në gjyqësi gjatë muajve korrik e gusht 2009, ky proces ndoshta do të zhvillohet vetëm pas pushimeve, kështu që unë pres që komisioni t’i përfundojë rekomandimet e para në vjeshtë të vitit 2009.
“Bota sot”: Cilat janë problemet me të cilat ballafaqoheni në këtë proces shumë të rëndësishëm të emërimit?
Peter Bach: Deri më tani në fakt nuk jemi ballafaquar me ndonjë problem. Projekti është në rrugë të mbarë dhe ne kemi pasur një numër të madh të kandidatëve që tregon një interesim të madh për procesin.
“Bota sot”: Pasi që jeni ekspert në fushën e drejtësisë dhe gjyqësisë çfarë është vlerësimi i juaj për udhëheqësit aktualë të këtyre dy fushave?
Peter Bach: Nuk është imja të komentoj pasi që përfaqësoj një institucion të pavarur me një mandat të definuar qartë i cili nuk përfshin një vlerësim të tillë.
“Bota sot”: Kush do të përkujdeset për një reformim të mëtejmë në këto fusha?
Peter Bach: Këshilli Gjyqësor i Kosovës do ta trashëgojë procesin pasi Komisioni i Pavarur Gjyqësor dhe Prokurorial ta përfundojë projektin e vet.
“Bota sot”: A mendoni se do të ketë paga më të larta për gjykatësit dhe prokurorët në mënyrë që korrupsioni të mos i shtrij rrënjët ?
Peter Bach: Mendoj se kjo pyetje duhet t’i drejtohet Qeverisë së Kosovës, pasi është jashtë mandatit të KPGjP-së.