Kryeparlamentarja Topalli: Shqipëria në NATO, simbol i fuqizimit të kombit

Kryeparlamentarja Topalli: Shqipëria në NATO, simbol i fuqizimit të kombit

BOTA SOT
Në Postribë, kryetarja e Kuvendit konfirmoi sërish, se mazhoranca e djathtë në fundin e vitit të parë të mandatit të ardhshëm, do të bëjë të mundur, që qytetarët shqiptarë të lëvizin pa viza.

Tiranë, 11 prill



Postriba vendi ku për herë të parë nisi rezistenca antikomuniste në Evropë, ishte vizita e radhës e kryetares së Kuvendit Jozefina Topalli. Me këtë rast ajo tha se Premtimet e dhëna u kthyen në realitet, realitete që preken, shihen, admirohen. Në çdo komunë ne dhjetëfishuam investimet.
Si askush dhe askund tjetër në Shqipëri, postribasit e ndjejnë më së shumti mrekullinë dhe sublimitetin e anëtarësimit në NATO, pasi në këtë komunë, me dhjetra burra e gra u pushkatuan, u burgosën dhe u persekutuan nga një prej regjimeve më të egra të njerëzimit, komunizmit.
Në një atmosferë mikpritëse e entuziaste, postribasit shprehën kënaqësinë e veçantë që Kryetarja e Kuvendit erdhi për të ndarë me ta, gëzimin e kësaj ngjarjeje të madhe historike. Postribasit në emër të vlerave të lirisë dhe demokracisë sakrifikuan shumë që Shqipëria të arrinte këto ditë, kur fjala e saj të jetë e barabartë më atë të aleatëve strategjikë të politikës dhe ekonomisë globale. Shqipëria në NATO është një premtim i tejkaluar, sepse katër vite më parë Kryeministri Berisha kishte premtuar një gjë të tillë. Kryetarja e Kuvendit, Toppali, duke shprehur emocionet e veçanta për këtë takim tha se monumenti ku postribasit janë mbledhur për të festuar është simbolika e NATO-s, e qëndresës, e besimit, simbolika e një populli që nuk i ka munguar kurrë vokacioni për perëndimin.
“Është simbolika e NATO-s, sepse kjo aleancë e madhe, unike në botë, lindi pikërisht për t’iu kundërvënë kërcënimit të komunizmit.
Ky monument këtu në komunën tuaj është modeli, shembulli, integriteti i një populli që më parë se të tjerët e kuptoi dhe u çua kundër komunizmit, jo vetëm në Shkodër, jo vetëm në Shqipëri, por në të gjithë Evropën.
Duke vlerësuar besimin që banorët e Postribës i kanë dhënë dhe i japin reformave të mazhorancës së djathtë, Kryetarja e Kuvendit shprehu bindjen se ata dhe të gjithë shqiptarët do të vazhdojnë të mbështesin projektin e zhvillimeve të mëdha ekonomike, projektin e madh të Shqipërisë që po ndryshon. Në Postribë, kryetarja e Kuvendit konfirmoi sërish, se mazhoranca e djathtë në fundin e vitit të parë të mandatit të ardhshëm, do të bëjë të mundur, që qytetarët shqiptarë të lëvizin pa viza. Kryetarja e Kuvendit ishte sot dhe në komunën e Grudës dhe Guri Zi, ku ajo shprehu mirënjohjen për mbështetjen që banorët e këtyre komunave u japin reformave për ndryshim. “Këto katër vite kanë qenë periudhë e sfidave të mëdha, periudhë e vështirë e reformave të paimagjinueshme, por edhe e sukseseve të mëdha, e rezultateve të shkëlqyeshme, periudha që e ktheu Shqipërinë në një imazh tjetër, e bëri më të nderuar më të respektuar, si të gjitha vendet evropiane dhe më përtej’, u shpreh Kryetarja e Kuvendit. Në bisedat me banorët dhe drejtuesit e komunave, u vlerësuan ndryshimet e thella në infrastrukturë që kanë përmirësuar ndjeshëm jetën e komunitetit. Ajo u premtoi banorëve se në mandatin e ardhshëm do të ketë më shumë investime sesa nga këto që janë realizuar.“Prioriteti ynë në mandatin e ardhshëm është që të pasurit jo të pasurohen, por të varfrit të dalin nga varfëria, duke bërë të mundur rritjen e rrogave dhe pensioneve”- u shpreh Kryetarja e Kuvendit, znj.Topalli.